27/05/2026
आजको समयमा केही व्यक्तिहरूले सेवकाइको नाममा व्यक्तिगत फाइदा, पैसा सङ्कलन, घमण्ड, देखावटीपन र गलत जीवनशैली अपनाएको देख्दा धेरै विश्वासीहरूको मन दुखेको छ। तर बाइबलले स्पष्ट भन्छ— साँचो सेवकाइ भनेको नाम, पैसा र प्रतिष्ठाको लागि होइन, प्रेम, नम्रता र सत्यको लागि हो।
जो व्यक्तिले सेवाको नाममा मानिसहरूलाई प्रयोग गर्छ, पैसा मात्रै खोज्छ, अरूलाई हेप्छ, रक्सी तथा गलत बाटोमा लागेर पनि आफूलाई अगुवा भन्छ, त्यस्तो जीवनले ख्रीष्टको चरित्र देखाउँदैन। वास्तविक क्रीस्चियन सेवक त त्यही हो जसले दुःखीको आँसु पुछ्छ, सत्य बोल्छ, नम्र रहन्छ र परमेश्वरको डरमा हिँड्छ।
बाहिरबाट ठूलो भवन, ठूलो कार्यक्रम र मिठो बोली देखिए पनि भित्र सत्यता, पवित्रता र प्रेम छैन भने त्यो सेवकाइ केवल नाटक बन्न सक्छ। येशूले पनि कपटी धर्मगुरुहरूलाई सचेत गराउँदै भन्नुभएको थियो कि मानिसले बाहिर देखावटी धर्म देखाउन सक्छ, तर हृदय परमेश्वरले देख्नुहुन्छ।
त्यसैले सबै अगुवालाई एउटै दृष्टिले दोष दिनुभन्दा सत्य र असत्य छुट्याएर हिँड्नु आवश्यक छ। अझ आज विश्वासीहरूले आँखा बन्द गरेर पछ्याउने होइन, बाइबल, चरित्र र व्यवहार हेरेर चिन्ने समय आएको छ।
“फलबाट मानिस चिनिन्छ” भन्ने कुरा आज झन् सान्दर्भिक भएको छ। साँचो सेवकाइमा घमण्ड होइन नम्रता हुन्छ, स्वार्थ होइन बलिदान हुन्छ, पैसा होइन आत्मा बचाउने तड्प हुन्छ।
