06/06/2026
Date 04-06-2026
سنڌ اسيمبلي جي قائمه ڪاميٽي براءِ داخلا جي اجلاس ۾ امن امان ۽ منشيات جي خاتمي بابت اهم جائزو
ڪراچي: سنڌ اسيمبلي جي قائمه ڪاميٽي براءِ داخلا جو اجلاس ليڊزونگ اڳواڻ ميڊم فريال ٽالپر جي صدارت هيٺ منعقد ٿيو، جنهن ۾ صوبي ۾ امن امان جي صورتحال، منشيات جي خاتمي ۽ گٽڪا ۽ ماوا خلاف جاري ڪاررواين جو تفصيلي جائزو ورتو ويو.
اجلاس دوران منشيات فروشن خلاف وڌيڪ سخت ۽ اثرائتا قدم کڻڻ، ريهيبليٽيشن سينٽرن جي تعداد ۽ سهولتن ۾ واڌ آڻڻ، ۽ لاڳاپيل ادارن وچ ۾ بهتر رابطي ۽ هم آهنگي کي يقيني بڻائڻ تي زور ڏنو ويو.
ان موقعي تي فريال ٽالپر چيو ته منشيات هڪ سنگين سماجي ناسور آهي، جنهن جي خاتمي لاءِ حڪومت، قانون لاڳو ڪندڙ ادارن ۽ سماج جي گڏيل ۽ مسلسل ڪوششن جي ضرورت آهي. هن چيو ته نوجوان نسل کي منشيات جي تباهه ڪار اثرن کان بچائڻ لاءِ هر ممڪن قدم کنيو ويندو.
اجلاس ۾ سنڌ جي گهرو ۽ قانون واري وزير ضياءَ الحسن لنجار، ايڪسائيز، ٽيڪسيشن، نارڪوٽڪس ڪنٽرول مڪيش ڪمار چاولا ۽ سوشل ويلفيئر کاتي وزير مير طارق ٽالپر صوبائي وزيرن سميت تعليم واري وزير سيد سردار علي شاهه، قائمه ڪاميٽي جي ميمبرن سهيل انور سيال، قاسم سومرو سعديه جاويد ۽ سيد ميان حاجي محمد حسن شاه سينئر اسپيشل سيڪريٽري سنڌ اسيمبلي شرڪت ڪئي.
خصوصي شرڪت ڪندڙن ۾ قومي اسيمبلي جا ميمبر عبدالقادر پٽيل، نبيل گبول، آغا رفيع الله، مير غلام علي ٽالپر، شرميلا فاروقي ۽ حڪيم بلوچ شامل هئا.
ان کان علاوه ڪراچي جي ميئر مرتضيٰ وهاب، سينيٽر ضمير گھمرو، سينيٽر سرمد علي ۽ سينيٽر پونجو ڀيل پڻ اجلاس ۾ شريڪ ٿيا.
