کتێبخانەی گشتی چەمچەماڵ

کتێبخانەی گشتی چەمچەماڵ کتێب پایەی کۆمەڵگایە

وەفدێکی رۆشنبیری شاری کەربەلا سەردانی کتێبخانەی گشتیان کرد ئەمڕۆ پێنج شەممە ٢٠ی ئاب نوێنەرانی (العتبة الحسینیة المقدسة) ...
20/08/2026

وەفدێکی رۆشنبیری شاری کەربەلا سەردانی کتێبخانەی گشتیان کرد

ئەمڕۆ پێنج شەممە ٢٠ی ئاب نوێنەرانی (العتبة الحسینیة المقدسة) لە شاری کەربەلاوە سەردانی کتێبخانەی گشتی چەمچەماڵیان کرد و لەلایەن هێرش عبدالرحمن بەڕێوەبەری کتێبخانە و ژمارەیەک لە فەرمانبەرانەوە بە گەرمی پێشوازیان لێکرا.
وەفدەکە بەسەرۆکایەتی بەڕێز مەهدی سەعدی و ئەندامێتی عەباس خەفاجی بەڕێوەبەری هۆبەی پەیوەندی و چالاکییەکان و حسین عدنان و محەمەد تەمیمی بەڕێوەبەری سەنتەری منداڵان لە شاری کەرکووک هاوڕێ لەگەڵ بەڕێز دلێر شوانی بەڕێوەبەری پەیوەندییەکانی پارێزگای کەرکوک بوون.

لە سەردانەکەیاندا بەشەکانی کتێبخانەی گشتیان بەسەرکردەوە کە بەهۆی لافاوەکەی ٩-١٢-٢٠٢٥ زیانی زۆری پێگەیشتبوو، دوای گفتوگۆ و ڕاگۆڕینەوە بەڵێنی هاوکاری و هەماهەنگی هەردوولا کرا و ژمارەیەک کتێبیان پێشکەش بە کتێبخانەی گشتی کرد کە لە شاری کەربەلاوە هێنابوویان.
بەڕێوەبەری کتێبخانەی گشتیمان وێڕای بەخێرهێنانیان سوپاس و پێزانینی کتێبخانەی گشتی بۆ هەوڵەکان و پێشکەشکردنی کتێبەکانیان دەربڕی، وهیوای هەماهەنگی بەردەوامی بۆ دەربڕین.

حسێن عارف چیرۆکنووس و ئەدیبی ناوداری کورد کۆچی دوایی کردسلێمانی، پێنجشەممە (13ـی ئابی 2026)مامۆستا حسێن عارف، لێکۆڵەر، چ...
13/08/2026

حسێن عارف چیرۆکنووس و ئەدیبی ناوداری کورد کۆچی دوایی کرد

سلێمانی، پێنجشەممە (13ـی ئابی 2026)

مامۆستا حسێن عارف، لێکۆڵەر، چیرۆک و ڕۆماننووسی ناوداری کورد، لە تەمەنی 90 ساڵیدا کۆچی دوایی کرد. بەو هۆیەوە وەزارەتی ڕۆشنبیری و لاوانی حکومەتی هەرێمی کوردستان پرسە و سەرەخۆشی لە بنەماڵە و کەسوکار و هاوڕێ و نووسەر و ئەدیبانی کورد دەکات. لە ماوەی ژیانیدا مامۆستا حسێن عارف، ناوێکی دیار و قەڵەمێکی سەنگینی بواری ئەدەب و ژانرەکانی ڕۆمان و چیرۆک و لێکۆڵینەوەی ئەدەبی بوو، بەرهەمەکانی بۆ هەمیشە وەک سەرچاوەیەکی بەهاداری مێژووی ئەدەبی کوردی بە گشتیی و چیرۆکی هونەری کوردی بە تایبەتی دەمێننەوە. گیانی شاد و یاد و یادگاری هەمیشە زیندوو بمێنن.

پرۆفایلی مامۆستا حسێن عارف
ناوی تەواوی حسێن عارفی کوڕی مەلا عەبدولڕەحمانی کوڕی محەمەد ئاغای کوڕی ئیسماعیل ئاغایە. باپیرە گەورەی دوای دامەزراندنی سلێمانی، لە (قەڵا چوالان) ە وە هاتۆتە ناو شارەوە. لە 1936 لە شاری سلێمانی لەدایکبووە.

زیاتر لە نیو سەدە قەڵەمەکەی لە خزمەتی ئەدەبی کورد و چیرۆک و لێکۆڵینەوەی ئەدەبیدا بووە و دەیان شاکاری بەچاپ گەیاندووە.

