30/10/2023
Duuti, beellii fi waraanni har'a ummata Wallaggaa irratti gadi fageenyaan adeemsifamaa jiru duula Oromoo cabsuu akka ta'e qondaalli duraanii KFO obbo Baqqalaa Garbaa himan.
Sagantaa OMN "balaa rifaasisaa Oromiyaaf falli maali?" jedhun qopheesse irratti kan hirmaatan obbo Baqqalaa Garbaa, sirni amma biyya bulchaa jiru kun ummanni Oromiyaa lixaa kun baduu qaba jedhee sirna amanuudha jedhan.
Rakkoo weerara dhibee busaa muudateefi rakko nageenya naannicha tureen ummanni godinaalee Wallaggaa rakkoo namoomaa hamaa keessa jiraachuu qaamoleen garagaraa dubbataa jiru.
Rakkoo muudate hordofee sagantaa OMN fala barbaaduuf Onkololeessa 21 bara 2023 qopheesse irratti kan hirmaatan qondaalli KFO duraanii obbo Baqqalaa Garbaa, mootummaan biyyaa bulchaa jiru itti kaayyeffatee ummata kana dhabamsiisuudhaaf hojjataa jira jedhan.
Mootummaan amma biyya bulchaa jiru kun jibba Oromoo Wallaggaa irratti har'a godhate boru naannolee biroo guutuu akka dhaqqabsiisu dubbataniiru.
Isa har'a diina godhate boru immoo fira godhata, isa har'a abaaru bor ni eebbisa waan ta'eef Oromoonni naannoo biroo gochi kun na bira hin gahu jedhanii cal'isanii laaluun sirrii miti jechuun obbo Baqqalaa Garbaa ummanni akka birmatu dhaamaniiru.
Waraana, beelaa fi dhukkubni har'a ummata Wallaggaa hubaa jiru bor balbala namaa hundaa kan dhaqqabu ta'uu eeruun har'uma waliif haa birmannu jedhu.
Akka Obbo Baqqalaa Garabaa jedhanitti "xiyyeeffaannaan sirna biyya bulchaa jiruu Oromoo cabsuuf eessaan haa jalqabnu, yoo naannoo kam cabsine Oromoon nuuf caba jedhanii karoorfatanii wallagga irraan eegalan.
Sirni amma biyya bulchaa jiru kun waa'ee Wallaggaa irratti waliif galee karaa diinagdee, barnootaafi roga hundaan ummata kana kuffisuuf ofii itti duulanii bira darbanii ormas itti duulchisan jechuun hima.
Oromoonni biyya biraa jiraatanillee yeroo biyy sana deeman dhugaa jalaa dhoksanii soba qofa waan itti agarsiisaniif rakkoonuu biyya sana keessa waan jiru itti hin fakkaatu.
Keessattu dubartoonni Oromoo wallaggaa rakkoo isaan keessa jiran rabbi malee namni isaan beeku hin jiru jechuun obbo Baqqalaan sagantaa OMN fala barbaaduu guyyaa kaleessaa qopheesse irratti dubbatani jiru.
Dubartoonni kunniin abbaa manaa isaanii irraa ajjeefamee, ilmaan isaanii kan guddatan irraa ajjeeffamani, inni kuun bosonatti galee haadholiin du'aa fi jireenya gidduu jiraata jiru jechuun Obbo Baqqalaan dubbatani jiru.
Kanaaf jecha ummanni keenya kan biyya keessaa fi alaa jiru tokko tokko isaaniitiin ummata dhibeefi beelaan dararaa hamaa keessa jiruuf gargaarsa gochuu akka qaban dhaamaniiru.
Addatti warri biyya alaa jiran carraa hojii bal'aa waan qabaniif hawaasa rakkataa jiru kanaaf sa'aatii itti dabalee hojjatee gargaaruu qabu jedhan.
Obbo Baqqalaan warra mootummaatiif kan dhaaman waan biraallee gochuu yoo dadhabdan gargaarsuma alaarra dhufu karaa itti hin cufinaa jechuun dhaamaniiru.
