28/05/2026
Dei 15 som var med Flora Turlag til Selje onsdag og torsdag denne veka hadde ei flott oppleving. Ekspressbåten frakta oss sytalaust frå Florø til Selje der vi etter rask innkvartering i den gamle prestegarden og ei rorbu tok beina fatt opp dei bratte trappene til dagsturhytta Sjøglytt. Den ligg rett ovanfor Seljebygda og gir utsyn utover Stadlandet, og øyane Selja, Barmen og Silda og havstykket Sildegapet. Men vi skulle vidare mot høgste punktet på Stadlandet, Tarvaldsegga. Stien går ganske slakt eit godt stykke og er tørr og fin med treflis i våte parti lagt på av dugnadsgjeng frå bygda. Det siste bratte stykket opp mot toppen på 645m har sherpaer bygd nærare 600 steintrinn av stein henta på staden og med steghøgde som passa oss utmerka. Vel oppe såg vi vidt mot kjende og ukjende landemerke, og skoddedotten som låg rundt toppen då vi gjekk i land, hadde forvunne bakstaveleg tala som " dugg for solen."
Vi var også så heldige at vi hadde følgje av Torkjell Djupedal, forfattaren av dei kjende Opptur-bøkene og med sterke anar til området. Han kunne det meste som er verdt å vite om historia og geografien til Selje og omlandet. Vel nede att etter mange steg og med litt møyre bein, venta det middag i Frimannsbua med torsk på tallerkenen.
Etter påfølgjande quizz og drøs på prestegarden, tok vi natta mot neste dag som var avsett til å utforske historia og topagrafien til Selja, den myteomspunne heilage øya som ein gong låg sentralt plassert mot Nordsjøen og ferdselvegane. Tida då Selja var bispesete med benedikterkloster gir restane på vestsida av øya handfaste bevis på, men sagnet om St. Sunniva den irske prinsessa som tok landnåm med sine seljumenn, kan ikkje bevisast vere meir enn eit sagn, sjølv om vi fann både vasskjelda og berghola der St. Sunniva døydde. Djupedal som også var med oss denne dagen, fortalde levande om alt dette. Frå klosterruinane og St.Sunniva-hellaren vende vi heimover, nokre langs sjøen rundt øya og dei andre opp bratta frå hellaren og over øya der ein skyssbåt tok oss attende til Selje og ekspressbåten like etterpå heimatt til Florø. Dette vart ein innhaldsrik tur med påfyll av gode opplevingar for alle, så då gjenstår det berre å seie tusen takk for ein kjempefin tur i godt lag.