لە خەباتی سیاسی و نەتەوەیی کوردستاندا بەشدارییەکی کارای کردووە و لە دوای ڕاپەڕین ئەندامی یەکەم خولی پەرلەمانی کوردستان بووە و لەو چوارچێوەیەدا بە هەڵوێستی نیشتمانیانەی دژ بە شەڕی ناوخۆ دەناسرێتەوە.

یەکێک بووە لە ئەدیبە دامەزرێنەرەکانی بزاوتی ڕوانگە و ڕۆڵێکی کارای هەبووە لە نوێکردنەوەی شیعری کوردی. هەروەها ئەندامی یەکێتی نووسەرانی کورد و سەندیکای ڕۆژنامەنووسانی کوردستان بووە.

لە ماوەی ژیانیدا وێڕای کارکردنی لە گۆڤارە کوردییەکاندا، زیاتر لە بیست بەرهەمی بەچاپ گەیاندووە، لە دیارترینیان:

شار، بەرگی یەکەم: 1986، بەرگی دووھەم: 2001؛ چای شیرین: سەرجەم چیڕۆکە کورتەکان، گەلە گورگ. چوار چیرۆک 1983، کۆکتێل 2005، تەمەنێک لە بندەستی، توێشووی سەفەرێکی سەخت، بیبلیۆگرافیای دوو ساڵەی تەمەنی کاروان 1982 – 1984، ئەندێشەی مرۆڤێک، ساڵێک لە تەمەن: بیرەوەری حسێن عارف، شانۆگەری جەنابی جانەوەر، قوتابخانەی شیعری تازە، ھێلانە، کڵافەیەک ژانی تووڕە.

هەروەها لە بواری لێکۆڵینەوەدا ژمارەیەک بەرهەمی بەچاپ گەیاندووە، لەوانە:
• چیڕۆکی ھونەریی کوردی
• بیبلیۆگرافیای چیرۆکی کوردی
• روانگە و یاران و نەیارانی
• لە کۆڕی خەباتا: چیرۆک لە بەرھەمی دوای شۆڕش
• نووسینەوەکانم لە بواری رەخنە و لێکۆڵینەوەدا ساڵانی 1955 – 1988.
بەسوپاسەوە لە وەزارەتی ڕۆشنبیری و لاوان وەرگیراوە.

کتێبخانەی گشتی هەولێر هەزاران کتێب پێشکەش بە کتێبخانەی گشتی چەمچەماڵ دەکاتچەمچەماڵ ٢٩-٧-٢٠٢٦ئەمڕۆ چوارشەممە خاتوو ناز فە...
29/07/2026

کتێبخانەی گشتی هەولێر هەزاران کتێب پێشکەش بە کتێبخانەی گشتی چەمچەماڵ دەکات

چەمچەماڵ ٢٩-٧-٢٠٢٦

ئەمڕۆ چوارشەممە خاتوو ناز فەلەکەدین کاکەیی بەڕێوەبەری کتێبخانەی گشتی هەولێر هاوڕێ لەگەڵ شاندێکی کتێبخانەگشتییەکەیان سەردانی کتێبخانەی گشتی چەمچەماڵ-یان کرد لە لایەن هێرش عەبدولڕەحمان بەڕێوەبەری کتێبخانەی گشتی چەمچەماڵ و بەشێک لە فەرمانبەرانمانەوە پێشوازیان لێکرا.

لە سەردانەکەیاندا پاش گفتوگۆکردن لەسەر رەوشی خوێندن و خوێندنەوە و کتێبخانەی گشتی نزیکەی (٠٠٠ ١٠) کتێب لەسەرچاوەی جۆراوجۆریان پێشکەش بە کتێبخانەی گشتی چەمچەماڵ کرد.

بەناوی کتێبخانەی گشتی چەمچەماڵ وێڕای سوپاس و پێزانینمان بۆ بەڕێزیان و هەموو ئەو بەڕێزانەی هاوکار و هەماهەنگ بوون لە کەمپینەکانی کۆکردنەوەی کتێب هیوادارین نموونەیان زۆربێت .

لەهەمانکاتدا بەڵێن بە خوێنەران و شەیدایانی کتێب ، نووسەران و توێژەران و خوێندکاران دەدەین کە دوای نۆژەنکردنەوەی بینای کتێبخانەکەمان سەرجەم سەرچاوە و کتێبەکان دەخەینە بەردەستیان.

