01/07/2026
Xalay waxaan booqasho sharaf iyo macsalaamayn ugu tagnay Madaxweyne Axmed Cabdi Kaariye (Qoorqoor), annagoo gudanayna waajibka iyo maamuuska uu dhaqanka wanaagsan ee Soomaaliyeed uu farayo in loo muujiyo hoggaamiye xil ummadeed soo gutay. Waxaan uga mahadcelinnay dedaalkii iyo shaqadii uu u soo qabtay shacabka iyo Dowlad-Goboleedka Galmudug muddadii uu xilka hayey, annagoo qirsan in hoggaamintu ay tahay masuuliyad culus oo u baahan samir, dulqaad iyo garasho.
Waxaan si gaar ah ugu bogaadinayaa bisaylkii siyaasadeed iyo tanaasulkii uu u muujiyey danta guud ee Galmudug. Dhaqanka Soomaaliyeed wuxuu ina barayaa in hoggaamiyaha wanaagsani yahay kan maslaxadda ummaddiisa ka hormariya dantiisa gaarka ah, kana shaqeeya midnimada, nabadda iyo wadajirka bulshada. Taasina waa dhaqan mudan in la xuso lana qadariyo.
Ugu dambayn, waxaan Alle SWT uga baryayaa inuu ka abaalmariyo wixii khayr ahaa ee uu u qabtay shacabka reer Galmudug, kuna gallado caafimaad iyo kheyr. Sidoo kale, waxaan Alle ka baryayaa inuu Galmudug ku sugo nabad waarta, midnimo iyo horumar, isla markaana waafajiyo cid kasta oo xilka loo dhiibo inay danta shacabka iyo tan deegaankaba ka hormariso wax kasta oo kale.
Suldaan Cabdinaasir Jaamac Seed
Suldaanka Guud ee Beesha Sacad
