09/08/2025
THE DAVINCI KAWTI
KEU HAWNNA
LOUVRE 10:45 PM
MUSEUM ENKAWLTU Jacques Saunierea chu museum Grand Gallery panna corridor ah chuan a pai phei tawng tawng a. Corridor bang vel a lemziak ropui leh mawi tak tak intar zinga a ban phak hnai ber carravagio(lemziak hming...google ula, eng ang lemziak nge tih in hmuthei mai ang. St) chu a frame ah chuan a vuan sauh sauh a, a tha tawp in banglai atang chuan a pawtthla hrawih a, chhuatlai ah chuan a zangthal zawng in a tlukpui zui nghal a. K*m 70 mi lai a lo ni ve tawh nen, a tan chu lemziak chu a rit deuh hle mai a, chhuat ah chuan a in delh beh tir ran mai a. Lemziak hnuai ah chuan thaw k**k k**k chungin a mu ran mai a. Rei vaklo a mut hnu chuan lemziak chu nawm sawn in thawhchhuah zai a rel ta a. Chutia, thochhuak tur a muangchang a a thingthit lai tak chuan a hnunglam feet 10 vel atang chuan awki ngaihno bei lo zet mai hian, ''Che tawh hlek suh..!!"a rawn ti vawt raih mai a. Saunierea chu a khawng nghal awt mai a. Aw rawn rikna lam chu zawi muang a inher in a va lehhawi a. Gallery pindan pui leh corridor inkar a daidanna thir tlawn intung tlar pawn lam thim hnuai a amah rawn beitu ding ruangam chu a va hmuthei a. Chupa chu vun var vo mai(albino) leh ria sang zet zawt, a vun ang mai a a sam pawh var vau mai hi a ni a. A mitmeng ngaihnobei lo zet mai chu meiling ang mai hian a sen vam ham mai bawk a. Chu vun var pa chuan thir intung tlar inkar atang chuan silai(pistol) a rawn tin in awki ngaihawm loh zet mai hian, ''Tlanchhe khanglang vel lo la i tan pawh a tha zawk tur a nia leh....awle, tunah chuan khawiah nge in thuhruk min hrilh tawh rawh le..!!"a rawn ti cher cher mai a.
Saunierea chuan a hmai vel chu a theih ang ang a a k*t a inhliahkhuh chungin, ''I thil sawi awmzia hi ka hre lo takzet a ni ka tih tawh kha..!!''a lo ti a.
''Dawt i sawi a ni..!!''a lo ti let tuarh a, a mitmeng sen rum mai chuan a rawn melh run mai bawk a, ''Nang leh i sangawizawnpui te hian in ta ni hauh lo thil in kawl a ni..!!''a rawn ti vethung a.
Curator (Saunierea hi louvre museum curator a nih avangin a changin curator kan ti ang a, a chang leh Saunierea kan ti ang....buaina tur a awm lo...amah vek a ni e. St) rilru chu mak tihna leh hlauhthawnna inpawlh hian a rawn luhkhung nghal zawk mai a. He puithiam lemchang pa hian engtin nge he thuruk hi a lo hriat ve mai theih le..!!!?
Puithiam vun var pa vek chuan, ''Zanin ngei ah hian a enkawltu tur dik tak chu a rawn kir leh ta a ni..!! In thuhruk na hmun dik tak chu min hrilh la, tichuan, i nunna hnaisailo zet hi ka zuah sak dawn che nia..!!''tih pah in a silai chuan Curator lu zawn ah tak chuan a rawn tin va mai a, ''In thuruk vawn hi thihpui tham a ni chiah maw..!?''ti in a rawn vehthlem kual vel a.
Saunierea chu thawk pawh a thaw tha hleithei tawh lo..!! Puithiam lemchang pa lah chuan a lu chu han thle deuh in, silai dawt leh Saunierea lu chu a han en zawn vel a. Chutah zet zawng Saunierea chuan a tuar chhunzawm thei ta ngang lova, a k*t chu pharchhuak in, ''Awle.....lo nghak lawk la..''ti in, muangchangin, ''I hriat duh chu ka hrilh dawn che nia,''a ti ta nge nge a. Chutah, a thusawi leh tur chu fimkhur taka ngaihtuah chung in, hetiang thil an tawn hun a sawi tur atan a an thu vawn, engtikah mah sawi ngai lo se ti a duhthusam chung a vawi za tam a sawi dan tur pawh an lo zir fo tawh thin ''dawt'' chu puithiam vun var-a hnen ah chuan a hrilh ta a.