پرسەنامەهاوڕێ و هاوکار و فەرمانبەرمان (قانع ڕۆستەم) بەناوی کتێبخانەگشتییەکانی چەمچەماڵەوە پرسە و سەرەخۆشی خۆمان ئاڕاستەی...
06/07/2026

پرسەنامە
هاوڕێ و هاوکار و فەرمانبەرمان (قانع ڕۆستەم) بەناوی کتێبخانەگشتییەکانی چەمچەماڵەوە پرسە و سەرەخۆشی خۆمان ئاڕاستەی بەڕێزتان دەکەین بە بۆنەێ کۆچی دوایی( مەجید حاجی ڕۆستەم)ی براتان.
داواکارین لەخودای گەورە سەبوری بەڕێزتان و خانەوادەکەتان بداتەوە، جێگەی کۆچکردووش بەهەشتی بەرین بێت.

کتێبخانەی گشتی چەمچەماڵ
٦/٧/٢٠٢٦

پرسەنامەدڵتەنگ و خەمبارین بە کۆچی دوایی شاعیر و نووسەری بواری ئەدەبی منداڵان و پەروەردە ( مامۆستا ئەسعەدی لوڕزادە)داواکا...
30/06/2026

پرسەنامە
دڵتەنگ و خەمبارین بە کۆچی دوایی شاعیر و نووسەری بواری ئەدەبی منداڵان و پەروەردە ( مامۆستا ئەسعەدی لوڕزادە)
داواکارین لەخوای گەورە سەبوری خانەوادەکەیان بدات وەجێگەی کۆچکردووش بەهەشتی بەرین بێت.
بەو بۆنە خەمناکەوە بەناوی کتێبخانەگشتییەکانی چەمچەماڵەوە پرسە و سەرەخۆشی خۆمان ئاڕاستەی خانەوادەکەیان و سەرجەم نووسەران و شاعیرانی سنورەکە دەکەین ، دڵنیاین کۆچی دوایی مامۆستا کەلێنێکی گەورەی لەنێو ئەدەبی کوردی و بەتایبەتی ئەدەبی منداڵان دروست کرد، پڕکردنەوەی ئەستەم دەبێت.

کتێبخانەی گشتی چەمچەماڵ
٣٠/٦/٢٠٢٦.

شاکر فەتاح چرای ڕۆشنگەری چەمچەماڵشاکر فەتاح یەکێکە لە گەورە ڕۆشنبیر و کارگێڕییەکانی کورد، لەساڵی ١٩١٤ لە گەڕەکی دەرگەزێن...
27/06/2026

