28/04/2026
آج ہی کے دن 28 اپریل 1936ء کو ''ابتداء ہے ربِ جلیل کے بابرکت نام سے، جو دلوں کے بھید جانتا ہے... دیکھتی آنکھوں سنتے کانوں کو طارق عزیز کا سلام!' جیسے یادگار جملوں سے 45 سال تک 'نیلام گھر شو کا آغاز کرنے والے پی ٹی وی کے پہلے مرد اناؤنسر طارق عزیز تاجِ برطانیہ کے ماتحت ہندوستان کے غیر منقسم صوبہ پنجاب کے شہر جالندھر میں پیدا ہوئے۔ ان کے والد میاں عبدالعزیز ''پاکستانی'' تحریکِ پاکستان کے پُرجوش کارکنان میں سے تھے.
قیامِ پاکستان کے ساتھ ہی طارق عزیز اپنے والدین کے ہمراہ ہجرت کرکے ساہیوال آگئے اور ابتدائی تعلیم بھی یہیں سے حاصل کی۔
طارق عزیز نے اپنے فن کا سفر ریڈیو پاکستان سے شروع کیا اور جب پاکستان میں ٹیلی ویژن نشریات کا آغاز ہوا تو وہی پہلے میزبان کے طور پر اسکرین پر نظر آئے۔
طارق عزیز ایک مایہ ناز کمپیئر ہونے کے ساتھ ساتھ ایک بہترین اداکار بھی تھے۔ 60 اور 70 کی دہائی میں انہوں نے کئی ہٹ فلموں میں کام کیا۔ جن میں انسانیت, سالگرہ, قسم اس وقت کی، کٹاری، چراغ کہاں روشنی کہاں، ہمراز, زندگی, ہار گیا انسان, کبڑا عاشق, نشانی، مس ہانگ کانگ, ماں بنی دلہن جیسی معیاری فلمیں بھی مرحوم طارق عزیز کے کریڈٹ پر ہیں۔
صدر آصف علی زرداری نے بھی ایک فلم میں طارق عزیزکے ساتھ ایک چائلڈ ایکٹر کی حیثیت سے ہیرو (وحید مراد) کے بچپن کا کردار ادا کیا تھا۔
طارق عزیز قلم کار اور شاعر بھی تھے۔ انھوں نے کالم نویسی کی اور اسکرپٹ بھی لکھے۔ انھیں بے شمار اشعار بھی ازبر تھے۔ کالموں کے ایک مجموعے بعنوان داستان کے علاوہ ان کی پنجابی شاعری کا مجموعہ ہمزاد دا دکھ بھی شایع ہوچکا ہے۔
ان کی خدمات کے اعتراف میں تمغہ حسن کار کردگی سمیت متعدد ایوارڈز سے بھی نوازا گیا۔
طارق عزیز نے سیاست میں بھی حصہ لیا اور 1997ء میں اپنے مدِمقابل عمران خان نیازی کو شکست دی تھی اور قومی اسمبلی کے رکن منتخب ہوئے تھے۔
17 جون 2020 کو طارق عزیز حرکت قلب بند ہونے سے لاہور میں انتقال کر گئے تھے اور انہیں ہزاروں سوگواروں کی موجودگی میں گارڈن ٹاؤن لاہور کے قبرستان میں والدہ کے پہلو میں سپرد خاک کیا گیا تھا.
ٹیم صدائے پشاور محترم طارق عزیز صاحب کیلئے دعاگو ہے کہ الله پاک انکی مغفرت فرمائے۔ آمین
اس طرح کی مزید معلوماتی تحریروں کیلئے ہمارے
فیس بک پیج صداِئے پشاور کو فالو کریں ہماری پوسٹوں کو لائک اور شیئر کریں۔ شکریہ
