12/07/2026
📌 توضيح باش نتفادى نفس الأسئلة المتكررة كل نهار:
برشا يسألوني على دقيق القمح، :
"علاش السوم هكا؟"
"شنوه اسمو القمح؟
ياخي قمح بالنخاله؟
ياخي قمح فارينة ؟"
باهي، القمح الكل قمح. الفرق يكون في الصنف وطريقة الرحي.
من سنوات، كان فما قمح الفارينة، وكان فما القمح الصلب بأصناف معروفة كيف: جناح الخطيفة، المحمودي، بوعوجة، صوابع علجية، البيدي وغيرها... أما اليوم أغلب الأصناف هاذي ولات نادرة، وحتى إذا تلقاها، الويبة توصل لسوم مرتفع برشا. وإحنا نشريو من الفلاحة، وإذا ما نلقاوش نمشيو للأسواق ونشريو بالكميات الموجودة، وما نلعبوش لا في الجودة ولا في السوم.
أما بالنسبة للنخالة، بكري كان الرحي بالرحى العربي ولا بالحجر، وكانت النخالة تتنحى. أما اليوم، ومع تطور طرق الرحي، برشا ناس ولات تفضل القمح الكامل لأن النخالة تبقى فيه وتترحى مع الدقيق، لذلك تلقى الدقيق لونو وقوامه مختلف، وهذا شيء عادي.
وزيد رحي القمح موش عملية سهلة:
✅ يتجلوج.
✅ يتغسل.
✅ يشيح أيام.
✅ يتجرول.
✅ يتنقى مرة واثنين.
✅ يتغربل.
وبعدها فقط يكون جاهز للرحي.
وزيد القمح الموجود اليوم أغلبه قمح صلب، لذلك رحيه أصعب من قمح الفارينة القديم ويتكلف عليا وحتى صاحب الطاحونة ياخذ وقت في رحيانو ، وعندو الحق خاطر الخدمة فيها تعب وسخانة.
أنا الحمد لله عندي سنين نبيع في دقيق القمح الكامل، ونخدم بنفس الطريقة وبنفس الجودة. وإذا تشوف السوم غالي، جرّب دبر القمح وحدك، وقوم بالمراحل الكل، وبعدها احكم.
وزيد معلومة أخيرة:
برشا يبيعو بسوم أرخص، أما للأسف بعضهم يزيد السميد مع الرحي باش ينقص عليه في الكلفة. أما إحنا، والحمد لله، نخدمو قمح كامل 100%، بكل أمانة وصدق، وهدفنا نرضيو حرفائنا قبل كل شيء، والأهم بما يرضي الله. 🤍
