07/04/2024
पिँजडा भित्रको पन्छी
युद्ध मैदानमा शस्त्र उठाउनै लाग्दा ,
मेरा कृष्णहरूले मलाई रोके ।
समाजमा फैलिएको अधर्म विरूद्ध लड्नै लाग्दा ,
मेरा कृष्णहरूले मलाई रोके ।।
ठीकै छ ,
चाहिएन कोहि कृष्ण पनि ,
यी कृष्णहरूलाई पनि कलिले घेरिसके ।
आजका कृष्ण पनि अधर्म विरूद्ध लड्न डराइसके । ।
म द्वापरको अर्जुनभन्दा ,
यसै कमजोर ,
कलियुगको अर्जुन ,
लड्न खोज्दा खोज्दै पनि ,
उठाएको शस्त्र पनि छोड्न पुगे । ।
अब अर्जुन होइन ,
बुद्ध भन्छु भन्दा पनि ,
कलियुगको पूँजिवादभन्दा पर भाग्न गया भेटिन ।
आफ्नै गया बनाउँछु ,
सोच्दा पनि ,
कलियुगका पालहरूबाट बच्न सकिन । ।
घोडचढी आएन ,
तरवार चलाउन आएन ,
कलियुगमा बुद्ध होइन ,
अर्जुन पनि होइन ,
कृष्ण पनि होइन ,
कलि बन्छु भन्दा पनि ,
म रोकिए ,
सायद कृष्णले ममा बास गर्न चाहेनन् ।
सायद महादेवले कृपा गर्न सकेनन् ।।
म अन्तत ,
एउटा पिँजडाभित्रको पन्छी बन्न पुगे ,
जो पिँजडासँगै उड्न सक्छ ,
तर पिँजडाबाहिर जान सक्दैन ।
म बने एउटा पिँजडा भित्रको पन्छी ,
जो पिँजडासँगै उड्न त सक्छ
तर पिँजडाबाहिर जान सक्दैन । ।
(आसोज ०२, २०७५)
डाक्टर मुकुल ढकाल। राष्ट्रिय स्वतन्त्र पार्टी
