Nin Dhufaa Na Eegi

03/04/2026

03/04/2026

በኢትዮጵያ የነዳጅ አቅርቦትና ስርጭት ዙሪያ የሚታየው ችግር ውስብስብና ዘርፈ ብዙ ቢሆንም፣ በአሁኑ ወቅት በአንዳንድ ተቃዋሚ ነን ባይ ግለሰቦች የሚሰነዘረው ሂስ ግን ካለበት ተጨባጭ እውነት ይልቅ ለፖለቲካ ትርፍ ተብሎ የሚደረግ የለየለት ስም ማጥፋትና የጅልነት ድራማ ሆኗል። እርግጥ ነው፣ በመንግስት መዋቅር ውስጥ ባለው የአሰራር ድክመት፣ የቁጥጥር መላላትና በአንዳንድ አመራሮች ዘንድ በሚታየው ከፍተኛ የሙስና አባዜ ምክንያት የነዳጅ ኮንትሮባንድና ህገ ወጥ ንግድ ተንሰራፍቶ ህዝቡን ለእንግልት እየዳረገው መሆኑ የማይካድ ሀቅ ነው፤ ይሁን እንጂ እነዚህ "ተቃዋሚ ነን" ባዮች ችግሩን በምክንያታዊነትና በማስረጃ ደግፈው ከመተቸት ይልቅ፣ መንግስት የዓለም አቀፍ የነዳጅ ዋጋ ጭማሪንና የሀገር ውስጥ የድጎማ ፖሊሲ ማሻሻያን ተከትሎ የሚወስዳቸውን አስፈላጊ የሪፎርም እርምጃዎች ሳይረዱ በደፈናው "መንግስት ሆን ብሎ ህዝቡን ሊያስርብ ነው" እያሉ የሚነዙት ፕሮፓጋንዳ እጅግ አሳፋሪ ነው።

መንግስት የነዳጅ ድጎማን በሂደት ለማንሳትና የዲጂታል ክፍያ ስርዓትን (Telebirr/CBE) በመዘርጋት ኮንትሮባንድን ለመቀነስ የሚወስዳቸው እርምጃዎች የረጅም ጊዜ ሀገራዊ ፋይዳቸው የጎላ ቢሆንም፣ እነዚህ አካላት ግን ምንም አይነት የተሻለ አማራጭ ሀሳብ ሳያቀርቡ፣ ለሚታየው እጥረት ሁሉ መንግስትን ብቻ ተጠያቂ በማድረግና ያለ በቂ መረጃ ህዝብን በማሸበር ላይ ተጠምደዋል። ይህ ያለ ምንም ማስረጃ የሚደርግ ጩሀት፣ ችግሩን የማይፈታ ነገር ግን በጥላቻ ፖለቲካ ላይ ብቻ የተመሰረተ ትችት፣ መንግስት ውስጥ ያለውን ትክክለኛ ሙስና በቁጭት ለመታገል የሚያስችል ሳይሆን፣ ይልቁንም የህዝቡን ብሶት ለግል ዝናና ለፖለቲካ ፍጆታ ለመጠቀም የሚደረግ ባዶ ጩኸት በመሆኑ ሊወገዝ ይገባዋል።