10/08/2026
JUBA: CI DR. RIEK MA̱CA̱R TƐNY WEE, "RUAACNIKÄ TIN BÄ LAT, /CÄ BI RUAC THAMBALƐ CETKƐ THAMAK, BA ƔÄ THUR Ɛ JƆC KƐ BI̱DIÖÖ KÄ BA JƆWDÄ KÄP KƐƔÖÖ BAKƐ GUIC KÄ BAKƐ LIŊ CÄŊ INDƆ̱Ŋ"
==================================
ɛ.kɛ cäŋkä 07/Tho̱o̱r/2026, gua̱a̱th-luɔ̱k in 105, ca ram min dhieec nɛɛni tin ca yiɛn ni̱ Dr. Riek Maca̱r Tɛny-dhurgön cɔal nhial kɛɣöö bɛ rɔ ben wɛr kä ruaacni̱ diaal tëë ca gɔnyni̱ jɛ.
cɛ rɔ jiɛc nhiam nath ɛn Gat-Maca̱r Tɛny-dhurgön, cɛ kua̱r Luɔ̱k tin ti̱n daŋdiɔ̱k thiec. Cɛ ruac tok i̱nɛ:
" yɛ kua̱rluɔ̱k! Mi lotɛ rɔ̱, Ɣän /cä bi ruac thambalɛ baaŋ cetkɛ thamak (re̱c). Göörä jɛ ɛnɣöö gua̱a̱th in ta̱a̱ ruac, ba ɣä thur kɛ bidiöö ɛ jɔc kä ba jɔwdä käppiny (record) kɛɣöö ba ruaacni̱kä tin bä lat guic kä bakɛ liŋ ruɔ̱n kɛl ɛ nɛy tin bikɛ go̱r kɛ gua̱a̱th in bi̱ ben kɛnɛ duëlgɔ̱rä tin di̱t." Ca ruac ɛ mɔ lat ɛ Dr. Riek Maca̱r Tɛny.
ŋot kɛ mi ruacɛ ɛn Gat-Maca̱r, cɛ kua̱r luɔ̱k tin di̱t jiök i̱nɛ:
" bia gua̱a̱th-luɔ̱ɔ̱kni jakä mi̱ bi teekɛ maan kɛ ciaaŋ cuɔ̱p kɛnɛ ta̱th ŋäcä ŋɔaani tin paytäth kɛ kui̱i̱ ŋäcä-ŋɔaani (technology) mi̱ payben. Kɛɣöö ca muktäp luɔ̱ɔ̱kni̱ nɛmɛ luäk kɛ Kɔmpio̱tɛri (computers) ɛ UNMISS kɛɣöö ba lät diaal tɔ̱tɔ̱ la̱t kɛ kɛ kɛ guic la̱t muktäpä luɔ̱ɔ̱kni̱." Ca ruac ɛmɔ la̱t kua̱r-luɔ̱ɔ̱kni ɛ Dr. Maca̱r.
ŋot kɛ mi latɛ jɛ bä ɛn Dr. Riek Maca̱r Tɛny-dhurgön ɛnɣöö, ruaacnikɛ tin cɛ gɔ̱r kɛ wargak bakɛ tho̱p naath kɛɣöö cɛkɛ gɔ̱r nowen ɛ ci̱kɛ thuɔ̱k, /ca bilɛ wee mi gɔ̱a̱r kɛ nikɛ, ba cu kuɛn nikɛ kɛɣöö bi luk pɛ̈th /cɛ bi̱ lɛ tee niyniiy.
nɔ, ca ruac ɛmɔ lo̱k ɛ La̱a̱t-ŋuɔ̱tni̱ tin ɣɔarkɛ kuumɛ. Ci Ajo Ohisa jɛ lat ɛnɣöö ruac ɛmɔ ca thiec ɛ Dr. Riek Maca̱r /cɛ gɔaa. Cɛ kua̱rluɔ̱k jiök ɛnɣöö lökɛ ruac ɛmɔ /cuarɛ ja nhɔk ɛnɣöö na ruac Dr. Riek Maca̱r thur ka bi̱diöö kiɛ ba käp kɛ jɔw.
ruac ɛmɔ ca kapnhial ni̱wal ɛ kuäär La̱a̱t-ŋuɔ̱tni min ɣɔɔr nɛy tin ca yiɛn ni Geri Raimondo Legge ɛnɣöö ba ruaac Dr. Riek Maca̱r Tɛny-dhurgon guic kɛ thurɛ kɛ Bidiöö kä bakɛ ka̱ppiny kɛ jɔw kɛɣöö bɛ naath mal luäk mi̱ tëëkɛ mi̱ göör kɛ ɛ thia̱k.
i̱nɔ, ci̱ La̱a̱t-ŋuɔ̱tni̱ tin ɣɔarkɛ kuumɛ thiec kɛɣöö bakɛ moc kɛ gua̱a̱th kɛɣöö bi̱kɛ tin diaal tin ca̱ gɔ̱r wä loc kɛ wargakni̱. Ca ruac ɛmɔ nhɔk ɛ kua̱r-luɔ̱k tin di̱t, ca luk cu kapjɔk. Ba loc kɛ Jiëcla̱t 10/Tho̱o̱r/2026 kä bi̱ Dr. Maca̱r ŋot kɛ mi bɛ ruaacni̱kɛ tin ca gɔnyni jɛ wä loc kɛ jɛn cäŋ amɔ.
KƐƐL MEDIA
Gua̱a̱th Lääri min Thuɔ̱k kɛ Thoknath
