18/07/2025
Wasiirka Amniga Gudaha ee Dowladda Koonfur Galbeed, Mudane Xasan Cabdulkadir Maxamed, ayaa maanta si rasmi ah ugu soo xiray magaalada Baydhabo Tababar muhiim ah oo ku saabsan maareynta saldhigyada booliska, kaasoo loogu talagalay taliyeyaasha iyo taliye ku-xigeennada ciidamada booliska.
Tababarkaan oo ay soo qaban-qaabisay Wasaaradda Amniga Gudaha Koonfur Galbeed, ayaa waxaa ka qeyb galay Agaasimaha Guud ee Wasaaradda, Mudane Maxamed Yaasin Cabdullaahi, taliyeyaasha booliska iyo mas’uuliyiin kale oo ka tirsan laamaha ammaanka.
Ujeeddada tababarka ayaa ahayd in kor loo qaado aqoonta, xirfadda iyo hannaanka hoggaamineed ee taliyeyaasha iyo ku-xigeennadooda, si ay ula jaanqaadaan xaaladaha amni ee casriga ah, una gutaan waajibaadkooda si hufan oo xirfadaysan.
Taliyaha qeybta booliska gobolka Baay, Gaashaanle Sare Amiin Mad Daruur, iyo Taliyaha Saldhigga Booliska degmada Baydhabo, Mukhtaar Dubadow, ayaa sidoo kale ka qeyb qaatay tababarka, iyagoo muujiyay muhiimadda ay u leedahay sare u qaadista tayada hoggaanka booliska heer gobol iyo degmo.
Ugu dambeyn, Wasiirka Amniga Mudane Xasan Cabdulkadir Maxamed ayaa la dardaarmay saraakiisha ka qeyb gashay Tawabarka, isagoo ku dhiirrigeliyay in ay ka faa’iideystaan aqoonta ay helaan, una adeegsadaan horumarinta ammaanka iyo u adeegidda bulshada si daacadnimo iyo karti leh
