https://www.facebook.com/738014172720083/

Sk Indodakazi Yosizi, Randburg (2026)

08/08/2026

Imfihlo kaGogo

Isahluko setshumi lambili 20

Sk Indodakazi Yosizi

"Hayi kutsho usuhanjelwa yinqondo ayikho indaba yakho Sikhangezile." Kwakusitsho uMakhumalo.
"Ungaqali wena salukazi esikhohlakeleyo, mtshele unkosikazi iqiniso namuhlanje kumele ebelazi iqiniso." Kwakusitsho uSenzo.
Wangenwa ngamanzi emadolo uMakhumalo wazibuza ukuthi yindaba ozayithini njalo uzayiqala ngaphi?
"Sikhangezile mtanamtanami njengoba ubona lowu ngu Senzo nguye umuntu okuthengele imota mtanamtanami, udiyo lolu owalwamukelayo wawuyamukela uSenzo uyakhumbula ngomdlalo wakho lowana owakho owosuku lwakho lokuzalwa wawutshada loSenzo yikho ubona umdlalo wakho wawumkhulu ngendlela eyisimanga."Kwakusitsho uMakhumalo.
"Uyibambe kanjalo gogo njalo ithi uyadlala mina angikuzwa kahle kahle uzama ukuthini ngenze ngizwisise gogo.
Ngoba lento oyikhulumayo angiyizwisisi awusoze ungitshele ukuthi lo muntu ngumnyeni wami utsho umuntu uphi okwakuqala? ngoba mina ngizwa izwi kuphela ngicela ungichazele kabanzi gogo ungangihlanyisi."Kwakusitsho uSikhangezile esedidekile ukuthi kwenzakalani wazibuza ukuthi uyaphupha noma usegula ngokwenqondo.
"Siyabonga uyawuzwa umsindo kagogo loSikhangezile? asambe siyokuzwa ukuthi babangani." Kwakusitsho uNomathemba.
"Cha dadewethu ezababili azingenwa sekungenzeka ukuthi babanga indaba yemota, mhlawumbe ugogo ubonile ukuthi kukhona okutshaya amanzi, ngoba ngeke uSikhangezile ethenge imota kuvele kuthuleke angazani akukaze kwenzeke lutho."Kwakukhuluma uSiyabonga.
" Hayi ma usitsho kuyazwakala mfowethu kodwa lapha kukhanya kukhulu abakubangayo." Kutsho uNomathemba.
"Senzo njengoba sidlephana kanje loSikhangezile abamtwana bona ubavalile indlebe yini? Ngoba ma ungabavalanga indlebe kusasa bayavuka bekhuluma into eziphuma endleleni." Kwakusitsho uMakhumalo.
"Ngibavala njani ngoba uNomathemba uyakwazi ukuthi asuye umuntu engingamsondelela, ngizathi ngisithi ngiyakibo avele angibone ngisasekhatshana bazaphela bezwe ngoba ukuya kibo soze ngiye mina, lelo liphutha engingasoze ngiliyenze chazela unkosikazi ukuthi ngingubani ngoba isikhathi sesidliwe ngumangoye menze ezwisise, nxa engafuni ukungamukela ngizomphuca konke olakho ngoba ngamandla ami lawa engiwasebenzele nzima."Kwakusitsho uSenzo.
"Sikhangezile njengoba ubusukhomba ngophakathi ubusithi yonke leyi imali ivela ngaphi okwakuqala, Senzo vala imiduli yenza amazwi ethu angaphumeli phandle ngoba wehlulekile ukuyavala abamtwana indlebe." Kwakusitsho uMakhumalo.
USenzo wavele wajabula wenza ezibukwayo watsho ngenhliziyo ukuthi kathesi manje sezikhala.
"Sengivalile sungakhuluma into ofuna ukuyikhuluma njalo, ngifuna ukhulume into ecacayo lomzukulu wakho lowu isikhathi sikamacatshelana sesiphelile Makhumalo."Kwakukhuluma uSenzo.
"Kavele lomuntu okhulumayo ma eyindoda ezizwayo, yindoda enjani edingelwa umfazi yisalukazi esingangawe wena gogo njengogogo kumele usifukamele wena wenza njani? Ungumzali onjani omnikeza indoda engakwazi gogo ngilempilo njalo ngilamaphupho ami amakhulu, kungani usenza kanje?" Kwakubuza uSikhangezile eganwe unwabu.
"Ayi kahle umzenzi kakhalelwa kukhalelwa umenziwa, wena uzenzile wamukela kanjani udiwo oluvaliweyo luvalwe ngelembu elibomvu ungakwazi ukuthi phakathi kulani, angithi wathi usizwa ngisithi udiyo lolu lulenhlanhla luzatshintsha impilo yakho walwamukela ngezandla ezimhlophe.
Tshona khona ukhalela bani kathesi wamukela isinanakazana wena, wayibona ngaphi inhlanhla eyehla ungayisebenzelanga njalo ma usithi ubulamaphupho amahle avalwe ngubani ungazongidakelwa wazithathela lindlela wena vuna okutshalileyo mzukulu." Kwakusitsho uMakhumalo.
Umsindo wabamba egumbini likaSikhangezile wezwakala ekhwaza uSenzo.
"Yeyi akelithule lekele ukudonselana wena Sikhangezile uthi ngivele uzangimela, njalo nxa uthi ngiyindoda enjani edingelwa umfazi yisalukazi uchaza ukuthini, zwana ke nkazana mina angizwani lobumbulu njalo angiwuthathi udoti ungizwe kahle, kusukela namhlanje ungihloniphe ma ukhuluma kanje labangane bakho kimi ungaqali ngoba angisuyena usowenu uyangizwa kahle." Kwatsho uSenzo etsho ephumela obala.
USikhangezile wethuka ebona kuyinkalakatha yenyoka wavele waqaleka.
UMakhumalo weqa ethi ulanda amanzi uSenzo wazwakala etshinga.
"Jika wena uyangaphi?" Kwakubuza uSenzo.
"Ngiyalanda amanzi umtwana useqalekile nangu uzasifela." Kwaphendula uMakhumalo.
"Kutsho bani ukuthi uyelanda amanzi ngunkosikazi wami lowu ngizamchemela endlebeni khululeka okwamanje umgcobe imfuko le engakunika yona umgcobe umzimba wonke mina ngizaqeda ngimthundela." Kwakusitsho uSenzo.
Wenza njalo uMakhumalo imfuko yayihlezi isebeleni.
Wathi eqeda uSenzo wamchemela endlebeni wavele waphaphama.

