17/02/2026
Dámonos conta do que temos cando o perdemos, e a nosa pregoeira, Mercedes Vázquez, botou a faltar o caldo de ósos moi cedo: sendo unha cativa, cando viaxou 36 horas en tren dende Galicia a Cataluña para ir estudar. Alí, lonxe da súa terra, botou por primeira vez de menos o noso caldo, e así o contou o domingo en Taboada ante centos de persoas.
O típico prato de Taboada leva presente toda a vida de Mercedes, como destacou no fermoso pregón da Festa do Caldo de Ósos. Un prato que e bó para espantar a fame e tamén o frío, símbolo dese lugar, a cociña, "espazo de encontro" no que o caldo ule a fogar e a agarimo.
"Se o caldo é de Taboada xamais o vas esquecer, que viva o caldo de osos”, rematou a nosa pregoeira o seu canto de amor á nosa terra, 🥰.
Puxo así punto final ao acto institucional da festa, que abriu o concelleiro Manuel Diéguez e no que tamén inverviron o tenente de alcalde, José Portela, e o alcalde do Concello de Taboada, Roi Rigueira.
Queremos agradecer a súa presenza a todas as autoridades que quixeron acompañarnos o domingo en Taboada: aos alcaldes e concelleiros dos concellos da contorna; á conselleira de Medio Rural, María José Gómez; á presidenta da Deputación de Lugo, Carmela López; á deputada do BNG no Parlamento Europeo, Ana Miranda, e á deputada de Cultura da Deputación, Iria Castro.
Despois do acto institucional todas as autoridades tiveron a oportunidade de percorrer o recinto da festa e saudar a todos os produtores e artesáns.
Grazas a todos por acompañarnos!
