Bio Beienziichterei Schmit-Gidt

07/01/2026

D'Bio-Beienziichterei Schmit-Gidt wënscht, mat e bësse Verspéidung, vill Gléck an eng gutt Gesondheet fir 2026!✨🍀✨

D'Beien sëtzen de Moment, als Drauf, ronderëm d'Kinnigin a suergen mat liichten Flatteren vun de Flilléken derfir, dass 35°C am Beistack sinn. D'Wanterbei ass perfekt dorop agestallt, laang ze liewen an net zevill Energie ze verbrauchen, fir d'Vollek beschtméiglech iwwer de Wanter ze bréngen🐝❄️

Ab der Wantersonnenwende (21. Dezember), also wann d'Deeg lues a lues erëm méi laang ginn, weess d'Beievollek, dass et geschwënn un der Zäit ass, sech op d'Fréijoer anzestellen. Wann d'Temperaturen et zouloossen, fänkt d'Kinngin deemnächst un, erëm Eeër ze leeën a fir genuch Brut a Nowuess fir d'Sich no Pollen a Nektar, ze suergen, soubal déi éischt Bléien sech dobaussen weisen🌱🌿🪻

Et ass faszinant, wéi gutt d'Natur openeen agestallt ass, ganz ouni d'Agräife vum Mënsch🤩

10/12/2025

Dir sidd nach op der Sich no engem Chrëschtkaddo?🎄 Vläicht sinn eis Hunnegproduit-Corbeillen jo eng Iddi fir iech.

An eiser Corbeille ass 1 Glas Summerhunneg, 1 Glas Fréijorsbléienhunneg, 1 Hunnegdrëpp an 1 Beiewueskäerz zum Präis vun 45€.
Natierlech kënne mir och op Wonsch d'Corbeille anëschters zesummesetzen.

Eng schéin Adventszäit🎄✨⭐
Är Bio-Beienziichterei Schmit-Gidt

29/11/2025

Mir si prett🤩✨⭐🎄
Dir fannt eis haut a muer zu Kielen um 🎄Jingle & Mingle🎄 mat eisem Bio- Hunneg, Hunnegdrëpp a Beiewueskäerzen🐝🍯

27/11/2025

Thema: VESPA VELUTINA (asiatesch Runn)
Gudde Moien,
Wéi dir bestëmmt matkritt hutt, ass déi asiatesch Runn sech am gaangen ganz séier zu Lëtzebuerg auszebreeden.
Dat ass ee grousse Problem fir eis Biodiversitéit an och fir eis Hunnegbeien. Déi asiatesch Runn ass ee Raiber an ernährt sech gréisstendeels vun Insekten. Well si zu Lëtzebuerg keng natierlech Feinden hunn, verbreed si sech rasant a brauch dofir och vill Fudder. Dës Insekten feelen dann natierlech fir d'Bestëpsung.
Derbäi kënnt, dass si eisen Hunnegbeien d'Liewen schwéier maachen...Net just, dass si d'Beien virum Fluglach am Fléien offänken an friessen, si léisen och eenorme Stress am Beievollek aus, well déi sech natierlech wëllen wieren. Dofir geet dann awer vill Energie op d'Verteidegung vum Beiestack drop. Vill Reserven sinn elo schonn opgebraucht an déi kal Méint kommen eréicht. D'Beievollek ass geschwächt an huet keng gutt Basis fir de Wanter. Souguer wann et de Wanter packt, ass et fir déi kommend Saison geschwächt...een Däiwelskreess.

DOFIR ASS ET IMMENS WICHTEG, Näschter vun der asiatescher Runn och elo nach ewech ze maachen. De Moment sinn déi zwar manner aktiv, mee dat sinn jonk Kinniginnen, wouvunn all eenzel d'nächst Joer eng eegen Kolonie grënnt.

D'Habschter Gemeng huet eng super Initiativ ergraff an iwwerhëlt d'Käschten fir d'Näschter ewech ze maachen. Vläicht zitt jo déi eng oder aner Gemeng am Land no...fir eis Biodiversitéit🤩

🇱🇺 Asiatesch Hornissen 🐝
Dir hutt warscheinlech d'Opkomme vun asiateschen Hornissen an hir Näschter, déi an de Beem a Sträich hänken, bemierkt.
👉 D'Gemeng Habscht iwwerhëlt d'Käschte fir d'Zerstéierung vun Näschter, déi op privaten Terrain identifizéiert goufen.