شاکر فەتاح چرای ڕۆشنگەری چەمچەماڵ

شاکر فەتاح یەکێکە لە گەورە ڕۆشنبیر و کارگێڕییەکانی کورد، لەساڵی ١٩١٤ لە گەڕەکی دەرگەزێنی شاری سلێمانی بووە تاقانەی دایک و باوکی دەبێت، وەکو خۆی لە پێشەکی کتێبی(کۆمەڵەڕۆژنامەی چەمچەماڵ)دا دەڵێت: لە بنەچەدا لە تیرەی سێتەبەسەری عەشرەتی هەمەوەندن.
لەسەردەمی منداڵی دەنێردرێتە حوجرە و لەدوایدا دەنێردرێتە قوتابخانە قۆناغەکانی خوێندنی سەرەتای لە سلێمانی و دواناوەندی و کۆلێژی ماف(حقوق)ی لە بەغداد تەواوکردووە، ساڵی ۱۹۳٦ بڕوانامەی بەکالۆریۆسی لە زانکۆی بەغداد لەوبوارەدا بەدەست هێناوە، بەشێوەیەکی گشتی ماوەی ۳۲ساڵی تەمەنی لەبواری کارگێڕیدا بووه و لەزۆربەی شارو شارۆچکەکانی کوردستان حزمەتی کردووه، بەڕێوەبەری ناحیە وقائیمقامی زۆر شوێنی کوردستان بووە، وەکو(قادرکەرەم، خورماڵ، ئاکرێ، هەڵەبجە، ڕانیە و چەمچەماڵ)، لەگەڵ ئەرک و خزمەتە ئیدارییەکەی، لەبواری نووسین و وەرگێڕاندا خزمەتێکی زۆرتری کردووە.
شاکرفەتاح لەبواری نووسین وئەدەبدا لە ساڵانی چارەکی دووەمی سەدەی ڕابردوودا بەرهەمەکانی لە ڕۆژنامە و گۆڤارەکانی ئەو سەردەمەدا بڵاوکردۆتەوە و خاوەنی سەدان وتار وبابەتە بە زمانەکانی کوردی وعەرەبی لەوبوارەدا ٦٤ کتێب و نامیلکەی بڵاوکردۆتەوە وچەندین دەستنووس و کتێبی دیکەی ماون چاپ بکرێن ولای کەسوکاری پارێزراون.
یەکەم بابەتی ڕۆژنامەوانی لە ٣ی شوباتی ساڵی ١٩٢٧ لە ژمارە (٥٢)ی ڕۆژنامەی ژیان بەناوی(هاواری وەتەنە خۆشەویستەکەمان) و یەکەم کتێبی چاپکراویشی کە چیرۆکی منداڵان بوو بەناوی(خانووی تازە) نووسینی (کامل گەیلانی) وەرگێڕانی شاکرفەتاح ساڵی١٩٣٣ بڵاوکردۆتەوە.
شەهید مامۆستا شاکر فەتاح ئەندامی یانەی سەرکەوتنی کوردان، کۆمەڵەی بژارەکردنی زمانی کوردی، جێگری سەرۆکی یەکێتی نووسەران/لقی سلێمانی، و،کۆڕی زانیاری کوردبووە، لەساڵی ١٩٣٣ لە بەغداد (کۆمەڵەی لاوانی کورد)یان دامەزراندووە لەگەڵ برایم ئەحمەد و مستەفا سائیب و شێخ فازڵ تاڵەبانی وجەلالی میرزاکەریم، لە نێوان ساڵانی ١٩٣٣-١٩٣٤ لە بەغداد بەزمانی کوردی گۆڤاری (یادگاری لاوان و دیاری لاوان)یان دەرکردووە.
ئەگەرچی شاکر فەتاح (ماوەیەك ئەندام‌و جێگری سەرۆكی دەزگا كارتۆنییەكەی مەجلیسی تەشریعی رژێمی بەعس بوو لە ھەولێر، بەڵام بەهەڵوێستێكی بوێرانە‌و بەگیان‌و خوێنی خۆی ئەو لەكەیەی سڕیوەتەوە، ئەویش بەوەی كه‌ له‌سه‌روبه‌ندی ئه‌نفال و لە رۆژانی 11-13ی ئازاری 1988 ئەمیندارێتی گشتیی رۆشنبیری‌و لاوان لەهەولێر چه‌ند سیمنارێكی بەناوونیشانی (گەلی كورد لەویژدانی سەرۆك سەدام حسێن دا) رێكخستبوو.
