17/05/2026
မပြည့်တဲ့အိုး

_________________
လောကမှာ
မပြည့်တဲ့အိုးတွေက
ဘောင်ဘင်ခတ်တတ်ပါတယ်
လူတစ်ချို့က
ကိုယ့်ကိုကိုယ်အတော်ဆုံးပါလို့ထင်မြင်ပြီး
တစ်ဖက်သားကို အထင်သေးတတ်ကြတယ်

ကိုယ့်ထက် မိုးပျံအောင်
တော်တတ်နေတဲ့သူတွေ တစ်ပုံကြီး
ရှိတယ်ဆိုတာ သိထားဖို့ လိုပါတယ်။
လူတစ်ချို့က
ကိုယ့်ကိုကိုယ်အချမ်းသာဆုံးပါလို့မှတ်ထင်ပြီး
တစ်ဖက်သားကို ချိုးနှိမ်တတ်ကြတယ်

ကိုယ့်ထက်
ကျိကျိတက်ချမ်းသာသူတွေ
ဒုနဲ့ ဒေး ရှိတယ်ဆိုတာ သိထားဖို့လိုပါတယ်
လူတစ်ချို့က
ကိုယ့်ကိုကိုယ် ပြည့်စုံလွန်းသူလို့သတ်မှတ်ပြီး
တစ်ဖက်သားကို နှာခေါင်းရှုံ့တတ်ကြတယ်

ကိုယ့်ထက် ပေါများ
ပြည့်လျှံသူတွေ အမြောက်အများရှိတယ်ဆိုတာ
သိထားဖို့လိုပါတယ်
ဘဝမှာ
လူတိုင်းကတော့
သူ့အရည်အချင်းနဲ့သူရှိကြပါတယ်
ကိုယ့်မှာ မရှိတဲ့အရည်အချင်းတွေ
သူ့ဆီမှာရှိနိုင်သလို
သူ့မှာမရှိတဲ့အရည်အချင်းတွေလည်း
ကိုယ့်ဆီမှာ ရှိနေနိုင်ပါတယ်
ဘာမှမမြဲတဲ့
လောက ဘဝကို
ပုံသေတွက်မထားပါနဲ့
အောင်မြင်ခြင်းနဲ့ ရှုံးနိမ့်ခြင်းဆိုတာ
ခေါင်းနဲ့ပန်းလိုပဲ အနီးဆုံးမှာရှိနေတာမို့
ဘယ်သူကိုမှ အနိမ့်အမြင့် မခွဲခြားသင့်တာ
ကောင်းပါတယ်။
လောကမှာ မပြည့်တဲ့အိုးတွေက
ဘောင်ဘင်ခတ်တတ်ပါတယ်။
