09/03/2025
اے شام ݙکھ دی جو ڈھل ونڄے ہا
تاں مسئلہ سارا تھی حل ونڄے ہا
تیݙے رسیمے وی مک ونڄن ہا
مزاج ساݙا جے رل ونڄے ہا
پیا ہا ویندا اساں نی روکا
ولاوے ہا دل تے ول ونڄے ہا
سکون دے نال سم ونڄوں ہا
اے ہجر ساتھوں جے ٹل ونڄے ہا
وسم نی سڳدا اے عمر ساری
جو پیار دا ݙیوا ٻل ونڄے ہا
میں ݙکھ نی ݙیندا جو رو پیا تاں
اوں اکھ دا سارا کجل ونڄے ہا
ہجر دے حق وچ دعا کرو چا
جو اے نہ ہوندا بدل ونڄے ہا
ہے لکھ شکر کہ میں بچ ڳیا ہاں
جو عشق تھیندا عقل ونڄے ہا
اے ݙیویں ارباز کوں سنیہا
غزل سݨاوے ہا کل ونڄے ہا
*******************🌹🌹🌹🌹🌹❤️❤️