🇫🇷 Frelons asiatiques 🐝
Vous avez sans doute remarqué l'arrivée de frelons asiatiques et de leur nid perché dans les arbres et arbustes.
👉 La Commune de Habscht prend en charge le coût de destruction des nids identifiés sur des terrains privés.

23/11/2025

Gudden Owend.

Hei lafen d'Preparatiounen fir dee nächste Weekend🤩
Mir hu Samschdes & Sonndes ee Stand zu Kielen um Jingle & Mingle🎄❄️

D'Hunnegdrëpp ass agefëllt, den Hunneg etikettéiert an d'Käerzen aus eisem Beiewuess gegoss.
Bis geschwënn❄️❄️❄️
Bio-Beienziichterei Schmit-Gidt

07/08/2025

THEMA: Lokal akafen🧺 vs. gepanschten Hunneg🍯

Gudde Mëtteg,
En Dënschdeg war een interessante Reportage am ZDF-frontal. Hei de Link fir hir d'Dokumentatioun an der Mediathéik nozekucken: https://www.zdf.de/video/dokus/frontal-doku-100/fake-honig-eine-suesse-illusion-100

An Däitschland gëtt an de grousse Supermarchéën Hunneg verkaf, wou net just Hunneg dran ass. Dësen Hunneg ass gepanscht mat Räissirup, Glukos oder Fruktos mee esou geschéckt, dass et an deene gängegen Analysen net bemierkt gëtt. Wat méi aner Zousazstoffer, wat den "Hunneg" méi bëlleg ka verkaaft ginn, MEE wëll ee wierklech Hunneg iessen, wou net just Hunneg dran ass?!😳

Lëtzebuerg ass keng Insel an esou gëtt och sécherlech hei am Land Hunneg verkaaft, deen net zu 100% aus Hunneg besteet.

‼️Fir ze wëssen, wat ee keeft, am beschten op déi lokal Beienziichtereien zréckgräifen, och wann deen e bësse méi deier ass✌️

Sonneg Gréiss
D'Beienziichterei Schmit-Gidt

Gepanschter Honig im Supermarkt? Der Verdacht besteht seit Langem. Die Dokumentation zeigt, wie das Geschäft mit dem Fake-Honig funktioniert.

28/07/2025

Gudde Mëtteg.
Haut hu mir de Summerhunneg vun dësem Joer geschleidert🤩 Den Oflaf ass dee selwechten wéi beim Fréijorsbléienhunneg: entdeckelen - schleideren - filteren - réieren an dann no enger bestëmmter Zäit an d'Glieser afëllen🍯

Frësch geschleiderten Hunneg ass flësseg a gëtt no enger gewësser Zäit fest. Dat ass bedingt duerch de Nektar, deen an eise lokalen Bléien ass🌼🌻🪻

Et gëtt awer een Trick💡💡💡: dee flëssegen Hunneg afréieren a sou wéi een e brauch aus der ❄️Truh❄️ huelen.

➡️A wien elo op de Goût komm ass, kann sech gär an deene nächsten puer Deeg bei eis melden. Da fëllen mir iech déi Glieser direkt an. De Präis ass 7,50€ fir 500g ☺️⬅️

Är Bio Beienziichterei Schmit-Gidt

13/07/2025

Gudde Mëtteg.
Haut hëllt de Joé bei gudden Wieder de Summerhunneg eran. ☀️☀️☀️

Dofir huet hie gëschter sougenannte Beienfluchten opgesat. Dat ass eng Erhéijung mat engem Lach an engem Plastik driwwer, déi als Art Labyrinth geduecht ass. D'Beien, déi am Hunnegraum sëtzen fannen duerch de Geroch vun der Kinnegin erëm erof an de Brutraum, mee kënnen sech de Wee duerch "d'Labyrinth" net verhalen, fir erëm zréck an den Hunnegraum ze kommen. Soumat sinn haut quasi keng Beien méi am Hunnegraum an de Joé kann d'Zargen mathuelen.

Elo kënnen d'Hunnegwaben zu Dondel nach e bëssen dréchnen, ier de Summerhunneg da geschleidert gëtt. D'Wieder huet dëst Joer matgespillt an d'Beien hu gutt geschafft💪

Well d'Wieder muer soll ëmschloen, riicht een sech als Beienziichter dem Wieder no a muss dann och alt emol Sonndes oder Feierdags ënnerwee sinn😅🐝

An dem Sënn, wënschen mir ee schéine sonnegen Sonndeg☀️

06/07/2025

EIS NEI ETIKETTEN SINN DO!🤩🍯🌻🐝☀️

Mir hunn zwou Zorten Hunneg: Fréijorsbléienhunneg a Summerhunneg.

