30/06/2026
Гэр бүл, найз нөхөд, хэн нэгэнтэй учрах хувь тохиолыг та хэрхэн хүлээж авдаг вэ?
Санаа нийлэхгүй хүн, тааламжгүй зүйлтэй учрахаараа зугтдаг уу, эсвэл нүүр тулж тэндээс суралцахыг хичээдэг үү?
Энэ талаар нэгийг бодогдуулах нийтлэлийг орчуулснаа хүргэж байна😉
Мөн Японд амьдардаг хүмүүсийн хувьд халууны амралт гэж хэлж заншсан Үрабоны улирал гэж юу болох талаар бяцхан мэдлэг олж авах байх гэж бодож байна🌸
Жич: Үрабоны улирал гэж 7-8 сарыг хэлдэг ба бурхан болоочийн сүнс гэртээ эргэн ирдэг гэж үздэг. Энэ үеэр Япончууд бурхан тахилдаа арц хүж уугиулж, идээ будаа өргөж бурхан болоочдоо хойтын буяны үйлийг үйлдэж, булшийг нь эргэж угааж цэвэрлэдэг заншилтай.
Учрах хувь заяа
"Учралыг байгаагаар нь хүлээж авах"
Хань минь буцаж ирлээ
Хамтдаа Үрабоны сарыг ширтэн сууя
(Мори Сүмио)
Энэ шүлэг бол Үрабоны сар эхлэх орой бурхан болооч эхнэрийнхээ сүнсийг гэртээ угтан авч, хамтдаа ширтэн харах сар юутай гунигтай бас үзэсгэлэнтэй вэ гэсэн утгатай. Мөн “Би ичих зүйлгүй нүүр бардам амьдарч байгаа тул надад санаа битгий зовоорой” хэмээн шивнэж буй мэт санагдана.
Эхнэр нөхөр шиг гүнзгий хувь заяагаар холбогддоггүй юмаа гэхэд бид хүмүүсийн учрал холбоон дунд амьдардаг жамтай. “Нингэн” буюу хүн гэдэг үг “хүн” ба “хоорондын холбоо” гэсэн хоёр ханз үсэгнээс бүрддэг нь хүн өөр хэн нэгэн, аливаа юмстай холбогдон амьдардаг болохыг илэрхийлнэ. “Амьдрал бол учрал” хэмээх үг ч байдаг.
Гэхдээ бусдыг үзэн ядах, атаархах гэсэн хэцүү учрал ч байна. Тэгж их шаналдаггүй юм аа гэхэд хүн хүний амьдрал, үзэл бодол өөр учраас таарч тохирохгүй хүнтэй учрах тохиолдол ч хүний амьдралд их бага хэмжээгээр байна. Тийм үед жишээлбэл “Энэ хүнтэй нэг л таарахгүй юм байна” гээд бодчихоор тэр хүнээс зайгаа баримаар санагддаг. Харин миний хувьд яагаад ч юм “Энэ хүн надад байхгүй зан чанартай сонирхолтой хүн шиг байна”, “Ийм харах өнцөг бас байдаг байх нь ээ” гэж хүлээж авах нь их байсан болов уу.
“Ханцуй шүргэлцэх нь ч гэсэн хувь заяа” хэмээх зүйр үг, бурхны сургаалд бол “Уулзаж учирсан, зэрэгцэн суусан хүмүүс урд насны 500 төрөлдөө учирч байсан хувьтай хүмүүс” гэсэн сургаал бий. Өөрөөр хэлбэл зам дээр санаандгүй таарсан хүнтэй хүртэл урд насны гүнзгий учралаар холбогдсон байдаг гэсэн үг. Тиймээс алив учрал тохиолыг өөрийнхөө үзэл бодлоор сайн, муу гэж харах нь хайран буй за.
Яруу найрагч агсан Таникава Шинтароо гуай (1931–2024) “Хүмүүсийн ачаар би өөртэйгөө ч учирсан” гэж хэлсэн байдаг. Учралаар дамжуулж бид өөрөө анзаараагүй өөрийнхөө өөр нэг талыг олж харах, эсвэл өөрөөсөө өөр санаа бодолтой хүнээс сурч, өөрийгөө хурцалж сайжруулах үе ч байна. Хүний мөн чанараа сайжруулахад үзэл бодол нийлдэг ба нийлдэггүй хүн аль аль нь тэнцүү байх чухал гэдэг. Тэр утгаараа учралыг байгаагаар нь хүлээн авч, ямар ч хүнтэй нүүр тулж чаддаг болох юм бол амьдрал илүү баялаг болох биз ээ.
"Яван одсон хүмүүстэйгээ дахин учрахуй"
Мэдээж хэрэг тааламжгүй зүйл, дургүй хүнээ байгаагаар нь хүлээж авна гэдэг амаргүй. Гэхдээ азаар бид бурхны сургаалтай учирч, хүнийг ч, аливаа зүйлийг ч харьцангуй байгаагаар нь хүлээж авч чаддаг болсон. Өөрт тааламжгүй зүйлтэй нүүр тулсан үедээ, энэ учрал надад юуг зааж сургаж байгаа юм бол, энэ яагаад надад тааламжгүй санагдаж байгаа юм бол, одоо юу хийх хэрэгтэй болохыг тайван эргэцүүлэн бодохыг буддын сургаалд заан сургадаг. Аливаа зүйлийг байгаагаар нь хүлээж авдаг болоход ийнхүү дотоод сэтгэл рүүгээ өнгийн харах дадал зуршил чухал.
Мөн сайн бодоод үзэх юм бол ялангуяа хэн нэгэнтэй учрах учрал нь олон янзын шалтгаан, хүчин зүйлүүд давхардсаар бий болдог гайхамшигтай зүйл. Толь бичигт “хувь заяа” гэдэг үгийг “хүмүүсийг холбох хүний хүч чадлаас хэтийдсэн гайхамшигтай хүч энерги” гэж тайлбарласнаас үзвэл хүмүүс ямар нэгэн хүчний нөлөөгөөр шаардлагатай болоод л учирдаг болж таарч байгаа юм. Тэгэхээр эхнэр нөхөр, эцэг эх хүүхэд, ах дүүс, эгч дүүс төдийгүй учирсан бүх хүмүүстээ “бидэнд учрах хувь заяа байжээ” хэмээн талархан хэлж, инээмсэглэсэн сайхан харилцаатай байх нь зүйтэй ба энэ нь бүх зүйлс хоорондоо харилцан холбоотой гэж сургадаг буддын шүтэн барилдлагын сургаалын дагуу амьдарч байна гэсэн үг болно.
Удахгүй болох Үрабоны үеэр бид эцэг өвгөд, тэнгэрт одсон гэр бүлтэйгээ уулзана. Өнгөрсөн цаг үеэ эргэн дурсаж, чин сэтгэлээсээ “бид учрах хувь заяатай байжээ” хэмээн талархлын сэтгэлээ илэрхийлж, тэднийхээ өмнө нүүр бардам зөв амьдрахыг чин сэтгэлээсээ хүсэж байна.
RKK Buddhist movement,
Presedent Niwano Nichikoo
Орчуулагч: Ж.Гэрэлтуяа