Obhalayo ngu S-K indodakazi yosizi eyakoMadabe uSikhangezile Nleya.

IYAQHUBEKA

06/08/2026

Imfihlo kaGogo

Isahluko 19

Sk Indodakazi Yosizi

"Hayibo wena misa ukudlala ngami angiwanga mina ngithe ngimemeze bengifuna ukubona ukuthi ngubani ongithandayo, manje sekuvele kwaba sobala mzukulu nguwe wedwa hamba uyelala mtanamtanami sekusebusuku osowenu sebelele, abanye sebeze bathambisa ingubo hamba mzukulu ungazihluphi ngami, sukuma uhambe usahlaleleni sukuma hamba uyelala njengabanye abamtwana."Kwakusitsho uMakhumalo.
Wahleka uSenzo wathi ngizakubulala ungaphindi ulenze iphutha elifana laleli etsho ehamba loSikhangezile besiya egumbini labo.
Wasala emangele uMakhumalo wazibuza ukuthi eme ngaphi? kuSenzo laseligaya ngelomhlathi sefuna ukuthi uSikhangezile embone, ngoba laselilide ithuba bedlala umacatshelana uSenzo wabona kungcono ukuthi evele uSikhangezile waphinda wathi ngcono elinde ma eqeda kuthenga imota yikho la ozavela khona.
UMakhumalo walala engalele ecabanga ngokuthi izinanakazana zakhe sezimjikele.
Inhliziyo kaMakhumalo yayisopha igazi ecabanga ukuthi abamtwana bakhe sebaphela bonke, ngenxa yenotho sekhangelele kubazukulu kodwa sebefuna ukubamphuca bona.
Wabona kungcono ukuthi ebabize owafawafa bezokhipha zonke izinanakazana zakhe asale lenotho.
Kwaba lokuthula emzini kaMakhumalo okwensuku ezimbili, konke kuyimi ngomumo ngosuku olulandelayo uSikhangezile lomkakhe bavuka besiya edolobheni lakoBulawayo ukuyolanda imota ngoba yayisibuyile.
Wathi qeda kuyithatha bayitotobisa baze bazofika ekhaya uSikhangezile wayengakwazi ukutshayela ngoba engelaso isithupha sokutshayela.
Bamangala bengaqedi abantu bakoMadabe bebona uSikhangezile efika lohlobo lwemota ekhanyisela amanzi babuzana ukuthi imali uyithatha ngaphi.
Abantu ngoba behleli bekhuluma babekhuluma ukuthi mhlawumbe uMakhumalo umcuphele ngoba uMakhumalo wayekhomba ngophakathi kodwa engakaze evuke ekuseni esiya emsebenzini.
Wathi efika ngasesangweni uNomathemba wavele wafa ngensini.
"Hahahaha angihleki ngiyalinganisa! Siyabonga wozobona le yimihlolo woza uzobona udadewenu uze lenye lamuhlanje wenze izimangaliso, Siyabonga uyabuya noma cha? Kwakubuza uNomathemba.
"Kkkkkkkkkkk le yimihlolo yekela zilime ziyetsheni, Sikhangezile dadewethu imali yemota enje uyithethe ngaphi ngoba awusebenzi wena uzofa umncane ngendaba zokugijimisa inotho ongayaziyo ukuthi ivela ngaphi? Sikhangezile ungathi angikukhuzanga ngoba kuthiwa isala kutshelwa sibona ngomopho dadewethu."Kwakusitsho uSiyabonga.
"Inkinga lina lidliwa ngumona kutsho ukuthi lina lehluleke ukuthi lithi siyakuhalalisela dadewethu hayibo umona yilifa lezinja banawami lingayenzi lento." Kwakukhuluma uSikhangezile.
UMakhumalo wabamba owangezansi ngemva kwalokho watshaya umpululu wayamukela umzukulu wakhe bangena ekhaya.
Wathi esehla wavele wathatha amanzi okugeza wayageza ngoba wayekhathele, njalo esenuka lamaginqo.
Wathi engena emanzini esathi uyageza wezwa kulomuntu omgezisayo emgogodledleni wazibuza ukuthi ungezwa ngubani wathalaza.
Wathi ethalaza kazange ebone lutho wasesithi mhlawumbe kazwanga kahle wazama njalo ukuthi egeze wezwa futhi ukuthi hayi kulomuntu omgezayo emuva.
Uvalo lwamuthi vavava wezwa angazani uhanjelwa zinqondo wazwakala ebuza ukuthi kahle kahle kwenzakalani uSenzo wamphephethela endlebeni ukwenzela ukuthi emuzwe uSikhangezile.
"Nkosikazi yimi umkakho ungethuki nginguSenzo." Kwakusitsho uSenzo.
Wawuhlaba umkhosi uSikhangezile wezwakala ebiza uMakhumalo, uMakhumalo watsho ngenhliziyo wathi uSenzo usevele obala uSikhangezile wazibuza ukuthi yinto ozayiyenzani.
Wazidonsa inyawo uMakhumalo eqonda egumbini likaSikhangezile.
UNomathemba wamjolozela watsho ngenhliziyo wathi kukhona okutshaya amanzi phakathi kuka Makhumalo kanye loSikhangezile.
Wathi efika egumbini wathola uSenzo ethandele uSikhangezile.
Wafika laye wazimangalisa wenza angazani ubengakwazi ukuthi kuyenzakalani kodwa esazi mhlophe ukuthi kuhamba njani.
"Kwenze njani Sikhangezile umemeza kangakanga? Kungani ungibiza unqunu wena mtwana sekufe bani?Kwakubuza uMakhumalo.
"Ngizwe kulomuntu ongigezayo emuva ma ngithalaza angiboni lutho ma ngisithi ngiyema, ngizwa umuntu ekhuluma ethi ngumkami gogo ngizwa sengathi ngihanjelwa yinqondo,angazi kwenzakalani?" Kwakubuza uSikhangezile.
"Hayi kutsho usuhanjelwa yinqondo ayikho indaba yakho Sikhangezile." Kwakusitsho uMakhumalo.
"Ungaqali wena salukazi esikhohlakeleyo, mtshele unkosikazi iqiniso namuhlanje kumele ebelazi iqiniso." Kwakusitsho uSenzo.
Wangenwa ngamanzi emadolo uMakhumalo wazibuza ukuthi yindaba ozayithini njalo uzayiqala ngaphi?

