01/06/2026
【長文】因為一次對話，我地既紫雲膏，堅持咗 4 年都系呢個價。
多謝《晴報》嘅報導，我地個品牌終於捱出頭啦，更加多謝一路上支持我哋嘅每一個人。由創業到今日，我都無用錢系賣廣告度，因為我將所有資金放晒喺產品同埋信任我哋嘅客人身上（熟我哋嘅客人都知，我真係好鍾意送好多好多 free gift ）。我成日同自己講：「等下，我仲有時間……終有一日，大家會見到我哋嘅用心，會知道我哋呢個品牌！」
💡 4 年前嘅起步
時間番去 4 年前。嗰陣時啱啱創業無耐，資金好有限，好彩有機會同環保超市合作，但因為當時無咩錢，支紫雲膏基本上係接近「裸包」（如圖）就上架，定價 HK$15。上架後我都有落舖睇，心諗：「包裝咁簡單，究竟會唔會有人買架呢⋯⋯⋯⋯⋯」點知上架唔夠兩星期，對方WhatsApp 我話：「紫雲膏賣晒啦！」嗰一刻，我心裡面真係無限滾動，因為我真係無諗過，大家會願意去支持一個咁新、包裝咁樸素嘅本土品牌。好多謝大家願意畀機會我。
後來，慢慢收到好多客人嘅 feedback，知道大家用完之後都好鍾意，我就開始諗，不如將個包裝做好啲啦。到咗 2025 年，我哋進化到今日大家見到嘅多左張硬卡紙介紹既包裝。雖然成本多咗，但價錢一樣係 HK$15。
💬 一次深深震撼我嘅對話
呢 4 年嚟，身邊做生意嘅人總會同我講： 「妳個產品定價咁低，之後好難賣返貴架啦。得個做字，邊有錢賺？」
當我想將產品放上其他大平台嘅時候，又遇到好現實嘅問題： 「妳件貨價錢咁低，根本平衡唔到運費同宣傳成本，分成利潤亦太少，唔吸引，無得做。」現實嘅冷水一盆盆起頭淋落嚟，
直到有一次，我出席一個活動。正路大家都會互相交換名片，介紹自己公司做啲咩。坐喺我隔籬嘅女士係做 NGO嘅，佢一見到我張名片，好驚訝咁話：「呀！妳哋就係賣紫雲膏嗰間公司？」我當時都嚇一嚇，咁問：「妳用過呀？多謝支持呀！」佢同我講： 「唔係我用過。而係我跟進緊一個單身家庭，佢哋住劏房嘅。環境好差、蚊蟲多，小朋友夜晚瞓覺成日比嘢咬。個媽媽同我講，好在有妳哋支紫雲膏幫手止痕」聽完之後，我成個人呆咗一下，心入面有小小難受。原來喺呢個五光十色、好似個個都過得好精彩嘅香港，喺一啲我哋睇唔到嘅角落，好多家庭仲係生活得好艱難。我亦從來無諗過，自己一手一腳做出來嘅產品，竟然可以幫到經濟上有困難嘅家庭，更加幫到小朋友可以瞓個好覺。HK$15，對大部份消費者嚟講可能只係一杯凍飲嘅價錢，好抵買；但換個角度，對於另一組基層客群，呢個價錢，可能啱啱好係佢哋負擔得起、又可以守護到小朋友嘅極限。
❤ 創業嘅初心（人人買得起個個用得到）
呢次對話，解答晒我心入面所有嘅迷茫。做生意係要睇利潤、睇數據，但如果我淨係睇錢，呢支紫雲膏試完市場反應後一早就要加價，或者一早因為「無錢賺」而放棄咗。但個次之後我知道佢存在嘅價值。賺得極少，唔緊要；最緊要係佢真係可以幫到有需要嘅人。可以幫到基層嘅媽媽減輕少少負擔，可以令劏房嘅小朋友有一晚安穩嘅睡眠，呢一切都已經超越咗盤數上面嘅數字。
最後多謝幫襯過嘅每一位，我地呢間無賣廣告既品牌行到第5年都仲未死，仲生存緊。
最後，介紹多次，我地系香港品牌，希望呢支「紫雲膏」日後會成為香港🇭🇰手信。多謝！
