08/10/2024
සිරුරට සුව දෙන තේ ගැන මේ දේවල් දැන ගෙන හිටියද බලන්න. අද "තේ ගැන විස්තරේ"න් අරගෙන එන්නේ ඔබේ සිරුරට සුව දෙන තේ වල ඇති ගුණ ගැනයි.
තේ කෝප්පය විඩාව සංසිඳුවා ගැනීමටත්, ගත සිත ප්රබෝධමත් කර ගැනීමටත්, ප්රිය සම්භාෂයණයටත් අප හට නැතුවම බැරි දෙයකි. යටත් විජිත සමයේ දී අප රටට හඳුන්වා දෙනු ලැබූ තේ වෙන් කල නොහැකි ලෙස අපගේ ජීවන රටාව සහ සංස්කෘතිය හා බද්ධ වී අවසන්ය.
තේ පානයෙන් ගතට මෙන්ම සිතට ද දැනෙන ප්රබෝධයට හේතුව වන්නේ එහි අඩංගු කැෆේන් රසායනිකය මධ්ය ස්නායු පද්ධතිය මත උත්තේජකයක් ලෙස ක්රියා කිරීමයි.
නමුත් තේ පානය මගින් ශරීරයට හුදු උත්තේජනයක් ලබා දෙනවා පමණක් නොවේ. තේ වල ඇති කැෆේන් මෙන්ම තවත් රසායනික සංයෝග මිනිස් සිරුර මත යහපත් බලපෑම් ඇති කිරීමට සමත්ය.
තේ වල අඩංගු හිතකර සංයෝග අතරින් ප්රතිඔක්සිකාරක ප්රධාන තැනක් ගනී. කැටචින සහ පොලිෆීනෝල ආදී වර්ග වලට අයත් ප්රතිඔක්සිකාරක ගනණාවකින් තේ පොහොසත් අතර තේ වර්ගයෙන් වර්ගයට එම ප්රමාණයන් වෙනස් වේ.
සිරුර තුළ ඇති free radicals ලෙස හැඳින්වෙන අස්තායි අණු මගින් සෛල වලට ඇති කරන හානි වැලැක්වීම ප්රතිඔක්සිකාරක වලින් සිදුවන ප්රධාන මෙහෙයයි. ඒ ඔස්සේ හෘදයාබාධ, පිළිකා සහ අල්සයිමර් රෝගය වැනි රෝගාබාධ වැළැක්වීමට යම් දායකත්වයක් දැක්වීමට තේ වල ඇති ප්රතිඔක්සිකාරක සමත්ය. එමෙන්ම සමෙහි තෙතමනය ආරාක්ෂා කරමින් එය නිරෝගීව සහ සුමුදු ලෙස තබා ගැනීමටත් ප්රතිඔක්සිකාරක දායක වේ. ප්රතිඔක්සිකාරක යනු සමස්ථ නිරෝගී බව සඳහා වැදගත් වන සංයෝග කාණ්ඩයකි.
තේ පානය ශරීරයේ බර පාලනයට ද ඉවහල් වේ. තේ වල ඇති ප්රතිඔක්සිකාරක ආකාරයක් වන කැටචින සිරුරෙහි පරිවෘත්තීය ක්රියා වේගවත් කිරීමට සමත්ය. එමගින් කැලරි දහනය වේගවත් වන අතර මේද සංයෝග බිඳහෙලීම ද වැඩිවේ. තේ මගින් අධික කුසගින්න පාලනය කර ශරීරයට ලබා ගන්නා කැලරි ප්රමාණය අඩු කිරීමට යම් බලපෑමක් ඇති කරයි. යම් ප්රමාණයකින් ශරීරයේ බර අඩු වූ අවස්ථා වල සාමාන්යයෙන් සිදු වන පරිවෘත්තීය කියා වල වේගය මඳක් අඩුවීම පාලනයට ද තේ සමත් වේ. එමෙන්ම තේ පානය නිසා කැලරි අධික වෙනත් බීම වල අවශ්යතාව ද මඳකින් හෝ අඩුවේ. මේ සියලු කාරණා ශරීරයේ බර පාලනයට ඉවහල් වේ.
මේ අනුව බලන කල තේ යනු ප්රබෝධමත් බව මෙන්ම ශරීර සුවතාවය ද ඇති කරන අගනා පානයකි. ඉතින් ඔබත් නොවරදවාම ඔබේ ජීවන රටාවටත් තවත් එක තේ කෝප්පයක් වැඩිපුර එකතුකරගන්න අමතක කරන්න එපා.
