02/02/2026
# **Lekooti he kau Polisi e fuofua mate mei he fakatu’utamaki ‘i he hala pule’anga he ta’u ni**
Tu'apulelulu 22 Sanuali 2026
Ongoongo Fakamuimuitaha
Kuo lekooti he Potungaue Polisi ‘a e fuofua mo’ui ke mole ki he ta’u fo’ou ni 2026, hiliange ia ‘a e malolo ‘aneafi ‘i he falemahaki Vaiola e matapule ta’u 57 mei Ha’ateiho – tupu mei he fakatu’utamaki ‘i he hala pule’anga.
‘I he fakamatala ‘a e Tokoni Komisiona Polisi – Tevita Vailea ki he Ongoongo ‘a e Letio Tonga na’a ne pehe, ko e fakatu’utamaki ni ne hoko ia ‘i Tokomololo he po Monite ki ha meálele ne heka ai e fakaúli taú 40 mo éne pasese é toko ua.
>
*“Ko e veeni ne fou faka-Tonga he hala Peamotuá. Naé sifaa e meálele ki he kauhala toómataú ó hoko ai e lavea lahi ki he pasese ne heka he sea mui.”*
*“Naé aú atu e kau polisi ki he feituú ne hoko ai fakatuútamaki ni, óku íkai to e í ai e fakaúli, ka e mahino mei ai ko e matapule he pasese mui naé lavea lahi pea í he tuúnga faingataía kae faingamalie pe á e pasese muá.”*
*“Ne maú lipooti mei he falemahaki Vaiola he pongipongi áneafi ó mahino kuo malolo e matapule ne í he pasese mui e meálele.”*
Naé puke he kau polisi e matapule taú 40 mei Pea ko e fakaúli he meálele ko eni, pea kei tauhi he malumalu e kau polisi, ‘o faka’ilo ki he faka’uli ta’etokanga ‘o hoko ai e mate.
Te ne toki ha ‘i he fakamaau’anga ‘i he Monite kaha’u.
‘Oku te’eki fakapapau’i he lolotonga ni p*e na’e ‘i ai ha kaunga ki heni ‘a e Ma’u kava malohi – ka ‘oku kei hokohoko atu pe ‘a e fakatotolo e kau Polisi.
‘Oku kei fakamamafa’i pe mei he Potungaue Polisi ‘a e mahu’inga ketoe fakapotopotoange ‘a e kau faka’uli ‘i hono ngaue’aki ‘o e hala pule’angaa – telia ha mo’ui ‘e mole.
Scr: L Tunitau
