12/10/2025
Waxaan ummadda Soomaaliyeed, shacab iyo dowladba ugu hambalyeynayaa sannad-guurada 71aad ee ka soo wareegtay 12kii Oktoobar 1954, oo ahayd maalinkii ugu horreysay ee ifka laga taagay calanka Soomaaliyeed.
Munaasabadda calanka oo astaan u ah qarannimada iyo gobannimada ummadda Soomaaliyeed waxa ay na xusuusinaysaa nafhurka halyeeyadii u soo halgamay xornimada iyo madaxbannaanida Soomaaliya, kuwaas oo innaga mudan duco, xusuus, maamuus, iyo in aan nooleyno dhaxalkoodii oo aan ka dhabeyno himilooyinkii ay ku taami jireen.
Munaasabaddan waxa ay innagu dhiirrigelineysaa in aan dib-u-eegis ku sameyno, si hagar la’aan ahna uga wada shaqeyno dib-u-dhiska dalkeenna iyo dowladnimadeenna, iyo dib-u-heshiisiinta bulshadeenna, si aan u xaqiijinno horumar, nabad, midnimo, iyo dowladnimo sal adag ku fadhida.
