02/09/2026
ایک شخص نے اپنی مدد آپ کے تحت ایک گاڑی بنانے کی کوشش کی۔ گاڑی سڑک پر لاتے ہوئے بے قابو ہوئی اور پولیس کی گاڑی سے جا ٹکرائی۔ غلطی ہوئی، ناکامی ہوئی، لیکن اس ایک ناکامی پر جس طرح پورے میڈیا، سوشل میڈیا اور لوگوں نے اس شخص کا مذاق اڑایا، یہی دراصل حوصلہ شکنی ہے۔ دنیا کی بڑی سے بڑی آٹو موبائل کمپنیوں کی گاڑیاں بھی حادثات کا شکار ہوتی ہیں، بعض اوقات ان حادثات میں قیمتی جانیں بھی ضائع ہوتی ہیں۔ آج کے جدید دور میں جدید ترین طیارے اور ہیلی کاپٹر بھی حادثات کا شکار ہوتے ہیں، لیکن ترقی یافتہ معاشرے ناکامی کا مذاق نہیں اڑاتے بلکہ کوشش کرنے والے کی حوصلہ افزائی کرتے ہیں۔ رائٹ برادرز کی مثال ہمارے سامنے ہے؛ انہوں نے ہوائی جہاز بنانے کی کوشش میں بارہا ناکامی دیکھی، تجربات کیے، گرے، دوبارہ اٹھے اور آخرکار کامیابی حاصل کی۔ اگر ہر ناکامی پر ان کا مذاق اڑایا جاتا تو شاید دنیا کو ہوائی جہاز اتنی جلدی نہ ملتا۔ ہمیں سمجھنا ہوگا کہ ناکامی کوشش کرنے والے کی شکست نہیں، بلکہ کامیابی کی طرف ایک قدم ہوتی ہے۔ اگر ہم ہر نئے تجربہ کرنے والے کا مذاق اڑائیں گے تو لوگ یا تو کوشش چھوڑ دیں گے یا اپنے ہنر اور صلاحیتیں لے کر ملک چھوڑ جائیں گے۔ قومیں مذاق اڑا کر نہیں، بلکہ اپنے لوگوں کی حوصلہ افزائی کرکے ترقی کرتی ہیں۔
