مزرعة المنار

05/05/2026

مزرعة المنار أصل تجاري للبيع، مشروع مربح جدا و يضمن العيش الكريم للي يحب يخدم على روحو، ( ايه كيف هو مربح علاش تبيع فيه سااااحبي ؟؟ ) نقلك خويا المحترم كانك ناوي عالخير و تحب تشري تفضل حذا خوك و نجاوبك على أسئلتك الفلسفية لكل 🙂 و نزيدك حاجة أخرى، أنا ما نخليكش تشري قطوس في شكارة 😉 للي يحب يشري الحانوت موجودة على ذمتو يبقى فيها قد ما يحب 10 أيام، 20 يوم... هانو يشوف الخدمة على عينيه و يعرف الحانوت اش يدخل و اش يخرج.. و ليطمئن قلبه و نكونو اعملنا الي علينا قدام ربي 🙂
هذا الرقم خويا 29.428.578
الحانوت موجودة وراء مغازة عزيزة و مقابلين ديار القضاة
و نشالله تكون من نصيب إنسان يحب يخدم على روحو🤲. شكرا

25/04/2026

21/03/2026

صباح الخير 🙂 و نشالله عيدكم مبروك 🥳 اليوم محلولين و عنا:
كبدة دجاج
مرڨاز
شرائح داند مفوح
Escalope panne
Cordon bleu
Boulette fromage
Chiken nuguetts
Crokis
Kwika
Jambon
Salami
الي مستحق حاجة مرحبا بيه ☺️

10/03/2026

صحة شريبتكم، .قوس باش نحلوه و نسكروه فيساع، و فما شهادة و كلمت حق لازم تتقال، بروفيل مضروب باسم أميرة سايحي مهبط تصاور و يقول بلي شرا حلو من عند حلو دمق القصرين و طلع مصوف كيف ما في التصويرة !!!! الهدف من هذا لكل هو ضرب ماركت حلو دمق في القصرين الله اعلم شكون المستفيد !!!! المنافسة في مجال صناعة الحلو موجودة في القضرين اما لازم تكون منافسة شريفة موش منافسة امسخة بالطريقة هاذي، تلفيق و كذب و تهم واهية !!! نتصور الي خلاها تصور السلعة الفاسدة يخليها تصور الباكو مكتوب عليه حلو دمق ولا حتى تيكاي متاع الكاسة الي تلسق على الباكو... لخرة هكا نصدقوا بلي هذاكا حلو دمق بالحق !!!! موش تمشي دبر طرف حلو فاسد و تصوروا و تتهم فيه ماركة معروفة في تونس كاملة، اتقوا ربي في هالعواشر

31/12/2025

مزرعة المنار تتمنالكم عام سعيد ✨🥳✨🤩✨

31/12/2025

هاذم أسوام المرشي في الڨصرين، لا حسيب و لا رقيب !!!!! أسوام يااااسر غالية في حين إنو السوم ينجم يكون أقل برشا من هكا !!!!
نهار كيف ما ليوم في عوض نعاونوا بعضنا باش الناس لكل تخلط تقضي و تشري و تفرح الصغيرات... الله غالب نلقاو العكس التاجر يستغل المناسبة هاذي و يرفع فالأسوام دون مراعات العرف التجاري !!!

31/12/2025

هاذم الصور من صفحة راديو سيليوم فم مشكورين على المجهود إلي يعملوا فيه فماشي ما المواطن يفهم... الصراحة بدون تعليق... !!! تو نخلي التعليقات ليكم أنتم.... !!!
يا ولادي خافوا على صحتكم و صحة صغاركم و ما بقيتش تشري دجاج كان من نقاط بيع الأصلية للشركة، مزرعة، مليحة، شهية،... مشالله الڨصرين فيها برشا مزارع نظيفة... بصراحة ما لقيت ما نحكي و المشكل حتى الأسوام غااالية...

