25/08/2025
طيب وفي الاخر نقول كل سنه وانتم طيبين كان موسم مانجو جميل جدا واجمل من كل سنه كمان بسبب اننا عملنا اكونت واتعرفنا علي ناس جميله زيكم وكان موسم ملئ بالفرحه والبهجه والمغامرات والمعارف الطيبه ذات الأصل الطيب
والحقيقه كانت فكره جميله اننا نعمل اكونت ل مزارع شــــــــاهين
وعلي الرغم من كثره عملائنا إلا أنه أضاف لنا معارف جديدة وأشخاص الكلام معهم يطيب القلب وكلهم علي مستوي واحد من الصداقه والاخويه وبصراحه بتمني السنه كلها مانجو عشان نفضل علي تواصل علي الرغم أن الناس مش بتقصر والله كل شويه مكالمه من اخ وصديق بيطمن وهكذا الأمر مني انا كمان وربنا يديم ما لبعض دائماً يا حبايب قلبي
واحب أوجه اعتذاري لاي شخص أنا زعلته دون قصد
بس خلي بالكم كده الموسم لسه برضو ما خلصش لسه في ناس اصدقائي عندهم مانجو ولاكن بسيط برضو كلها حجات بسيطه ويخلصو
وحته حابب اشرحها أنا قولتها كتير ولاكن عشان الكل يبقي فاهم
الناس بتقولي السعر اغلي عندك شويه .....
طيب براحه كده وواحده واحده أنا كصاحب ارض او مزرعه
الشجر عندي وعند كل الناس لما بيطرح بيطرح حب كبير وحب صغير زي ما ربنا خلقنا الطويل والقصير تمام لحد هنا
ف لما يكون عندك السوق هتعبي الكرتونه الكبير مع الصغير ومثلا هتتباع الكيلو فيها علي 10جنيه وعندي حد عاوز مانجو بس متنقيه بقي بالحبايه يعني الصغير لا ومش صغير بس دا بيبقي في حب من السوا علي الشجر نزل وقع من ارتفاع كبير ف بتتطري دي ممكن اوديها السوق إنما لحد منكم لا
طيب..... ويدخل دور الصدق والأمانة الي انتم متعودين عليه مننا الي هو أننا استحاله نرش مانجو عشان تستوي بسرعه
أو نحط حبابه فيها زبابه تفتحها من جوه تلاقي فيها حاجه سودا
ف كل ده عشان تعملو بيطلع عندك هوالك كتييير هو مش بيترمي هو بيتباع ولاكن بأسعار أقل بكتير من السوق الي هو لو ب 10 ده هيتباع ب 5 فعشان الخساره دي لازم تتعوض في الزرع النضيف اظن دي في البزنز ما يختلفش عليها اتنين ف علي هذا الأساس بتكون اغلي من بره إنما الي بيبقي عاوز يشتري مانجا وخلاص مش فارق معاه هي مرشوشه ولا لا أو صغيره او طريه أو فيها زبابه الكلام ده كله أنا قلت للاسف ما بشتغلش فيه ومش هشتغل فيه لأن مش ده الي الناس بتوعنا متعوده عليه مننا
مزارع شــــــــاهين دا يعتبر براند لكل الراقيين والمتذوقين وأصحاب المزاج العالي 🍀
وشكراً جداااااا ليكم وعلي خير السنه الجايه أن شاء الله 💕
