26/12/2024
Madalas na talaga matulugan ang TV. Matanda na talaga si Tatay.
Isang beses, Sabado, bandang hapon, kauuwi ko lang galing sa paglilipat ng tali ng kalabaw. Nadatnan ko ang TV, bukas, wala naman nanonood.
Uy! Chinese.
Pero Tagalog-dubbed.
Ang pangalan ng channel ay Celestial Movies Pinoy. Ang pinapalabas ay 1921, tungkol sa rebolusyon ng Tsina.
May isang karakter doon, magsisindi lang ng sigarilyo sana sa rooftop, kaso biglang nagngalit noong nakita 'yung posporo. Sa isip-isip niya, lintik ang lawak ng Tsina pero inaangkat pa rin nila ang posporo. Basta matindi 'yung eksena. Matindi kasi napapayosi ako. Kumuha ako ng isang stick sa smuggled na kaha ng sigarilyo ng Tatay, tapos sinindihan ko gamit ang lighter niyang Hong.
Napaisip din ako nang matagal.