15/12/2025

صباح الخير، نحب نعلم حرفائنا الكرام إنو باش نحبسو عملية التعامل بالطلوق (الكريدي) آخر شهر هذا نشالله، و الأسباب عديدة و أهمها الحسبة كبرة برشا و مانيش باش نحشم باش نقول أرقام، البارح حسبت نلقاهم 6.800 د، و المشكل أنو الحريف مع إحترامي ليه موش منظم في الخلاص، شهر يخلصك نهار 6 و شهر يخلصك نهار 15 و شهر ما يخلصكش, و بعد كيف تكبر الحسبة مثلا من 400 د يجي يخلصك 220 د و بعد يزيد يقضي كريدي و يواصل، يمكن تواتي شهر و لا اثنين غصرة و نهزوا بعضنا اما موش على طول العام هكا !!! و لذى نطلب السماح من الحرفاء متاعنا و بكل لطف الي عندو حسبة ماذابيا يخلصها من هنا لآخر شهر ديسمبر، منغير حساسية و بكل ود و محبة نحنا زادة خواتكم و ما ترضاش أنو باب رزق ناس تاكل منو في الخبز يتسكر خاطر انت ما حبيتش تخلص، و مرة أخرى ما نحب حد يتغشش و كل واحد يخلي روحو في بلاصتي تو يفهم. شكرا ♥️

04/12/2025

نحب نحكي شوي على الناس الي كلمتني باش يجي يشوف المزرعة و يحب يشري، نحب نعرف علاش جاي تحكي معايا و انت حاطط في راسك اني مخنوق و تبدا تسوم فيا بأبخس الأسوام !؟؟ و إلا جاي و حاطط في مخك و مقتنع اني نحب نبيع خاطر الحانوت ما تخدمش !!!!! و يبدا يناقش فيا و بكل وقاحة !!! هههههه أنا نقلو يا ولدي هاهم الفاتورات متاع شركة المزرعة موش جايبهم من الشارع شوف الحانوت شنيا يخدم و يدور فلوس و الحمد لله و هو يقلي لا أنا نعرف هههههه !!! مالا علاش تحب تبيع ؟!!!! أنا نحب نبيع لأسباب شخصية موش لازم عليا كل واحد نحكيلو اش صار عليا و علاش نحب نبيع، عندك حانوت نظيف ماتريال جديد صمعة المحل طيبة جدا و الحمد لله فما فاتورات كل شهر محسوببن، يجا تفضل حذانا و ابقى قد ما تحب في الحانوت و احسب معايا الكاسة اخر الليل و شوف المدخول قداش على عينك.... أكثر من هكا وضوح و صراحة !!!! و فما زادة الي كيف تقلو انت شنيا طالب سوم المزرعة يجاوبني ماهو نمشي للمزرعة تعطيني ماتريال و نحل نخدم وحدي تتكلفلي ارفق !!! خويا راك غالط المزرعة ما تعطيش ماتريال راهي و فكرتك غالطة، ماتريالك تشريه وحدك و حانوتك تصرف عليه وحدك و شركة المزرعة تجيك و تشوف المحل و الماتريال و تعمل دراسة و زيد تخمم تعطيك كود ولا خاطر باش تعطيك اسمها تخدم بيه موش بلاش، و ماتريال كامل متاع مزرعة توا يتكلف فوق 25 مليون و زيدهم تلفزة و كليماتيزور و طارمات و راس مال تلقى روحك تكور في 40 مليون، ملخص الهدرة و الموضوع ربي في كتابو الكريم قال «ولا تبخسوا الناس أشياءهم» عيب كيف تجي لانسان تحب تنحيلو حاجة تسوا برشا فلوس بأبخس الأثمان، هاذيكا لا تتسمى تجارة و لا حرفة، بلوغتنا نقولو ذبحة، راهو عيب، انا عندي عام توا ملي هبط المزرعة للبيع و شفت العجايب و الغرايب في الناس، المزرعة تخدم و لله الحمد و توا عنا عام ملي نحبوا نبيعوا ما سكرناشي حتى نهار، كان جاء مشروع مفلس راهو سكر ما يصبرش و بل بالعكس باش نزيدوا نطوروا و ندخلو دجاج روتي و مشوي و الحمد لله، طولت عليكم برشا بالحديث أما.القلب معبي الله غالب، شكرا 🙂♥️