بەشدارانی ئەو سیمینارە بەشان‌و باڵای سەدام‌و دەستگەوتەكانی رژێمی بەعسدا بۆ كورد هەڵیان دابوو، بەڵام مامۆستا شاكر فەتاح بەپێچەوانەی ئەوانەوە قسەی كردبوو ‌و بەرگری لە شۆڕشی کوردستان ‌و گەل‌و نیشتمان‌و زمانەكەی كردبوو، وتبووی ئەبێ‌ حكومەتی عیراق گفتۆگۆ لەگەڵ هێزە كوردستانیەكان بكات‌و گەمارۆی سەربازی لەسەر شارو گوندەكان لاببات‌و بەندەكانی بەیاننامەی ئازار جێبەجێ‌ بكات‌و زمانی كوردی بەپێی ئەو بەیاننامەیە كارا بكات.)
ئەو هەڵوێستە نیشتمانییەی ئامادەبوانی سەرسام‌و نیگەران كردبوو، هەر لەتۆڵەی ئەوەدا ده‌زگا ئه‌منیه‌كانی رژێمی به‌عس شەوی 18 لەسەر19ی ئازاری 1988 لەماڵەكەی خۆی لەشاری سلێمانی دەستگیری دەكەن‌و دەیبەن بۆ ئەمنی هەولێر، زۆر،هەوڵی لەگەڵ دەدەن کە لە وتارەکەی پاشگەزبێتەوە بەڵام بەهیچ شێوەیەک پاشگەزنابێتەوە بۆیە پاش ئازارو ئەشكەنجەیەكی زۆر لە 27ی حوزەیرانی 1988 بە لەسێدارەدان شەهیدی دەكەن‌و بەنوسراوی ژمارە(١٥٣٩) لەگەڵ ٩کەسی دیکەدا وەك تێكدەر پێناسەی ئەكەن‌و داوا لە نەخۆشخانەی کۆماریی هەولێر ئەكەن كە بڕوانامەی وەفاتی بۆ دەربكەن.
سەرەڕای بوونی ئەو بەڵگەنامەیەی سەلمێنەری شەهیدکردنێتی بەڵام تەرمەکەی نادەنەوە کەسوکاریان و گۆڕ ونکران.
شاکر فەتاح و چەمچەماڵ
کاتێک شاکر فەتاح وەکو بەڕێوەبەری ناحیە یان قائیمقام دەچێتە هەرشوێنێک لەگەڵ ئەرکە ئیدارییەکەیدا هەوڵی ڕۆشنبیرکردنەوەی خەڵک دەدات و چەندین کار دەکات لەنێو ئەوکارە ڕۆشنبیریانەدا لە( خورماڵ، ئاکرێ، قادرکەرەم و چەمچەماڵ) بەهاوکاری خوێنەرانی سنورەکە ڕۆژنامەیەکی دیواربەند دەردەکات .
کە دەبێتە بەڕێوەبەری ناحیەی قادرکەرەم ٢٤ ژمارەی ڕۆژنامەیەکی دەستنووسی بەناوی(باسەڕە) دەرکردووە کە ژمارە(١)ی لە ٢٥/٦/١٩٤٢دەرچووە و ژمارە (٢٤)ی کە کۆتا ژمارەی بووە لە ٢٣/١١/١٩٤٢ بووە.
لەم ڕۆژنامانەداجگە لە بڵاوکردنەوەی هەواڵەکانی ناوچەکان رووبەرێکی زۆری بۆ هۆشیاری کۆمەڵایەتی و لایەنی ڕۆشنبیری خەڵکەکەی تەرخان کردووە.
دواتریش کە لەساڵی ١٩٤٦ لەسەر داوای خۆی دەبێتە قائیمقامی چەمچەماڵ(لەبەهاری ١٩٤٦ لەسەر خواستی خۆم گوێزرامەوە چەمچەماڵ. دەمویست: لە شوێنێکی بێدەنگ و سەنگ و کەم گەڕ و گێچەڵدا چەند مانگێک پشوو بدەم و بحەسێمەوە) خوێندنگەی شەوانی کردۆتەوە، شانۆی بەزمانی کوردی بوژاندۆتەوە،زمانی کوردی خستۆتە ناو سکاڵانووسین و نامەکارییەوە(بەرید) لەسەر ئەو بابەتەش نێوانی لەگەڵ کاربەدەستانی کەرکوک تێکچووە بە ۷ ژمارە لە ڕۆژنامەی چەمچەماڵیش هەوڵیداوە دانیشتوانی ناوچەکە وریا بکاتەوە.
لە١/٧/١٩٤٦ ژمارە(١)ی لە ڕۆژنامەی چەمچەماڵ دەرکرد و ژمارەی(٧)کە کۆتا ژمارەی بوو لە ١٢/٨/١٩٤٦دەرچووە، بەداخەوە بەهۆی گواستنەوەی ئەرکی کارگێڕی گوێزراوەتەوە بۆ هەڵەبجە و ئیتر ڕۆژنامەی چەمچەماڵیش کۆتای هاتووە.

