04/07/2025
Gwamnan kano ya nada ɗan gwagwarmaya, Dakata a matsayin shugaban sabuwar hukumar kula da tallace-tallace
Gwamnan Jihar Kano, Alhaji Abba Kabir Yusuf, ya amince da nadin Kabiru Saidu Dakata a matsayin Darakta Janar na Hukumar Tallace-Tallace da Allunan Talla ta Jihar Kano (KASA).
Kafin wannan sabon nadin, Dakata shi ne Darakta Janar na Cibiyar Wayar da Kan Jama’a kan Adalci da Gaskiya (CAJA).
KASA na daga cikin sabbin hukumomi guda huɗu da gwamna Yusuf ya amince da su domin ƙarfafa manyan cibiyoyi da kuma inganta ayyukan gwamnati a faɗin jihar.
Wannan na kunshe ne a cikin wata sanarwa da mai magana da yawun gwamnan, Sunusi Bature Dawakin-Tofa, ya fitar a ranar Juma’a.
Ga jerin sabbin shugabannin da matsayinsu kamar haka:
Dr. Bashir A. Muzakkar – Darakta Janar, Hukumar Bunƙasa Fasahar Sadarwa ta Jihar Kano (KASITDA).
Kabiru Saidu Dakata – Darakta Janar, Hukumar Tallace-Tallace da Alamomi ta Jihar Kano (KASA).
Dr. Fatima Abdul Abubakar (Amneef) – Darakta Janar, Hukumar Kariya ga Jama’a ta Jihar Kano (KASPA).
Engr. Isyaku Umar Kwa – Mataimakin Manajan Darakta, Hukumar Gidaje ta Jihar Kano.
Hamisu Musa Gambo Danzaki – Babban Sakataren Hukumar Tallafin Karatu ta Jihar Kano.
Barr. Isma’il Nasarawa – shugaban Cibiyar Yaƙi da Cin Hanci.