Obhalayo ngu S-K indodakazi yosizi eyakoMadabe uSikhangezile Nleya.

IYAQHUBEKA

04/08/2026

Imfihlo kaGogo 18

Sk Indodakazi Yosizi

"Gogo wasuthula ungizwile kodwa noma awungizwanga ngoba ngisalinde impendulo yakho?" Kwakubuza uNomathemba.
"Ngizwile bengisayicabanga lendaba ngizayidlela amathambo enqondo." Kwakuphendula uMakhumalo.
"Amathambo enqondo ani mina ngikhulumile nje ngathi yenzela unkosikazi wami lathi sizijabulele." Kwakusitsho uSenzo.
"Ithi uyadlala ayikho leyo wena soze wenzelwe umcimbi womtshado hayi ngikhona, ngoba konke okufunayo uyakunikezwa kungafa umuntu nxa kunjalo, ngcono wena salukazi vuma uthi uzabahlanganisela bonke bebathathu." Kwakusitsho uBazangenzani.
"Cha akwenzi uSiyabonga wenzelwa ukuthi yena wenzeni, kahle kahle mina ngifuna igazi ngcono sihlabe kuchitheke igazi ngosuku lomcimbi sihlabe uSiyabonga." Kwakusitsho uSenzo.
Zehla inyembezi kuNomathemba ngoba wayebona ukuthi kukhona okutshaya amanzi uMakhumalo wethuka esizwa uSenzo esithi ufuna kuchitheke igazi.
Wayengalindelanga ukuthi uSenzo engathi akuchitheke igazi ngemva kokubulala abamtwana bakhe bonke kanye lokuchitha izisu zakhe zonke.
Wavele wasukuma waqonda egumbini lakhe wafika wavala umnyango.
"Buyani sikhulumeni kahle kahle Senzo loBazangenzani lingifunani ladla abamtwana bami labaqeda, namhlanje lithi lifuna igazi lifuna uSiyabonga pho ma limbulala ngubani ozasala engelusela izifuyo? Hayi sekwenele ngokuchitha igazi lithe lifuna abafazi selilabo manje selifunani kutsho phela ngemva kukaSiyabonga lizabulala mina kungani lingenza kanje?" Kwakubuza uMakhumalo eganwe unwabu.
"Yehlisa iphimbo ma ukhuluma, njalo mina ungangifaki emtweni yenu loSenzo angazi likhulumisane njani, kodwa wena ungumthakathi omkhulu uyazi ubuthakathi bulomvuzo ekugcineni kahle kahle ubulindeleni? Senzo kungani usithi ufuna igazi kunganjani ngibulale wena ngoba uyinkinga izolo lokhu ubufuna ukubulala ubambo lwami, Namuhlanje uthi uSiyabonga kusasa kulandela bani ngazani wena uzabayinkinga, njalo Senzo nxa usithi wenzelwe umcimbi uchaza ukuthini ngoba phela wena ngemva kokuthi uSikhangezile ayamukele udiyo lavele latshada, nxa usithi lizaphuma liyekholisa lephakade lakho uthathe ubuntombi ubala buphi ubuntombi ngoba kudala wena loSikhangezile lenza ucansi misa ukungenza umtwana mina ngoba angisuyena usowenu, sukhohliwe ukuthi malanga lawa akukho okwenzayo konke uyakwenzelwa ngoba utshona wenza ucansi emini lebusuku ukokhuluma ubumbulu ungaqali nje, wena Makhumalo ukuthi uyenzani awenzini asidoko olugayelwe mina lolo, ngakutshela ukuthi yenza noma yini ezayenza uNomathemba engahambi.
Hlala usazi ukuthi uNomathemba engahamba ngizakubulala kanye loSikhangezile loSenzo besengivala umuzi yikho elizabona khona ukuthi ngiyahlanya, njalo ingekho into elingangenza yona wena Senzo ma ubona ubona angazani siphila emhlabeni wakho wedwa cha lathi silezidingo watshada manje usafunani ngiyabona udakwa ligwayi.
Sengiyahamba like lisale likhuluma amasimba lizoyayelusa amadada laboyihlomkhulu ungakhohlwa umcimbi wentombi yami wena, umcimbi kaNomathemba awuhlangani lokaSikhangezile.
Njalo wena Senzo emcimbini wentombi yami angikufuni ukuzame ukubuya nzakuhlanganisa labaphansi ngamandla akho analawa adakiweyo."Kwakusitsho uBambanani wakhuluma kabanzi waqeda waphuma wabatshiya.