لە کۆتایدا دروود بۆ ڕۆحی شاکر فەتاحی کوردپەروەر.

ئامادەکردنی: بەختیار شەریف قوربانی
بۆ ئەم بابەتە سوودم لەم سەرچاوانە وەرگرتووە
- کتێبی(کۆمەڵە ڕۆژنامەی چەمچەماڵ) بەختیار شەریف قوربانی، چاپی دووەم، چەمچەماڵ، ٢٠١٢.
-کتێبی (ڕۆژنامەی باسەڕە)، هۆگر ستار قەمەری و بەختیار شەریف قوربانی، ٢٠١٩.
- چراکانی نیشتمان، نووسینی خەلیل عەبدوڵڵا... تۆڕی کۆمەڵایەتی فەیس بووک٢٧/٦/٢٠٢٦.
-د.بەهادین ئەحمەد، تۆڕی کۆمەڵایەتی فەیس بووک٢٧/٦/٢٠٢٤ -١٦/٩/٢٠٢٢.

چراکانی نیشتمان شێخ مارف بەرزنجی: شەھیدی فکرو قەڵەم شێخ مارف بەرزنجی تێكۆشەر‌و روناكبیرێكی گەورە‌و بەهەڵویستی كوردستان...
22/06/2026

چراکانی نیشتمان

شێخ مارف بەرزنجی: شەھیدی فکرو قەڵەم

شێخ مارف بەرزنجی تێكۆشەر‌و روناكبیرێكی گەورە‌و بەهەڵویستی كوردستانە‌و لەچەند رشتەیەكی كلتووریی كوردی وەك شاعیر‌و چیرۆكنووس‌و رەخنەگر خزمەتی كردووە‌و كەسێكی چەپ‌و خاوەن بیروباوەڕێكی شارستانی‌وپێشكەوتنخواز بووە‌و لەپێناوی بیرو باوەڕەكەیدا گیانی خۆی بەخشیوە.
شێخ مارف كوڕی شێخ عەبدولكەریمی قادركەرەمە، باوكی كەسایەتییەكی ناسراوو بەدیمەنی سەردەمی خۆی بووە. لەشوباتی 1921 لە ناوچەی قادركەرەم لەدایك بووە‌و لەباوەشی خانەوایەكی ئاینی‌و رۆشنبیردا پەروەردە بووە.
قۆناغەكانی خوێندنی لە قادركەرەم‌و كەركوك ‌و بەغدا تەواو كردووە‌و ساڵی 1948 بڕوانامەی حقوقی لە بەغدا بەدەستهێناوە‌و لەشاری كەركوك بووە بەپارێزەر.
شێخ مارف لەكۆتایی سییەكانی سەدەی رابردوەوە، تێكەڵاوی جوڵانەوەی سیاسی بووە‌و لە ساڵی 1939 بۆتە ئەندامی حزبی هیوا، دواتر لە حزبی شیوعی عیراق درێژەی بەتێكۆشانی خۆی داوە،ساڵی 1954 لەگەڵ مامۆستا برایم ئەحمەد وەك نوێنەرانی بەرەی نیشتمانی بۆ هەڵبژاردنی ئەنجومەنی نوێنەرانی عیراق پاڵێورا بوون، قانعی شاعیر ئەم شیعرەی بۆ وتون:
لاوی كوردی نیشتمانی مارف‌و نوری‌و بلە
چەندەها رۆڵەی تریش ئامادە بوون بۆ ئەم پلە
ساڵی 1958 ئەندامی دەستەی نوسەرانی گۆڤاری شەفەق بووە كە لەشاری كەركوك دەرچووە، بەرهەمەكانی لەم گۆڤارە‌و رۆژنامە‌و گۆڤارەكانی تری ئەو سەردەمەدا بڵاو كردۆتەوە.
بەهۆی ئەوەی كە شێخ مارف كادرێكی دیارو چالاكی شیوعی بووە لەساڵی 1959 دەستگیر دەكرێ‌‌و دەدرێ‌ بەدادگای سەربازی‌و ئەو دادگایە بڕیاری لەسێدارەدانی بۆ دەردەكات‌و تا ساڵی 1963 لەزیندان دەمێنیتەوە‌و تا لە 23ی حوزەیرانی ئەو ساڵەدا لەسێدارە دەدرێت.
سەرباری ئەوەی كە بڕیاری لەسێدارەدانی بۆ دەردەچێت‌و چوار ساڵ لەزیندان دەمێنێتەوە، ئەو بڕیارە نەیترساندووە‌و لەسەر هەڵویستە شۆڕشگێڕییەكانی بەردەوام بووە، لەزیندانەوە شیعرو چیرۆك‌و وتارە رەخنەییەكانی نوسیوە‌و بەناوی خۆی‌و نازناوی پشكۆ لەرۆژنامە‌و گۆڤارەكاندا بڵاو بۆتەوە.
شێخ مارف لەبەر ئەوەی خاوەنی فكری چەپ بووە، هەمیشە ئەو فكرە لەنوسینەكانیدا رەنگی داوەتەوە‌و هەردەم لایەنگرو پشتیوانی هەژاران‌و رەنجدەران بووە.
سەرەتای نوسینی شێخ مارف بۆ ساڵانی كۆتایی سییەكانی سەدەی رابردوو دەگەڕێتەوە، یەكەم هۆنراوەی نەتەوەیی لەساڵی 1937 نوسیوە‌و ساڵی 1942 دەرفەتی بۆ رەخساوە لەرۆژنامەی دەستنووسیی باسەڕەی مامۆستا شاكر فەتاح كە لە قادر كەرەم دەرچووە، هۆنراوەكانی بڵاو بكاتەوە.
شێخ مارف چیرۆكیشی بەشێوەی تەكنیكی نوێ‌ نوسیوە‌و خاوەنی چەندین چیرۆكی جوان‌و ناوازەیە كە لە گۆڤارەكانی شەفەق‌و هیوا‌و روناهی بڵاویكردونەتەوە.
شارەزای بواری شانۆش بووە‌و شانۆگەری نوسیوە‌و رەخنە‌و لێكۆڵینەوەشی لەو بوارەدا پێشكەش كردووە.
نوسینەكانی لەسەر مەم‌و زینی خانی‌و شانۆگەرییەكانی عەبدولڕەزاق بیمار‌و شیعرەكانی كامەران موكری نموونەیەكی جوانی لێكۆڵینەوە‌و وتاری ئەدەبی‌و رەخنەیین.
شێخ مارف لەپیشەی پارێزەریشدا پارێزەری هەژاران‌وجوتیاران‌و رەنجدەران بووە‌و بەپارێزەری هەژاران ناسرابوو.
ساڵی 1993 چاپی یەكەمی بەرهەمەكانی كە لەئامادەكردنی مامۆستا عومەر مەعرووف بەرزنجی ‌و شێخ سامانی كوڕی شەهید بوو، بڵاو كرایەوە. چاپی دووەمیشی كە چەند بابەتێكی بۆ زیاد كراوە لەچاپخانەیە‌و بەم نزیكانە بەبەرگ‌و كاڵایەكی جوانترەوە بڵاو ئەبێتەوە.
ئەم كەسایەتییە هەڵكەوتووە سیاسی‌و روناكبیرییەی كوردستان لە23ی حوزەیرانی1963 لەسەر فكرو هەڵوێستە شۆڕشگیرییەكانی لەسێدارە درا‌و چووە ریزی شەهیدان‌و نەمرانی نیشتمانەوە.
درودی رێزو وەفا‌و ئەمەكداری بۆ گیانی پاك‌و پیرۆزی شێخ مارف بەرزنجی تێكۆشەری ئازا‌و روناكبیری بەهەڵویست‌و شەهیدی فكر‌و قەڵەم.

