08/08/2026
⚠️خلى بالكو بتأكله ولادكم ايه عشان احنا داخلين على ايام صعبة ⚠️
اولا صباح الفل على احلى عملاء فى الدنيا ❤️ طبعا ناس كتير بتبعت تسألنى انا مختفى ليه و الحقيقة انى كنت مختفى عشان كنت بعمل ليكم مفاجأة و هى انى عملت اخيرا ( مزرعة شواية اللحمة ) و ده كان حلم عندى من زمان انى يبقا عندى مزرعة عجول و خرفان برقى عشان اقدر اتحكم فى كواليتى اللحم اللى بتاخدوه من عندى ... و بالفعل افتتحت المزرعة و عملت فيها تجهيزات بجد محترمة و سافرت مطروح فى منطقة جنب مطروح فى وسط الصحرا عشان اجيب لكم الخرفان البرقى الحر الاصلى بتاعة ليبيا لان من اهم اسباب انى افتح مزرعة هو انى مقتنع ان مفيش حد فى القاهرة كلها بيبيع برقى حر ١٠٠% او على الاقل انا ماشوفتش برغم انى متابع جيد و غاوى برقى ... المهم اللى عايز اقوله ليكم انى قعدت شهور والله بذاكر و بدرس انواع العلف و روحت لاكبر دكاترة تغذية حيوانية فى مصر و كمان بعت لدكاترة برة مصر عشان اوصل لافضل و احسن توليفة علف طبيعى مفيهاش اى هرمونات او اعلاف مصنعة و تدى افضل نسبة دهون و لحم و عملت علفة محترمة عبارة عن فول و ذرا و صويا و شعير و رده و كلها حجات ممكن الانسان نفسو ياكلها عادى ... و مش بس كده دنا لفيت مصر كلها بالعربية عشان ادور على احسن موردين اعلاف و اجيب انضف خامات و كل ما كنت اروح لمكان عشان اعمل فيه تركيبة العلف بتاعتى ميصدقوش نفسهم انى عايز اعمل طن علف بالمبلغ ده لان الاعلاف اللى السوق شغال بيها تقريبا بنصف تكلفة طن العلف اللى انا بعملو على ايدى .... مش عايز اطول عليكم بس حبيت اوريكم مثال بسيط احنا وصل بينا الحال لايه عشان تاخدو بالكو بتأكله ولادكم ايه لانى دايما بقول ان ( الغالى رخيص ) ... اللى فى الصورة قدامكم ده اعلان ظهرلى على الفيسبوك من ضمن اعلانات كتير بقت تظهرلى ليها علاقة بالانتاج الحيوانى من ساعة ما ابتديت اجهز المزرعة !! متخيلين ان الكنسة بتاعة الافران بقت تتباع ؟ و طبعا اللى بيكنس ده اكيد مش بيمسك اللى كنسو و ينقى منه الزبالة فا انت و رزقك بقا شوية مسامير او اعقاب سجاير او صراصير و طبعا غير البكتريا و الفطريات مطرح جزم اللى شغالين اللى بيمشو بيها فى الشارع يدوسو على بلاوى 😱 دنا اكتشفت كمان ان فى ناس بتأكل الخرفان و العجول بتاعتها مخلفات مصانع البسكوت و الشيبسى و بلاوى والله ... و انا اللى ضربت مشوار ٥٠ كيلو عشان اجيب ١٠٠ كيلو شعير فى عربيتى عشان الشعير اللى كان قريب منى كان فيه تراب 😂 لا و كمان جايب سقايات اوتوماتيك للخرفان و العجول عشان يشربو مياه نضيفة اول باول 😂 ان شاء الله ربنا مش هيضيع مجهودى و الناس هتقدر الحاجة النضيفة ❤️