Saunierea'n a sawi tur zawng zawng a sawi zawh chuan vun varpa chu a nui a, ''Awle...kha chiah kha a ni i sangawizawnpui mi pathum te pawh khan min hrilh ni. Tunah chuan thudik ngei a ni tih a chiang ta..!!''a ti a.
Chu thu a hriat rual chuan Saunierea chu a tiril ah a tim nghal ur ur mai a. Insum pawh insum hman lovin, ''Midang pathum a..!!?''ti in a rawn au thawt a.
Puithiam-a chuan ngeiawm zet hian, ''Aw, ni chiang e..! An ni pawh ka zawng hmu vek tawh a lawm. An pathum khan tuna i sawi ang chiah bawk kha a ni min hrilh ni..!!''ti in a lo chhang a.
A ni thei lo...!!! Saunierea chu hlauhthawn na namen lo hian a rawn bual nghal hlup hlup mai a. Saunierea nihna dik tak leh a sangawizawnpui, a ''senechaux'' pathum te nihna dik tak hi tuma hriat loh tur a vawn that ni a. A pawimawh dan pawh an thuruk ropui thiltithei tak vawn that nen hian a intiat thual awm e...chutiang khawp a thuruk pawimawh chu a ni. (Priory of Sion pawl a h hian an hotu ber Grand master a awm a, a hnuai ah a thachhangdawltu mi pathum, ''Semechaux'' an tih te chu an awm leh a ni. St) Saunierea chuan a dawt sawi ang thi kha he puithiam lemchang pa hnenah hian anmahni a that hma khan an lo hrilh ve chiah tho a ni tih chu phat rual a ni tawh lo. Tin, chutiang a tih chu an inzirtir dan pawh a ni reng a ni..!!!
Amah rawn beitupa puithiam lemchang-a chuan a silai chu lek kang leh in Saunierea chu a tin ta vang mai a,''Nang hi i thih ve hun chuan keimah chauh hi he thuruk hretu awmchhun hi ka ni tawh dawn a ni,''a han ti zui a.
Thuruk maw..!!! Chu thu a hriat rual chuan Saunierea chuan a dinhmun hlauhthawnawm zia leh manganthlak zia chu a hrechiang lehzual kuarh kuarh mai a. ''Kei hi ka boral ve leh si chuan he''thuruk ropui' hi chatuan atan a boral hlen dawn a ni,''tih ngaihtuahna chuan a rilru chu a rawn thawng nghal ut ut mai a..!! Damchhuah ngei duhna thinlung paukhuah chuan a rilru chu a rawn luhkhung thut a, in phenna tur zawng in a hawi kual nghal ruai ruai a.
Mahse, chutihlai tak chuan silai a rawn puak thuai a, a pum a silai mu lut sa vawt chu Saunierea chuan a hre zui nghal bawk a. Hmalamah chuan a bawk nghal thlawp a. Na tuar in a vial nghal ngawl ngawl mai a. Chutah, a theih ang tawk a inti pachang luiin, a han zangthal thei hram a. Harsa ti tak chungin amah rawn beitupa lam chu a va en phei hram hram a.
Ani lah chuan Saunierea lu zawn tak chu uluk em em mai hian a rawn tin zawn leh a. Saunierea tan chuan thih mai loh chu tihtheih dang a awm tawh lo..!!!! Silai mu in a lu a rawn verh hun chu maimitchhing chungin a lo nghak tawp mai a ni. A mgaihtuahna leh rilru chu pawi tihna leh inchhirna hi a inpawlh nuaih mai a. Chutia, silai mu nghak a a mai mitchhin reng lai chuan pindan chhung reh reiuh ruih ah chuan silai tlawlh ri chu a ri khawk ta tlak mai a..!!
Chuvelleh curator chuan a mit chu a rawn meng leh a. Misualpa chuan a silai chu a han thlek deuh vang vang a, a nuih a za deuh ni te pawn a lang..!! A ipte a silai mu dang ala ah chu a han dap rak rak a, mahse, a rilru a thlak leh ni ngei tur a ni, silai mu chu lachhuak ta lo chuan Saunierea pum a silai mu luhna atanga thisen rawn luang chhuak zawih zawih chu en in, nui dung chian, ''Helai hmun a ka hna chu ka zo fel ta..!!''a ti a, a kalbo zui ta nghal a.