بە سوپاسەوە لە بەڕێز خەلیل عەبدوڵڵا وەرگیراوە.

ساڵڕۆژی کۆچی دوایی دکتۆر شێرکۆ بابانی نووسەرئەمڕۆ ١٠/ ٦ پێنج ساڵ تێدەپەڕێت بەسەر کۆچی دوایی نووسەر و ئەکادیمی دیاری کورد...
10/06/2026

ساڵڕۆژی کۆچی دوایی دکتۆر شێرکۆ بابانی نووسەر

ئەمڕۆ ١٠/ ٦ پێنج ساڵ تێدەپەڕێت بەسەر کۆچی دوایی نووسەر و ئەکادیمی دیاری کوردستان (پڕۆفیسۆر دکتۆر شێرکۆ کەریم بەگ بابان) دا،
لەم ساڵڕۆژەدا وەکو کتێبخانەی گشتی چەمچەماڵ سەری ڕێز و وەفا لە ئاست گەورەیی و بەرهەمەکانی دائەنەوێنین.

دکتۆر شێرکۆ بابان
ناوی تەواوی (شێرکۆ عەبدولکەریم تۆفیق بابانە)ە، ساڵی ١٩٥٣ لە خانەوادەیەکی دێرین و ناسراوی چەمچەماڵ لەدایکبووە.
خوێندنی سەرەتایی و ناوەندی لە چەمچەماڵ و ئامادەیی لە کەرکوک خوێندووە.
ساڵی ١٩٧٦ زانکۆی تەکنۆلۆجیای بەغدادی تەواکردووە و لە ١٩٨٠ چووەتە فەڕەنسا و هەر لەفەڕەنسا ساڵی ١٩٨٥ بڕوانامەی دکتۆرای لە ئەندازیاری میکانیکی بەدەستهێناوە.
دوای گەڕانەوەی بۆ نیشتیمان خزمەتی بەنەوەکانی کورد کردووە و دواوێستگەی ئەکادیمی ژیانی لە کۆلێژی ئەندازیاری زانکۆی سەڵاحەدین مامۆستا بووە.
لەگەڵ ئەوەشدا توێژەر و نووسەرێکی بە ئەزموونی زمانی کوردی بووە و چەندین کتێبی لەو بوارەدا پێشکەش بە کتێبخانەی کوردی کردووە.

بەداخەوە شێرکۆ بابان لە ١٠ی حوزەیرانی ٢٠٢١ لە تەمەنی ٦٨ ساڵیدا بەھۆی نەخۆشییەوە لە هەولێر کۆچی دوایی کرد.

بەرهەمەکانی نووسەر:
- ڕستەسازی و شیتەڵکاری زانستی - ١٩٩٦
- میکانزمە بنەڕەتییەکانی ڕستەسازی - ١٩٩٧
- داینامیزمی جێناوی لکاو لە ڕستەسازیدا - ١٩٩٧
- نەخشەی ڕۆنانی ڕێژەی کار - ١٩٩٩
- بەرەو ڕێزمانی کوردی، بەرەو نووسین - ٢٠٠٠
- لە مۆرکە تایبەتییەکانی ڕێزمانی کوردی - ٢٠٠٠
- شرۆڤەکاری ڕێزمانی لە زمانی نووسیندا - ٢٠٠٠
- ڕێزمانی پاشگری دووپاتی «ەوە» - ٢٠٠١
- ڕێزمانی کەسی سێیەمی تاک - ٢٠٠٤
- زمانی نووسینی ڕێزماندار، ھەولێر - ٢٠٠٨

ئامادەکردنی: بەختیار شەریف قوربانی.