Baqala ukudonselana akudonselana uMakhumalo loSenzo.
USenzo wayeseganwe unwabu ukuthi kungani uBambanani, engafuni eze emcimbini kaNomathemba ngoba ngomcimbi kaSikhangezile wayekhona kazange emxotshe.
"Kungani uvumela uBambanani ethi ngingabuyi emcimbini ma kunjalo lentombi yami ayihambi emcimbini, njalo wena Makhumalo umsebenzi wakho ngowani usehluleka ukukhuza uBambanani ephuma endleleni." Kwakusitsho uSenzo.
"Ufuna angibulale angithi lawe uyamesaba, lina ngobubili benu lingitshayisa ngekhanda langibulalela abamtwana bami bonke kathesi selifuna abafazi sengilinikezile, kathesi wena Senzo uthi sufuna igazi ufuna ngihlabe utsho ngihlabe umzukulu osesele enguye yedwa engimthembileyo.
Kahle kahle vele lina alisoze lisuthiseke ngakho konke engilenzela khona? Kwakukhuluma uMakhumalo.
Waqala ukugaya ngelomhlathi ezibuza ukuthi engenzani ngoBambanani loSenzo ngoba owayekufuna konke selakho.
Wazibuza ukuthi ebize izayoni labowafawafa bezogida bazikhuphe izinanakazana lezi, waphinda wazibuza ukuthi ma ebiza owafawafa ukuthi bezokhupha bebuye behluleke uzasala engokabani, ngoba izinanakazana lezi ziyabe zizambulala.
Wadideka uMakhumalo ezibuza ukuthi ayenzeni ngoba ma engabiza owafawafa lezayoni abangalamandla kuzabe sekuphelile ngaye, wacabanga lokuthi bakhona abanye abathi bayakhupha kodwa bengakwazi ukukhupha bebuya beyimbele into zabo ebusuku ekuseni bebesebesenza angazani bayakhupha beqeda lapho bethatha imali.
"Wasuthula ucabangani ngoba asiso sikhathi sokuthula kathesi okwakho okumele ukwenze yikuthi ubuye lesisombululo Makhumalo."Kwakusitsho uSenzo.
Wathula uMakhumalo wabona ukuthi aphume atshiye uSenzo yedwa uthe esithi uyaphuma uSenzo wavele wamgenxa wawa.
Wazwakala ememeza uMakhumalo esedobhe izuka uNomathemba wavele wayenza angazani kazwanga.
"Ngugogo phela lowu wenze njani ememeza kangaka sambe siyemkhangela dadewethu." Kwakusitsho uSiyabonga.
"Uyabona into ehlangene logogo angifuni kuyingena ngoba umzenzi kakhalelwa kukhalelwa umenziwa uzenzile lowo sambe siyelala mfowethu ukhohlwe ngogogo uzaphola." Kwakusitsho uNomathemba.
Basukuma baya egumbini labo bahlangana loSikhangezile ehatshuzela esiyakhona.
Wathola uMakhumalo elele phansi ehluleka ukusukuma.
"Zifundise ukuthi wena nxa ngikhuluma lawe awungifulatheli ungenze ilema elisala likhuluma lodwa ngoba ngamasimba lawa obuzama ukuwenza ungitshengisela ukuthi uyangidelela, njalo uzitshela ukuthi akukho engingakwenza khona tshela unkosikazi ahambe uzazivusa, ngoba unkosikazi wami kasiso sisebenzi sakho.
Wasungivulela amehlo njengembuzi ephekwe lempondo zayo awungizwanga ukuthi ngitheni, uzamtshela noma cha ngoba angila langa lonke swkumele siyelala lonkosikazi wami ontanga bakhe sebephindana thina silokhe singakaqali umdlalo wasekamelweni."Kwakusitsho uSenzo.
"Gogo awusaboni yini subonela eduzane ugwenxwe yini uze udobhe izuka?" Kwakubuza uSikhangezile.
"Hayibo wena misa ukudlala ngami angiwanga mina ngithe ngimemeze bengifuna ukubona ukuthi ngubani ongithandayo, manje sekuvele kwaba sobala mzukulu nguwe wedwa hamba uyelala mtanamtanami sekusebusuku osowenu sebelele, abanye sebeze bathundela ingubo hamba mzukulu ungazihluphi ngami, sukuma uhambe usahlaleleni sukuma hamba uyelala njengabanye abamtwana."Kwakusitsho uMakhumalo.

Obhalayo ngu S-K indodakazi yosizi eyakoMadabe uSikhangezile Nleya.