Curator chuan chhuatlai a mu chung chuan harsa ti takin a pum a silai mu luhna kaw phat chuba zuk en a. A pum a silai mu luhna zawn a kamia chu a a sen val kual pap mai a. A awm ruh hnuaichiah ah a ni nghe nghe, ''Ka pumpui ah a lut a ni ngat mai..!!''tiin a ngaihtuah zui a. Silaimu khan a thinhnun ah tak a verh tlang lo kha a vanduaithlak zawk te pawh a tih theih awm e. Saunierea hi 'La Guerre d' Algeria'(Algerian War laia sipai rothap pawl.st) sipai hlui a ni a. Sipai a a tanlai khan rapthlak tak tak a a sipai thiante leh hmelma te pawh rapthlak tak tak a an thi lai a lo hmu fo tawh a. Algeria war hunlai a a thil tawn tam tak avang leh mihring thih dan rapthlak tak tak chi hrang hrang hmun leh hmun ah a hmu fo tawh anih avangin tuna a dinhmun that loh zia pawh hi chiang takin a hria. Reilo te ah silai mu in a pumpui a verh kuak atang chuan a pumpui chhung a Acid chu rawn hnam chhuak in a a thinhnun lamah a luang lut chho ang a. Tichuan, chu Acid chuan zawi muang in, na tak tuar chungin a eihlum dawn a ni..!! Chutiang thil a thlen hma chuan minute 15 erh awrh bak a nei tawh lo tih a hrechiang bawk..!!
Chutiang vel a ngaihtuah lai chuan misualpa khan, ''Na tawrh te hi chu thil tha tak a ni a sin..!!'' a rawn ti leh hram a, a bi bo zui ta nghal a...!!
Tunah chuan amah chuah tak takin chu Louvre museum chhungah chuan a awm ta.!! Corridor leh Grand gallery daidangtu thir tuntlar gate lam.chu ava melh leh a. He building lian zet mai chhungah hian amah chauh tak meuh meuh in a tang ta...chu thirtlawn gate lah chu minute 2 lo liam a ral leh hma chuan tuman an rawn hawng dawn lo tih chu amah aia hrechiang tumah dang an awm chuang lo,!! Tin, chu gate chu an rawn hawn theih hun meuh chuan a ni chu a lo thi daih tawh dawn a ni tih pawh chiang takin a hre bawk..!! Chutiang chu a dinhmun ni mahse, thihna tih vel ai chuan an thuruk vawnthat, hmasang atanga an lo inhlanchhawn tawh, finna thuruk bo mai tur aia hlauh zawk chu a nei lo..!! Chu thuruk bo mai tur lakah chuan thihna te cbu engmah a ni lo tih a hrechiang..!!
''He thuruk hi tuemaw mirintlak tawpkhawk hnen a ka hlanchhawn ngei a ngai a ni..!''tih bak chu a rilru ah eng dang mah a awm thei tawh lo..!!
A Senechaus pathum thi tawh te hmel chu a mitthla ah an rawn lang uar uar a. Tichuan, a chakna zawng zawng sawnkhawm in a han dingchhuak tawng tawng a..!! Tunhma lama he thuruk lo vawnghim tawh thintute leh he thuruk an vawnhim theih nan a harsatna chinhrang chi hrai an lo paltlang tawh thin te chu a han ngaihtuah let a.
Finna leh Hriatna thirhrui khaidiat vawikhatmah la chat ngailo ngei mai chu..!!!
Thawklehkhatah venhimna an lo neih ve thin zawng zawngte chu tihchhiat vekin a awm a. Jacques Saunierea chauh chu chu 'Hriatna thuruk' vawnghimtu khaidaiat thlunzawmtu awmchhun chu a ni tawh a. Chuhriatna thuruk, thiltitheihna namen lo nei ngei mai chu..!!!
Khur hlawk hlawk in a han dingchhuak a.
''Kawng eng emaw ka zawn hmuh ngei ngei a ngai a ni...tu hnenah emaw tal ka hlanchhawn a ngai..!''
Amah lah chu chu Jail chhunga tang ang mai in Grand Gallery chhungah chuan a tang tlat mai bawk si a. Tin, chu hriatna thuruk ropui meichher la alh teng teng chu tunah hian amah k*tah a awm mek a. Tin, chu meichher chu ngaihngam taka a hlanchhawn theihna mihring pakhat chiah he khawvel ramzau ah hian a awm tih a hre bawk..!! Tanin ang mai a a tanna pindan chhung chu a han thlirkual vel a. Banglai a khawvel lwmziak hlu ber ber leh ropui ber ber te chu lungchim tak hian a han thlirkual a. Chung lemziak te pawh chuan an thin hlui, k*m tam tak an lo hmelhriat tawh ang mai hian rawn thlir let hian a hria a. Na tuar a then sawk sawk chungin a taksa chaklo tak chu a ahan dinchhuahpui a, a taksa a thahrui tlem la awm te chu a tangkai thei ang ber a hman tum in, arilru pawh tunhma zawng a a lo hman thin aia a let a hman tum in, a hma a tih tur hautak em em mainti tur chuan a bei tan ta a..!!!
***-****--******
