04/06/2025
Barsiisummaan Bu’uura Ijaarsa Biyyaafi Hangafa Ogummaa Hundaati!
= = =
Ijaarsa biyyaa itti fufinsa qabuufi ce’umsa hunda galeessa ta’e milkeessuuf barnoonni bakka olaanaa qaba. Barnoonni madda beekkumsaa, dandeettiifi ogummaa waan ta’eef jijjiirama diinagdee, hawaasummaafi siyaasaa milkeessuufis ta’ee gabaa addunyaa keessatti badhaadhina milkeessuuf murteessaadha.
Akka hayyoonni addunyaa tokko tokko jedhanitti barnoonni meeshaa waraanaa humna guddaa qabuufi ce’uumsa addunyaatif paaspoortii imala jijjiirama dhalootaa akka ta’e kan ibsamuudha. Kanarra ka’uun adeemsa imala jijjiiramaa keessatti dhaloota gara fuulduraatti tarkaanfachiisuuf boru kan warra har’a itti qophaa’ee barateefi hojjetee waan ta’eef, har’a keenyaan boruu dhalootaa ijaaruun hundaa ol murteessaa waan ta'eef xiyyeeffannoon irratti hojjetamaa jira.
“Falaasamni kutaa mana barumsaa dhaloota tokko keessatti, falaasama mootummaa isa itti aanutti” jechuun kan dubbate Abrahaam Liinkan, yoo ta’u, “Barnoonni meeshaa waraanaa humna guddaa qabuufi addunyaa jijjiiruuf itti fayyadamuu dandeessudha kan jedhe ammoo Nelson Maandeellaadha.
Kanaaf barnoonni humna guddaa qabuun addunyaa kana bakka jireenyaa gaarii taasisuufis ta’e fayyadamuuf meeshaa jabaadha. Yaadamaa, akeekaafi faalasamaa jijjiirama addunyaan itti dhimma bahaa jirtu keessaa barnoota, saayinsiifi teeknoloojiin babal’isuun galma yaadame gahuuf qoodni barsiisaa guddaadha.
Barsiisaan hojii dhaloota qaruu irratti bobba'uun ogummaasaan dhaloonni jijjiirama addunyaa keessatti akka qooda fudhatan taasisuun sochiin diinagdee, hawaasummaafi siyaasaa akka milka’uuf kan hojjetuudha. Akkasumas ergama guddaa dhalootaan itti kennameefi dirqama ogummaa isaa bahachuun ijaarsa biyyaa gama hundaan dhugoomsuufi biyya hundaaf taatu ijaaruun dhaloota dhaalchisuu keessatti gahee bakka bu’ummaa hin qabne bahachaa kan tureefi ammas bahachaa kan jiruudha.
Mootummaan naannoo Oromiyaas hojii gama kanaan hojjechaa jiruun qulqullina barnootaa fooyyessuuf qorannoofi qu'annoon deeggaramuun dhaloota qaamaafi sammuun gahoome harachuufi dandeettii gahuumsa barsiisotaafi barattootaa cimsuun biyya jabduu hundaaf taatu hundaan ijaaruuf kallattii hundaan xiyyeeffannoo olaanaa kennee hojjechaa jira.BKO