IYAQHUBEKA

04/08/2026

Imfihlo kaGogo

Isahluko 17

Sk Indodakazi Yosizi

"Jesu umthetheleli ngumeli wethu
Simbonile esebuya lokuphila
Jesu umthetheleli ngumeli wethu
Simbonile esebuya lakho ukuphila
Simbonile esebuya lokuphila
Namhla Nkosi ngiyamangala kube wawungelami ngabe ngafa!
Namuhla Nkosi ngiyamangala kube wawungelami ngabe ngafa!
Ngiyamangala mina ngiyamangala ngabe wawungelami ngabe ngafa
Wahlabela wajula emoyeni uSiyabonga noma wayehamba sehlangana labantu wayengasabingeleli esebona umbuso wezulu.
Wathi esezafika esangweni waqala eyinye ethi ingoma ethi.
Noma silingwa sihamba loJesu
Sihamba laye? indlela yonke sihamba loJesu asesabi sihamba loJesu yedwa.
Was**a uSenzo esizwa ingoma ivutha uNomathemba wamncedisa uSikhangezile wezwakala ekhwaza esithi "Yeyi lina alizwa ukuthi libanga umsindo selithatha lomuzi liwuphendula isonto ma lifuna ukuvula isonto kungani lingayi kuyavula entabeni le KuMataba noma kuKuyini lekele ukusibangela umsindo."
"Ma usithi sekele ukulibangela umsindo ubala wena lobani kanje wena malanga lawa uzenza ngcono, kuzakuphelela ngoba okungapheliyo kuyahlola.
Njalo funda ukuthi ma ukhuluma uzikhulumele wena wedwa ungathi si nxa usithi si ubala lobani ngoba sibathathu lapha? abantu abahlabelayo babili aluqonde ulimi dade umise ukuzenza ngcono lapha ukuthi ugogo ukufake ngaphansi kwezidwaba zakhe akutsho ukuthi sekumele useyise. "Kwakusitsho uSiyabonga wakhuluma kabanzi wavele waphuma emandleni okuhlabelela.
"Mfowethu zifundise ukuthi ezinye zezinto uyathula wenze angazani awubonanga, izilingo eziza ngenkomitsho chitha noma zisiza ngenkonxa yamanzi chitha soze ufe, ngoba ukuthula kungumanqoba, Sikhangezile uyengaphi ugogo?" Kwakubuza uNomathemba.
"Ubona ngimbhabhulile mina khonalapha, wena Siyabonga misa ukungijwayela ama simba ukuthi umgumfowethu akutsho ukuthi ungidelele ungaphindi ulenze iphutha elifana laleli ngoba ngizakukhohlwa ukuthi umgumfowethu ngoba angisoze ngikhulume ngizohlanza kunuke kungabolanga.
Njalo lawe wena Nomathemba angazi ungijwayezwa yini ma ungibiza ngesilingo esiza ngekomitsho uwagade amagama akho ngoba azakulimazisa ngami, mina uyazi angiwuthathi udoti."Kwakusitsho uSikhangezile.
" Mxiim ngamasimba ke lawa owakhulumayo, kahle kahle ungazongidakelwa wena." Kwakukhuluma uNomathemba.
Wanxapha uSenzo wathi yazi bekumnandi eJeswini unkosikazi weza waphazamisa Yoooh ima ngihambe lephakade lami ngiphume kubosibale ngoba vele kuyafana uNomathemba soze engibambise ibele uyingozi lowu.
"Yazi dadewethu amajodo awela abangalambiza, kodwa angikho lapho wena uqeda kungikhuza kathesi kodwa nguwe osudaza inkani loSikhangezile mekele ehambe lowu sezibona ehleli esihlalweni sobukhosi." Kwakusitsho uSiyabonga.
"Vele manje wena uhlutshwa yini khonalapho, inkinga yenu lina lingidlela umona likhohlwa ukuthi umona yilifa lezinja uyabona mina vele ugogo uyangithanda, njalo ayikho into elingayenza ngalokho yikho ubona enginikeze ikhadi lakhe lemali ukuze ngikwazi ukuthenga imota.
Lingajahi lani luyeza olwenu usuku bamtwana bakamama angisoze ngithi bamtwana bakababa ngoba sekungenzeka singazalwa ngubaba oyedwa, ngoba phela mina nanku abaphansi bayangikhusela behlisa inhlanhla kimi!
Lina abakini yizalukazi ezimnyama tshu eziyimpuphuthe ezihamba zilithela ezihlahleni, zehluleka nje ukuthi zilikhanyisele zilehlisele inhlanhla, kumbe kwenziwa yikuthi abakini abahlawulanga yikho lilamabhadi hayi kutsho kwamele licele edlozini ukubana lilikhanyisele lilibonise indlela ngoba kumnyama, kwamele idlozi lenu litsho ukuthi konakelephi."Kwakukhuluma uSikhangezile wakhuluma kabanzi.
"Yeyi unkosikazi uyakhuluma hayi umfazi okhuluma kangaka nzomkwanisa kungani isalukazi lesi esinguMakhumalo singangikhulumelanga loNomathemba lo othuliyo, inkinga nje uNomathemba uyingozi kodwa kwamele ngiqede ngaye, eish angazi nzoyenza njani ngoba nanku indoda yakhe ilamandla anzima ingangibulala kumbe ngimsunduzele emlilweni ese evele elobe ephele.
UBazangenzani soze engenze lutho angithi lami ngiyindoda aseluhlaza, yikho sengilomfazi yena ucabanga ukuthi nguye yedwa indoda oselaluhlaza lawami aseluhlaza."Kwakukhuluma uSenzo edidekile.
UNomathemba wakhangela uSikhangezile wanyikinya ikhanda wases**a emkulwini uSenzo esathi uyamsunduzela emlilweni etshe.
USikhangezile wavele waqhubeka ngohambo lwakhe wabona ukuthi uNomathemba uyamesaba, engakwazi ukuthi uNomathemba kamesabi kafuni kulwa laye ngoba esithi nxa engalwa laye uyabe ejabulisa izitha zabo.
UMakhumalo wathutsha loBazangenzani, uMakhumalo wasebuza ukuthi kuphekweni ngoba yena ufile ngephango.
UNomathemba wayepheke isitshwala betshebisa ngenyama yembuzi eyayilamalanga ambalwa beyihlabile.
Wabaphakela uNomathemba kwadliwa kwakuyinjabulo yodwa phakathi kuka Makhumalo kanye loNomathemba.
USikhangezile waba lomona ebona indlela uMakhumalo kanye loNomathemba ababexoxa ngayo.
UMakhumalo wakhulumisana loNomathemba ukuthi amenzele umcimbi wathi uzomhlabela inkomo.
"Cha gogo soze ungenzele umcimbi ongaka uthi uzahlaba inkomo, ngoba uthi ufuna ukujabulisa mina ungakaze wenzele uSikhangezile umcimbi njalo ungakaze wenzele loSiyabonga umcimbi.
Ngiyaxolisa gogo angisoze ngikwazi ukwamukela isipho somcimbi ongaka ungaqala ngokwenzela udadewethu kanye lomfowethu."Kwakukhuluma uNomathemba.
Wajabula uSenzo wabona kulithuba elihle ukuthi bazase betshade lephakade lakhe.
"Vuma salukazi uzaqala ngokwenzela intombi yami sivele sitshade, yooooh yazi ngaze ngamthanda usibale bengingakwazi ukuthi uyakwazi ukucabanga ngaleyi indlela, yazi ngihleli ngizwa kuthiwa inkiwane evuthiweyo ibolile, akuvamanga ukuhlalisana ubuhle lenqondo yoooh kutsho uBambanani la wabona intombi uqobo lwayo igcwalaguma yekela esala ukuthi simthwalise umhlabathi ngesifuba, yeyi ngaze ngatshada lami ngaze ngatshada lami mina loSikhangezile sizahlela usuku ngemva komtshado siye ehoney moon, la uSikhangezile ozafika engibona khona esebona umuntu omtshadileyo senginikeza ubuntombi, ngaze ngadla ngaze ngadla lonyaka."Kwakusitsho uSenzo.

