23/03/2025
مساء الجمال .... مساء السعادة والهنا... مساءكوا هادي ونادي بإذن الله... مساءكوا قهوة مضبوطه تعدل المزاااج ☕️❤️☕️❤️
طول عمره شهر رمضان معروف ... انه شهر اللمة ... شهر العيلة وعيلة العيلة .... شهر تجميع الحبايب اللي لهيتهم الدنيا عننا وشغلتهم .... شهر العزايم والولايم ... شهر الرجوع للاصول .... شهر البيت الكبير اللي بيلم في حضنه ... اللي غاب عننا سنين ... شهر فتح بيوت العيلة وتجميع العمام والعمات والخلان والخالات... شهر الولاد وولاد الولاد ... شهر القرايب اللي جايين من البلد شايلين ومحملين خيرات البلد للحبايب اللي سرقتهم ليالي القاهرة
صحيت الصبح من بدري .... وفتحت الراديو على إذاعة القاهرة لأجل اسلي نفسي وانا باشتغل في البيت ... وسمعت بداية حلقة إلى ربات البيوت اللي بتقدمها صفية المهندس .... دخلت فتحت الشيش بتاع الشبابيك والبلكونات لأجل نسمة الهوا بتاعت الصبح تدخل البيت وتملاه خير وبركة.... وبدأت في تنضيف البيت ... كنت عايزة البيت النهاردة يشف ويرف من النضافة.... اصل امبارح كان عيد الام والنهارده عيد ميلادي وانا عارفه ان ان شاء الله النهاردة الكل جاي علشان نحتفل بعيد الام ... في البيت الكبير نقعد سوا نفتكر ست الحبايب الله يرحمها ونفتكر كلامها وحركاتها ... ضحكتها وقفشتها اللي بتخلينا نضحك من جوا القلب .... كانت الله يرحمها اول ما تصحى من النوم ... تقولي كل سنه وانت طيبه يا مهوكا... ده اسم الدلع اللي كانت بتقولهولي... وتقعد تحكي معايا ... نعمل اكل ايه النهاردة يا مهوكا ... وتبدأ في طلبتها ...كانت ايام حلوة
دخلت المطبخ وقعدت افكر ... حسيت نفسي هفاني كده على طاجن لحمه بالبصل من اللي قلبك يحبه ... عنها ...
👈طلعت حتة لحمة من التلاجة ... وحطيتها في حلة على النار تتسلق ... زودت لها بصلاية متقطعة وشوية حبهان وفلفل اسود ... وكام عود قرفة وكام ورقة لورا وسيبتها تاخد راحتها ... لحد ما بقت تلتين سوا .
👈طلعت طاجن فخار من بتوع زمان ... كان بتاع حماتي رحمة الله عليها ... طاجن اصلي من الصعيد .... قطعت فيه بصل كتير وحطيت عليهم حتة سمنه بلدي كبيرة ودخلته الفرن من تحت ... على أرضية الفرن مباشرة ... وسيبت فيه البصلايه لحد ما احمرت كده وبقت لونها دهبي... يعني اتكرملت كده وبقى ريحتها وطعمها مسكر ... طبعا كل شوية افتح عليها اقلبها
👈نزلت عليها باللحمة... وحمرتها مع البصلة نص دقيقة مش اكتر
👈صفيت الشوربة ونزلت بيها على الطاجن .... وزودت عليها الملح وقلبتها كويس ودخلتها الفرن تاني ... وسيبتها تاخد راحتها في السوى ... بس كل شوية ابص عليها وازودلها شقشاق شوربة (الله يرحمك يا امي) لحد ما اللحمة استوت وبقت مهيه (دي كلمة صعيدي معناها بقت مستوية مهريه)
بس وعنها قبل آذان المغرب بربع ساعة قفلت عليها بس سبتها جوا الفرن لأجل تفضل سخنه
ضرب المدفع واتلم الحبايب على الفطار .... اللي ياكل حتة لحمة واللي يشرب كوباية عصير ... عيال تاخد حتة بيتزا او واحدة سمبوسك وتروح تجري بعيد بيها ... والكل قاعد مبسوط ... خلصنا الفطار وجبنا التورتة واتلمينا واحتفلنا ... ربنا يديم علينا لمتنا
طولت عليكم ووجعت دماغكم ...بس قعدتكم ما تتملش ... قوليلي قومي شوفي اللي وراكي ... فوتكوا بعافيه
