04/06/2026
مورو: صرافه بازار ۾ سونارن جو ايس ايڇ او مورو خلاف احتجاج، شاهي بازار بند
رپورٽ: عرفان عادل
مورو شھر جي صرافه بازار ۾ سونارن پاران ايس ايڇ او مورو امتياز علي کھاوڙ خلاف احتجاجي مظاهرو ڪيو ويو.
احتجاج ڪندڙن جو چوڻ هو ته گذريل ڏينهن وچ بازار ۾ سندن نوجوان شعبان علي پيرزادو جي دڪان تي عابد پيرزادو ويھ کان وڌيڪ هٿياربند ماڻهن سان گڏجي حملو ڪيو، جتي مبينا طور دڪان اندر موجود سونا زيور ۽ نقد رقم کڻي ويا.
سونارن الزام هنيو ته واقعي جو ڪيس مورو ٿاڻي تي داخل ٿيڻ باوجود ايس ايڇ او مورو امتياز علي کھاوڙ جوابدارن کي گرفتار ڪرڻ بدران مبينا طور رشوت وٺي آزاد ڪري ڇڏيو آهي.
احتجاج کانپوءِ شاهي بازار مورو جا سمورا دڪان بند ٿي ويا، جڏهن ته شهر اندر خوف ۽ بيچيني واري صورتحال ڇانيل رهي. احتجاج ڪندڙن اعليٰ اختيارين کان واقعي جو نوٽيس وٺي جوابدارن جي گرفتاري ۽ شفاف جاچ جو مطالبو ڪيو