Obhalayo ngu S-K indodakazi yosizi eyakoMadabe uSikhangezile Nleya.

IYAQHUBEKA

01/08/2026

💃😍

01/08/2026

Linjani zihlobo zami ngiyaxolisa nge weekend angifaki ingwalo, ingwalo ngizifaka Monday to Friday 🙏 ngeSuterday ngiyabe nsesomtweni ngesonto abazalwane labo bayabe besesomtweni, abanye besebunandini weekend we are enjoying our weekend without istress sikaMakhumalo loSenzo kanye loBambanani.

31/07/2026

Imfihlo kaGogo 16

Sk Indodakazi Yosizi

"Khululeka dadewethu mina ngikhona njalo ngizohleli ngikweseka ngazo zonke izikhathi, ngiyakwazi okukhulumayo konke liqiniso awuwumani, into eyenza ngivumelane lawe yikuthi ngathi ngelinye ilanga ngizihambela ngahlangana logogo owayesekhulile wakhuluma lami kabanzi, waze watsho lokuthi thina singabakoNyathi umama wafela ukungalaleli ugogo, kube wamlalela ngabe uyaphila baqinisile ma bethi isala kutshelwa sibona ngomopho buka manje umama waphetha ngokuthwala umhlabathi ngesifuba, ngiyazibuza lamanje ukuthi ugogo lomama yini le engaka ababeyibanga eyayenza umama waze wafa nami ngiyesaba dadewethu ngimncane angilawo amandla okulivikela ngiyafisa ukulivikela kodwa ngehluleka kungazani ngibotshiwe izandla lenyawo ngazani ngibotshwe ngamaketani, ungangiboni ngihamba kanje kodwa phakathi kwami kungazani ngiduhile mtakamama angazi sophephelaphi."Kwatsho uSiyabonga wakhuluma kabanzi zehla inyembezi ezibuza ukuthi ngubani ongabethula umthwalo osemahlombe abo ngoba bebancane.
Engingakutsho wena ungakhulumi lutho kugogo ngoba ngihleli nginanzelela nxa sihleli inwele zami nxa ziqala ukubophana uvele uqale ukuhlabela lokuzamula, ngananzelela ukuthi kukhona okutshaya amanzi ngiyavuma ukuthi ugogo ulabo abafana abafitshane.
Khangela ugogo wabuya wazovusa uSikhangezile silele kusukela lapho impilo kaSikhangezile yavele yatshintsha, ugogo kazange ezihluphe ngokutshintsha kwempilo yomzukulu wakhe, kwakumele ezibuze nxa engalasandla ngezenzo zika Sikhangezile ukuthi kungani esheshe watshintsha wavele wathi uyakoBulawayo uyathenga imota.
Uthenga ngani imota uSikhangezile?
UMakhumalo njengomzali kwakumele ezihluphe ngomtanamtanakhe ngoba kumanje umzali wethu nguye uMakhumalo.
Imali uSikhangezile eyokuthenga imota useyithethe ngaphi? engakaze evuke ekuseni esithi uya emsebenzini, yicabangisise lendaba dadewethu ngicela ungangizwa kabi ngoba uyakwazi ugogo ngiyamthanda kakhulu, kungasuye ngabe impilo iyasitshaya.
Cabanga kodwa dadewethu imota ibiza amakhulu lezigidi lemali uSikhangezile kakaze eyesebenza kodwa sengoya thenga imota ngavele ngabona ngelihlo lenqondo ukuthi kukhona okutshaya amanzi." Kwakukhuluma uSiyabonga wathi engakaqedi uNomathemba wavele wamvala umlomo eseganwe unwabu.
" Zwana ke wena Siyabonga nxa ungafuni ukungincedisa yekela ngoba angikuncengi kudala ngithi gezisa izitsha kodwa lamanje ulokhe umi amadlodlongwane, uphethe emlonyeni yikho okwakho okwaziyo ukukhuluma, wayibona ngaphi indoda ekhuluma njengomfazi, ngizwela intombi ozayithatha Yoooh usenkingeni umtwana wabantu, ngicela uphume khonalana ngizasala ngizenzela izinto zami okwakho okwaziyo yikuba umi amadlodlongwane ulokhe uwumana into engekho, hamba uyevalela imbuzi."Kwakukhuluma uNomathemba esebona uSenzo.
" Hayi s**a ayincengani sala ke ufuthwa intuthu, sekungenzeka usesifuthweni mina lami besengifela ize isifutho engingasaziyo ukuthi ngesani, ngoba bengithi ngizama ukukukhupha isizungu, wena uba lolaka lalapha okungadingeki khona! Wena ufana lalaba abamtwana abakhula behlukunyezwa, abamtwana bakhona ngesikhatshana liyabe lijabulile mbonisa ngempilo ngemizuzwana nje embalwa seganwe unwabu suyosala ke! upheke ukudla kuvuthwe ngoba uyazi mina imboza ngiyayizonda, njalo intombi yami ingena ngaphi kuleyi inxoxo engixoxa ngayo mina, kube ngokwakuqala lokokugcina ukufaka intombi yami phakathi kwenkulumo yami lawe ngoba soze iphele kahle ensukwini ezizayo ma sengiqonyiwe phela ngisazoba yinsizwa ezabe ilwelwa zintombi! Ngiyabona wena ungithathela phansi ngoba ngisagcwele umdlopha angikakwazi lokugeza! bengithi ngiyakuxoxela njengodadewethu ngingazi ukuthi ngizokhela amalahle ekhanda, suyasala ke lamabhodo akho ngoba isala kutshelwa sibona ngomopho." Kwakusitsho uSibongile etsho ephuma emkulwini, wayeseyibale ngelihlo lenqondo ukuthi kukhona udadewabo osekubonile uzama ukumvikela ngendlela ehlakaniphileyo, laye kazange ethande ukudaza inkani.
USenzo wadideka wazibuza ukuthi izeluleko bani uSiyabonga obezinikeza udadewabo ma esesithi isala kutshela sibona ngomopho! kutsho phela inkulumo yabo ibijulile.
USiyabonga waqonda emadlelweni aluhlaza, wathi esephambili wabona kungcono ukuthi eyekhuleka.
Waguqa ngamadolo wakhuleka kophezulu.
"Emagameni amathathu elikayise lelendoda lelikamoya oyingcwele, baba Nkulunkulu simakade lezulu wena mvelinqangi, ngiziletha kuwe ngilosi yokukhanya ngilosi yokulunga ngicelisela ukubana mina labodadewethu usikhusele usifukamele ngamaphiko omoya, uyazi asiyilutho ngaphandle kwakho ngizinikela kuwe nginikela labodadewethu kwezakho izandla.
Imoya yonke evunguzayo ma ingakwanisi ukuzofinyelela kithi ngilosi yokulunga, ngincengisela udadewethu uNomathemba uyazi ngilosi yokulunga ukubana uNomathemba lithemba lami lokugcina ngoba udadewethu uSikhangezile sesihlamukele angazi ungenwe yini! kodwa wena simakade sezulu nguwe oyaziyo ibalaye imihla lamalanga, menze ebone ukulunga kwakho menze etshintshe ukwenza mbonise indlela yeqiniso. Mnikeze amandla okunqoba imimoya engalunganga mnikeze ukuhlakanipha ngilosi yokukhanya menze umkhumbulo wakhe ubuye ngoba umkhumbulo wakhe uyahamba uyanyamalala, ngoba nanku ejabulela ukuthenga imota lokuphila impilo emnandi.
Angilawo amanengi konke ngikutshiya ezandleni zakho, ngiyazi wena awehlulwa yilutho wena ovula kungavali muntu, wena dwala laphakade Amen." Kwakusitsho uSiyabonga ethandaza.

