17/12/2025
لاربيكوين، هو صنف إسباني 100٪. وبه تربعت إسبانيا على عرش إنتاج زيت الزيتون في العالم.
هاد النوع مقاوم للأمراض والصقيع وممكن تغرسو فجميع أنواع التربة بما فيها المحجرة.
ممكن تغرس فالهكتار حتى 1300 شجرة، وتقدر تخلي غير 1,5 متر بين الشجرة وأختها، ولكن افضل تخلي 2 متر لأن عرض الشجرة في المعدل هو 1,8 متر والطول ماكايتعداش 2,5 متر.
زيتون كايعتامد شوية على السقي وخصوصا ملي كايبانو الثمار حتى تجني حسب الحرارة رغم أنه كايصبر حتى هو للحرارة ولكن ماخاصش تميك عليه من السقي لأنه ماشي بلدي ولا بوري.
كايولد إبتداءا من السنة الموالية فاش غرستيه، و كايزيد كل عام في الإنتاج حسب التهليا، يعني ماكايعرفش ظاهرة المعاومة يعني عام مزيان وعام ناقص، بالعكس كايزيد عام ورا عام لأنه عندو ميزة تختلف عن باقي أنواع الزيتون وهي التلقيح الذاتي.
العقد الزهرية ديالو كاتصبر للضباب والرياح داكشي علاش كايولد مزيان ولكن ضروري تعاونو وتعطيه مايستحق من أدوية ومكملات غذائية.
الجني ديالو بالمشط أو الآلة ممنوع دوك صحاب العصي لي كايجيو يتكاو على الشجر لأنه ماكايتحملش الجني ديال النفاطة، حيث غاليا الأغصان ديالو متوسطة وفتية.
الحبوب ديالو مدورة والمميز فيها عامرة زيت لأنه زيتون خاص بإنتاج الزيت فقط.
الزيت ديالو شبه منعدمة الحموضة إن لم أقل منعدمة مذاق حلو ورطب، حتى اللون أخضر زيتي.
بالنسبة للناس لي كايقولو الزيت ديالو ماكاتصبرش راهم غالطين وبزاااااف، من أجود أنواع الزيت ولي قابلة للتخزين هي ديال الأربيكوين والأربوسانا والفرونتينو. مذاقها ماكايتبدلش.
بالنسبة للإنتاج إبتداءا من السنة 2 بعد الغرس، ويدخل في الإنتاج الجيد إبتداءا من السنة 5، متوسط عمر الشجرة يتجاوز 50 سنة.
نسيت معدل الزيت في القنطار بين 28 و 30
❤️❤️❤️❤️❤️❤️❤️❤️❤️❤️
