05/05/2025
【論coating的重要性】
實在好耐好耐無返黎做過嘢，一返到黎感覺對所有工具都變得好陌生。
正需要搵一件木器上手之際，搵到大半年前客人屋企回收返嚟，放置8個月已變形嘅胡桃枱面板。
呢件黑胡桃木回收返嚟時好平整，我當時拎嚟做咗一個小實驗，將底面嘅木蠟油磨走，然後補上清漆，正面保留原有嘅木蠟油，靜止放置一段時間，俾大家可以了解到木材用唔同塗料嘅特性。
8個月過去，木板肉眼可見已變形左右向上彎（圖3），彎曲原因係因為正面同底面嘅塗料有結構性分別。
正面嘅木蠟油本身係一層開放式塗料，滲入木材纖維裡面，滋潤及保護木材，但並不會完全隔絕木材與空氣接觸，換句話說，塗木蠟油嘅木面會受空氣濕度影響，潮濕會令木面發漲，乾燥會令木面收縮；
而底面嘅清漆係封閉式塗料，能想像成係木板表面貼上一層薄膠片，阻隔木材與空氣接觸，阻隔程度就視乎清漆嘅厚度，換句話說就係木頭裡面嘅水份走唔到出去，空氣嘅水份入唔到木裡面。
木板放置咗一個秋冬季後，正面塗木蠟油因為乾燥而收縮，底面清漆阻隔水份揮發，兩面濕度不均衡，慢慢就開始變形。
理論係咁樣，實際亦有公式去計算變形率，唔同木材，樹齡同切割法同方向，對木材變形亦會有影響，係呢度就唔講太複雜。
咁應該揀漆還是木蠟油？無確實答案，鐘意潤澤一啲嘅咪用木蠟，鐘意保護性強啲嘅咪用漆，至於安全性，油性漆有甲醛，水性漆同木蠟油就要視乎用咩牌子。可以肯定嘅係，無論用咩塗料，只要6個面都均衡塗好塗滿，正常都會襟用。
點解無啦啦會提起？因為之前有個客問價錢，問完就去第二度訂，訂完返嚟幾個月開始變形，發現只有正面同4邊有上漆，底無漆，變形然後問我可以點搞，所以就當時就用呢塊板去做例子。
耐無返嚟做嘢，搵啲嘢練下手，將塊黑胡桃木整返平，然後裝上去我地舊有嘅升降枱，放係studio用，純分享。