Obhalayo ngu S-K indodakazi yosizi eyakoMadabe uSikhangezile Nleya.

IYAQHUBEKA

30/07/2026

Imfihlo kaGogo 15

Sk Indodakazi Yosizi

"Wasukhala ukhalelani ke Nomathemba?" Kwakubuza uMakhumalo.
"Angikhali gogo kodwa ngiyahamba ngiyadideka mpiloni osifisela yona njengomzali wethu? Ngoba umama wathwala umhlabathi ngesifuba wasitshiya kuwe, kazange ezihluphe ngokuthi esihambise kubaba wakwethemba wena njengomzali wakhe, mina sengifuna ukwazi gogo uyakwazi ukuthi ngiyakuhlonipha ngisasengulowu umtwana owamfundisa inhlonipho kodwa namhlanje ngifisa ukwazi iqiniso, uyazi sengikhale kwenele yazi kubuhlungu gogo ukubona impilo kadadewethu lomfowethu ishabalala phambi kwakho kwamele ubelecebo." Kwakukhuluma uNomathemba.
" Mzukulu mina okuhle kodwa engilifisela khona, kodwa lokho ngeke kwenze ukuthi nlikhethele ukuthi liphile njani Nomathemba udadewenu ukhulile ukuthi kumele ezithathele izinqumo, lawe ukhulile kumele uzithathele izinqumo, uyazazi izinto ezikujabulisayo mina angifuni kuphenduka isitha sakho esivimba impumelelo yakho, kusasa wena uyavuka ungibiza ngamagama ngiyakwazi, nanku namhlanje ungikhomba ngomunwe ucabanga ukuthi yimi engiyinkinga empilweni yenu, kube ngangikwazi kube unyoko Nomathemba ngamchitha esaselihlwili ngabe angikho lapha namhla, cabanga ngithonisiswa ngumtwana ozelwe izolo umuntu ofinya amakhovula engcolisa ubuso bonke." Kwakukhuluma uMakhumalo.
"Nomathemba ngifike nini lapha tshela mina kungani ngimanzi ngaleyi indlela tshela mina, njalo ngifike njani lapha ngoba ngisuke lapha ekuseni ngisiya emadlelweni aluhlaza ngisiyayelusa inkomo manje lapha ngifike njani? Tshela mina ngoba ngiyadideka."Kwakubuza uSiyabonga.
"Suvukile mfowethu besengethukile ngithi mhlawumbe soze ngiphinde ngikubone kodwa ngiyajabula nxa uphila."Kwakuphendula uNomathemba.
" Hayi s**a ngibulawa yini uyabona ngiqine okwesambane angisuye muntu ongaphonkufa, umbuzo usamile dadewethu ngifike njani lapha ngoba sengimazi kangaka kungani ngimanzi, kahle kahle ngifuna ukwazi ukuthi kwenzakalani misa ukukhala ukhona umuntu ozangiphendula noma ngikhohlwe, gogo kwenze njani ngoba nanku uNomathemba ukhala esikaNandi?" Kwakubuza uSiyabonga.
" Ngizoba yazi njani mina mzukulu wami buza udadewenu nguye ongakutshela ukuthi kwenzakalani, mina ungibona ngimi amadlodlongwane lapha ngibizwe nguye ubengakangichazeli ukuthi kwenze njani, Nomathemba uzasichazela ukuthi kwenzakalani noma sikhohlwe?"Kwakubuza uMakhumalo.
UMakhumalo wavele wayibalekela katshana indaba kaSiyabonga yonke wayethesa uNomathemba, uNomathemba wethuka wazibuza ukuthi kungani uMakhumalo engakhulumi kuSiyabonga ukuthi kwenze njani ngoba yena kakwazi uthe efika uSiyabonga wavele waqaleka.
"Khululeka mfowethu uzaphola ngivela lawe esibhedlela, bekufike umngane wakho lapha ezokhuluma ukuthi uwile lisemasisweni, ugogo ebengekho ngavele ngagijima ngizokubona, ngithe ngifika ngathola isimo sakho sisibi ngavele ngakuthwalela emtholampilo, bathe befika bathi igazi lakho liphansi kakhulu njengoba usazi isimo sezibhedlela zethu, ngiswele amaphilisi bathi ngibone ukuthi uyanatha kakhulu amanzi njalo uzavuka ngingethuki.
