18/07/2025
لبنات اليوم حبيت نحكيلكم على قيام الليل نهدرلكم بدارجا باش تفهموني اكثر وتعم الفائدة
🌸 ولي تجاهل الموضوع ضاعت عليه حاجة في دنيا شوفو لبنات حبيباتي كامل عندكم حلم و أمنيات و حبيتو يتحقق مكاش لي معندهاش حاجة في راسها غير وقتاش يتحققلكم تعرفوا علاه قلتلكم في الـثـلـث الاخيرة من الليل
🌸 شوفي قيام الليل يبدا من بعد صلاة العشاء حتى الاذان اللاول يعني الفجر هذا الوقت كامل تقدري ديري فيه قيام الليل مي من الاحسن قيام الليل في الثلث الاخيرة من الليل انا عن نفسي نصلي قبل ساعة من صلاة الفجر لأنو في ثلث الأخير يهبط ربي لسماء الدنيا ويبدا يقول هل من عبد يدعوني استجيب له هل من سائل يسألني فأعطيه هل من مستغفر يستغفرني اغفر له قال رسول الله صلى الله عليه وسلم : دعاء السحر اقوى من سحر
السحر هو ثلث الاخير من الليل كي تكوني ديما تنوضي ديري لقيام في ثلث الاخير من الليل توالف الملائكة تشوف نور فوق داركم نهار لي ماتنوضيش تصلي تولي متحيرة عليك وتولي غي تدعيلك يارب لا راهي مريضة شافيها ولا راهي مهمومة ف*ج عليها تقعد غي تدعيلك
🌸 قيام الليل ربي قلنا شحال ماقدرتو تصلو صلو ماقالناش صلوا 1000 ركعة باش تسمى قيام الليل لا لا قلنا كيما حبيتو المهم تصلو بزوج وتسلمي حتى تكملي شحال حابة 2 ولا 4 ولا 6 ولا 8 ولا 10 ولا 12...الخ
الرسول كان يصلي 11 ركعة : 10ركعات قيام و يختمها بالوتر ركعة واحدة
مثال اليوم ناوية ديري قيام الليل
كي تنوضي في ليل تقومي ليل زعمة ناوية تقومي 6 ركعات
تصلي ركعتين وتشهدي وتسلمي بعدين تنوضي تكملي وكعتين وتشهدي وتسلمي مبعد تكملي ركعتين وتشهدي وتسلمي وتدعي واش حابة و اختميها بركعة الوتر (اذا نويتي تصلي قيام ماتصليش الوتر بعد العشاء صلي غير الشفع)
🌸 تعرفي شحال من وحدة فرحت بفضل الله بقيام الليل وشحال من وحدة برات ونجحت و سافرت و تزوجت و تابت و لقات خدمة و تبدلت بعد ماكانو فيها بزاف صوالح ماشي ملاح وشحال من وحدة ربي رزقها لاولاد بعد سنوات انتظار غير بفضل قيام الليل والله هذه الصلاة معجزة فالنفوس عن تجربة والأهم والمهم انك تتقربي من ربي سبحانه
🌸أما عن كيفيتها تقراي فكل ركعتين سورة الفاتحة + (أي سورة تحبيها) أنا عن نفسي نفضل سورة البقرة فيها بزاف أسرار ننصحكم بيها من قلبي والله و لي ماشي حافظتها عادي تصلي بالمصحف كيما كان عم زوجة الرسول عليه الصلاه و السلام يصلي
