30/04/2026
تخيل أن متحف حضاري ومجمع أديان موجود فى محافظه المنيا ، المكان دا كان عاصمه لإقليم في العصر المصري القديم ،ومن أهم المعاقل الرومانيه اللي كانت صعبه علي المسلمين فتحها، وهي البقيع الثاني ومدينة الشهداء ...
🔷الا وهي (البَهْنَسَا )اللي ابن بطوطه زارها وضبط اسمها بالفتح الموحده وإسكان الهاء وفتح النون والسين ..
🔷الواقدي كتب في فضلها وقال "البَهْنَسَا نزل بها عشر الآف عين رأت النبي ،وسبعون بدرياً، والف وأربعمائة من الصحابة والتابعين "
🔷حدود المكان زمان كان بيبدأ من الواسطي لحد سمالوط ، بس حاليا هي قرية جوه مركز بني مزار في محافظه المنيا ...
🔷 تعال نرجع للعصر القديم ونشوف المكان كان اي ،اولا كده كان اسمه" پر مجد " وهو بمعني مكان الالتقاء ⬅️اي مكان لقاء الاله حورس وست ،او مكان التقاء طريق الواحات والنيل ، وبرضو كانت عاصمه للاقليم 19 ، بالاضافه لوجود عدد من اطلال المعابد للألهة، وكمان مقابر للأسرة 26...
🔷أما في العصر اليوناني فالاسم كان متغير( أوكسير نخوس) وهي سمكه كبيره وفمها مدبدبه وكانت معبوده ، وكانت السمكه دي بتظهر في وقت الجفاف في بحر يوسف ، والسمكه موجوده في متحف برلين حاليا، وكمان في منشئات شاهده علي العصر اليوناني..
🔷نيجي للعصر الروماني واسمها برضو اتغير ( أبهي النساء ) ودا نسبه لبنت الامبراطور اللي كان بيحكم في الوقت دا ، وفي روايه تانيه أن للامبراطور دا جاريه كان بيحبها وكانت جميله جدا ومن شده حبه سماه المدينه بأبهي النساء الاسم فضل كده لحد الفتح الإسلامي واتحرف وبقا الاسم ( البَهْنَسَا) .. ، غير كده وجود بعض المنشئات الرومانية ، وخصوصا المسرح الروماني اللي كان أكبر من مسرح اسكندرية ...
🔷 اما بالنسبه للعصر القبطي ، فالمكان كان محطه من محطات العائله المقدسه فالسيده مريم وسيدنا عيسي استظلوا بشجرة مازالت موجوده في المكان لحد دلوقت ، وغير كده أن البهنسا كانت تاني مكان في مصر ينتشر فيه المسيحيه بعد الاسكندريه ، ووجود كتير من الاديرة والكنائس ..
🔷نيجي لفتح المدينه ، عمرو بن العاص لما اتجه لفتح الصعيد ، اخد الأذن الاول من عمر بن الخطاب ، فأشار عليه الخليفه عمر بأنه يبدأ بالبهنسا ، واهناسيا عشان هما اهم واصعب معاقل الرومان ، وبالفعل تمكن المسلمين من فتح المدينه بعد معركه صعبه واستشهد عدد من الصحابه ودفنوا بالبهنسا لذلك سميت (بالبقيع الثاني ) (ومدينه الشهداء)..
🔷البَهْسَنَا مشهوره بعدد كبيره من الاضرحه والمقابر والقباب الخاصه بالصحابه والتابعين للرسول ( صلي الله عليه وسلم ) .
◽ مقام سيدي علي الجمام:_
( قاضي البهنسا يقال إن الشخص دا من الصحابه اللي حضروا موقعه الفتح واستشهد ، ويقال إن أنه قاضي البهنسا في العصر المملوكي ) ..
◽ضريح فتح الباب :_
وهو عبد الرازق الانصاري هو أول من فتح الحصن ،وثم استشهد ودفن بالضريح..
◽ضريح السيدة رقية :_
وهي من ءال البيت .
◽ضريح محمد بن عقبة بن عامر الجهمي:_ وهو من الصحابه ..
◽ضريح الحسن بن صالح بن علي زين العابدين بن علي بن أبي طالب ..
◽ومسجد الحسن بن صالح وهو علي التخطيط الفاطمي ، ويعتبر المسجد الوحيد الذي له قبتان...
◽ضريح عبدالله التكرور :_
وهو من أصحاب الكرامات ..
◽قبة أبوسمرة :_
وهو أحد أحفاد الحسين رضي الله عنه ...
◽قبة الأمير زياد الفضل بن الحارث بن عبد المطلب بن عم الرسول صلى الله عليه وسلم...
◽قبة ابان بن عثمان :_ وهو أحد أحفاد سيدنا عثمان بن عفان رضي الله عنه ، وابان كان معاه نسخه من المصحف ..
◽السبع بنات :_
في وقت الفتح الاسلامي طلعت مجموعه من البنات من الدير عشان توصل المؤن للجيش الإسلامي ، ولكن قتلهم الرومان ..
♦️♦️البَهْنَسَا مكان ملئ بالحضارات من مختلف العصور ،زور المكان وانت هتحس انك وسط سطور كتاب تاريخ عايش في عصر قديم لحد الفتح الإسلامي وكمان مملوكي وعثماني ...
المكان بس محتاج اهتمام وان الناس تعرف أنه موجود اصلا ...
#البهنسا ولا تزال المنيا به تاريخ العظماء
