25/04/2026
🟨 "مش هتكسب لوحدك حتى لو التورتة كلها معاك"
في وقت بقى فيه ناس كتير فاكرة إن النجاح يعني تمشي لوحدك،وتكسب لوحدك،وتاخد كل حاجة لنفسك..
وهنا تيجي حكمة الحاج محمود العربي رحمه الله وتفتح عينك على الحقيقة لما بيقولك
🟡 "اللي فاكر إنه هيكسب أكتر لو فكر في نفسه بس… يبقى غلطان جدًا، واللي متخيل إنه يقدر يحقق كل اللي عايزه لوحده وسط المنافسة من غير فريق متعاون ومتفهم ومحب لبعضه، ده برضه غلطان..إيه العقل اللي يخلي الواحد يرضى بالأقل بس علشان يبقى معاه التورتة كلها لوحده؟!
🟡 خليني أحكيلك حاجة بتحصل كل يوم
شخص قرر يبدأ مشروع وعنده فكرة كويسة فعلًا
بس قرر يعمل كل حاجة بنفسه:
هو المدير، وهو المحاسب، وهو المسوق، وهو البياع
👈 ليه؟
علشان "يوفر فلوس" أو لأنه مش واثق في حد.. بس بعد فترة يبدأ يتعب، يتلخبط والجودة تقل والشغل يقف أو النمو يكون بطئ وفي الآخر يقول "السوق صعب"
لكن الحقيقة المشكلة مش في السوق المشكلة في فكرة إنك تنجح لوحدك
🟡 في عالم البيزنس والاقتصاد:
أكبر الشركات في العالم ما قامتش على فرد قامت على فرق
▫️ فريق بيفكر (فريق الاستراتيجية والتخطيط أو الـ Strategy & Planning Team)
▫️ فريق بينفذ (فريق العمليات أو الـ Operations Team)
▫️ فريق بيبيع (فريق المبيعات وتطوير الأعمال أو الـ Sales & Business Development Team)
▫️ فريق بيطور (فريق البحث والتطوير أو الـ Research & Development - R&D Team)
كل واحد ليه دور وكل دور بيكمل التاني
🟡 المشكلة إن بعض الناس بتفكر كده "أقلل الناس، عشان أكسب أكتر"
بس الحقيقة العكس تمامًا كل ما فريقك كان أقوى كل ما نصيبك في التورتة يكبر وأنا أقصد هنا حصتك في السوق وأرباحك كمان.
🟡 فالفكرة مش إنك تدي غيرك من نصيبك الفكرة إنك تكبر النصيب نفسه.. وده مش بيحصل إلا لما:
▫️ تختار ناس صح
▫️ تبني ثقة
▫️ تشتغلوا على هدف واحد
▪️ فاللي قاله الحاج محمود العربي مش مجرد كلام ده خلاصة تجربة واحد بنى إمبراطورية وكان دايمًا بيؤمن إن:
"النجاح الحقيقي جماعي مش فردي"
👈 فاسأل نفسك السؤال ده:
هل أنت بتحاول تمسك كل حاجة لوحدك؟ ولا بتبني فريق يساعدك تكبر أسرع؟
🟡 الخلاصة:
اللي بيدور على مكسب صغير لوحده بيخسر فرصة مكسب كبير مع فريق
💬 شاركني رأيك:
هل شايف إن الشغل الجماعي بينجح الشغل أسرع؟