Zu Lëtzebuerg ass et üblech, zwee Mol am Joer Hunneg ze schleideren. Je no Bléien, op déi d'Bei flitt, kritt den Hunneg een anere Goût, eng aner Konsistenz an eng aner Faarf. Dofir ass den Hunneg och all Joer e bëssen aneschters.

🟢 Am Allgemengen ass de Fréijorsbléienhunneg méi douce am Goût an e bëssen méi fest. Heifir fléien d'Beien ënner anerem vill op de Raps, Pissblummen a Weiden.

🟠 De Summerhunneg ass oft méi kräfteg am Goût, huet eng däischter Faarf an ass méi crèmeg. D'Beien fléien ënner anerem op Hambier, Schwarzbier, Lannen a verschidde Wëllblummen.

Dir kënnt eisen Hunneg🍯 op folgende Plazen kafen:
- bei eis Doheem zu Nouspelt oder Dondel (virdru Bescheed soen☎️📩)
- Frësch vum Baurenhaff zu Keespelt
- Uebstplantage Juckelsbesch Kielen zu Kielen

Bis vläicht geschwënn✌️

12/06/2025

Viru gutt 2 Wochen hu mir eise Fréijorshunneg vun dësem Joer geschleidert. A wéi mir dat bei eis maachen, gesitt a liest dir hei 🤓

Wann d'Beien den Hunneg fir gutt befannen, en also "dréchen" genuch ass, verdeckelen si all eenzel Wab. Dat ass de Moment, wou de Joé d'Hunnegraim op déi verschidde Stänn siche geet. Am viraus gëtt eng sougenannte Beieflucht, eng hëlze Rumm mat engem Lach ageluecht, fir dass d'Beie lues a lues aus dem Hunnegraum erausginn an net mat an de Schleiderprozess kommen (mir wëlle jo keng Beien am Hunneg😏)

Zu Dondel gëtt dann all Rimmche fir d'éischt an der Entdecklungsmaschinn entdeckelt, heescht de Wuesdeckel gëtt mat Messere maschinell erofgeschnidden. Dëse Wues gëtt an der Wuespress ausgedréckt, fir keng Drëps vun dem wäertvollen Hunneg ze verschwenden. Iwwert eng Ketten ginn d'Rimmercher an eng Schleider gefouert.

D'Schleider kann een sech e bësse wéi eng riiseg Zaloteschossel virstellen: duerch d'Rotatioun gëtt den Hunneg aus de Waben erausgeschleidert an zum Schluss kommen d'Rimmercher eidel, also ouni Hunneg eraus.

Den Hunneg gëtt dann nach gefiltert, well zu dësem Moment nach Wuessstécker drann sinn. Duerno gëtt den Hunneg e puer Mol am Dag geréiert, fir dass e cremeg gëtt a séier a Glieser agefëllt.

De Fréijorshunneg🍯 gëtt duerch d'Planzen🌱, op déi d'Beie geflu sinn ëmmer zimmlech hell a fest. Sougenannte Blummen am Glas sinn optesch manner schéin, mee ee Qualitéitsmerkmal, well den Hunneg gutt dréchen ass an sech domat och ganz laang hale kann😎

31/05/2025

Gudde Moien a wëllkomm op eiser Facebook-Säit.

Wien si mir?
Mir sinn de Joé, d'Linn an de Charel vu Nouspelt a mir hunn 2024 onerwaard d'Beienziichterei vum Georges Gidt, dem Linn sengem Papp iwwerholl. Mir hunn de Betrib e bëssen verkléngert, sou dass mir aktuell 22 Beievölker hunn. Eis Beien sinn op 7 verschidden Stänn an der Ëmgéigend verdeelt.

De Joé këmmert sech virun allem ëm d'Beien a péckt iwwerall eng Hand mat un.
D'Linn këmmert sech ëm d'Hunnegproduktioun an alles wat mam Hunneg ze dinn huet.
De Charel huet déi wichtegst Aufgab: den Hunneg schmaachen an derfir suergen, dass et eis net langweileg gëtt 🥰
Natierlech geet dat ganzt net ouni weider Hëllef vun der Famill, wann eng Hand gebraucht gëtt💪

De Betrib ass zanter 2008 op biologesch Beienzuucht ausgeriicht. Wat dat genau heecht, ziele mir an engem vun deenen nächsten Posten☺️