Basebesithi ngikuthwale ngibuye lawe ekhaya kodwa bathe nxa ungaqhubeka ungavuki sikulethe uhanjiswe esibhedlela esikhulu ePlumtree, ngiyajabula mfowethu nxa usuphapheme emkhulu njalo uNkulunkulu, ngicela unathe kakhulu amanzi." Kwakusitsho uNomathemba.
"Yeyi zaze zazimbi indaba ngiyaxolisa dadewethu, bona manje uze wadlula emtweni ezinzima ngenxa yami ngiyaxolisa, gogo beliyengaphi umngane wami ezolibiza, misa ukukhala phela Nomathemba ngeke ngiphinde ngikwethuse ngaleyi indlela ngiyaxolisa, esibhedlela bathi yini eyenza ngingabi legazi emzimbeni nxa bekhuluma yazi mina vele angikhumbuli ngitsho lokukodwa ukuthi kwenzakaleni kimi." Kwakukhuluma uSiyabonga.
"Sukhale kwenela Nomathemba, wasukhala ngazani kufiwe empilweni vele kulesikhathi impilo ebuya ibe nzima."Kwakukhuluma uMakhumalo.
" Mhuuu ngizizwa sengathi ngithwetshuliwe ngas**a kimi, ngathi yimina manje esengizivulele icala ngazigweba mina, isitha sami singiphosele emgodini otshonayo, kodwa asikhohlwe ngayo leyi sukuma sambe uyengincedisa ukupheka ngoba nanku uSikhangezile yena into zokupheka kasazingeni, gogo namhlanje ufuna sidleni?" Kwakubuza uNomathemba.
"Noma yini mzukulu uyakwazi angidli ukudla okulesawudo elinengi, ufake isawudo lizwakalela katshana mzukulu wami, ungafaki ibilebile ngiyakucela, ngoba mina angidli ibilebile, phela wena uyakhohlwa kwamanye amalanga nxa upheka ukuthi mina sengikhulile akusamelanga ngidle lezo zinto."Kwakusitsho uMakhumalo.
Wayedidekile uMakhumalo ezibuza ukuthi uNomathemba ebechaza ukuthini ngesikhathi esithi sengathi uthwetshuliwe.
USiyabonga wasukuma wayancedisa udadewabo ukupheka.
Bathi befika emkulwini uNomathemba wacela uSiyabonga ukuthi agezise izitsha yena esaphemba umlilo owawukade wacitsha.
"Uyabona Siyabonga mina angisafisi ukuhlala lapha ngiyakutshela ngoba ngelunye usuku ugogo uzasibulala, yazi angazi kungani ngibona izinto ezinzima kangaka yazi ngibona ugogo ephahlwe yizinanakazana ezimbili, nxa ngithi ngiyakhuleka ngiyabuza ukuthi Nkulunkulu ngabe yini le engiyibonayo ngibona uSikhangezile ehamba lenkalakatha yenyoka okuyiyo esiyindoda yakhe kungani ugogo eyenza into efana laleyi kuSikhangazile.
Yazi mfowethu inkinga uSikhangezile kalaleli ngabe siyabambana yazi ugogo ubengasoze ekwazi ukuzenza zonke lezi izinto kithi, kumanje wena bebekuphendule umkhovu yikho ubona bengakhulumi iqiniso, inkinga ngesaba ukukhuluma ngoba ngazani izinanakazana zikagogo zimi emabondeni zilalele konke esikukhulumayo, Siyabonga ngiyesaba njalo ngilovalo angazi noma ngiyaphupha kumbe ngicabanga kakhulu." Kwakusitsho uNomathemba.

Khangela ugogo wabuya wazovusa
Obhalayo ngu S-K indodakazi yosizi eyakoMadabe uSikhangezile Nleya.

IYAQHUBEKA

Sk Indodakazi Yosizi

08/08/2026

06/08/2026

04/08/2026

04/08/2026

01/08/2026

01/08/2026

31/07/2026

30/07/2026

Address

Website

Alerts

Shortcuts

Share

Category