محه‌مه‌د نوری تۆفیق .... خەرمانێک لە وشە‎ مامۆستا محه‌مه‌د نوری تۆفیق كه‌سایه‌تیەکی سیاسی‌و په‌روه‌رده‌یی‌و ئه‌ده‌بی‌و ...
08/06/2026

محه‌مه‌د نوری تۆفیق .... خەرمانێک لە وشە

‎ مامۆستا محه‌مه‌د نوری تۆفیق كه‌سایه‌تیەکی سیاسی‌و په‌روه‌رده‌یی‌و ئه‌ده‌بی‌و رۆژنامه‌نووسی‌و روناكبیریی کوردستانە‌.
‎ساڵی ١٩٣٤ له‌ئامێزی خێزانێکی نیشته‌جێی یەكێك له‌خانووه‌ قوڕینه‌كانی دامێنی بانی مه‌قانی چەمچەماڵ له‌دایك بووە، لەوێ سه‌رده‌می منداڵی‌و گه‌نجی‌و خوێندكاری گوزه‌راند‌و تابووه‌ مامۆستا‌و وانه‌كانی خوێندنی به‌مناڵانی شاره‌كه‌ی وتۆتەوه‌.هه‌ر لەوێ ‌ چۆتە‌ نێو كۆڕی خه‌باتی كوردایه‌تی له‌لایه‌ك‌و دنیای ئه‌ده‌ب‌و رۆژنامه‌نووسی له‌لایه‌كی تره‌وه‌، تا بووه‌ ئه‌و ئه‌ستێره‌ گه‌ش‌و دره‌وشاوه‌یه‌ی هه‌موو كوردستانی رۆشن كرده‌وه‌.
‎كه‌ لاپه‌ڕه‌ دره‌وشاوه‌كانی ژیانی مامۆستا حه‌مه‌ نووری هه‌ڵده‌ده‌یته‌وه‌ ده‌بینی له‌چه‌ند رشته‌‌و بواری جیا جیادا ماندونه‌ناسانه‌‌و دڵسۆزانه‌ كاری كردووه‌، ئه‌و هه‌ر زوو و له‌تافی لاویدا بووه‌ رێبواری دڵسۆزو به‌ئه‌مه‌كی رێبازی كوردایه‌تیی هاوچه‌رخ‌و زیاتر له‌نیو سه‌ده‌ له‌كۆڕی تێكۆشانی شانه‌ نهێنیه‌كانی شارو سه‌نگه‌ری ئاشكرای پێشمه‌رگایه‌تیدا بوو، زیندانیكردن‌و نه‌فیكردن‌و دورخستنه‌وه‌ كۆڵی پێنه‌دا‌و به‌ره‌ی گه‌ل‌و نیشتمانی به‌رنه‌دا، شكست‌و پاشه‌كشه‌ی شۆڕشه‌كان، له‌كاروانی كوردایه‌تیی راسته‌قینه‌ی دانه‌بڕی‌و به‌رده‌وام بوو، له‌رۆژه‌ ره‌ش‌و سه‌خت‌و دژواره‌كاندا چرای ئومێد‌و هیوای داده‌گیرساند‌و گیانی مقاوه‌مه‌ت‌و وره‌ به‌رزی ئه‌به‌خشی‌و ته‌نانه‌ت له‌دوای رۆژه‌ ره‌شه‌كانی ئه‌نفال ماڵه‌كه‌ی مه‌ڵبه‌ندی تێكۆشه‌ران‌و شوێنی ئیختیفای پێشمه‌رگه‌ بوو.
‎مامۆستا حه‌مه‌ نووری سه‌رباری خه‌باتی سیاسی‌و پێشمه‌رگانه‌، له‌ مه‌یدانێكی دیكه‌شدا خه‌باتی ئه‌كرد ئه‌ویش خه‌باتی په‌روه‌رده‌و فێركردن بوو، مامۆستایه‌كی كوردپه‌روه‌ر‌و به‌هه‌ڵویست بوو، خوێندكارانی به‌گیانی به‌رگری‌و خۆشه‌ویستی نیشتمان گۆش ده‌كرد، تارژێمی به‌عس ناچاری خانه‌نشینكردنی كرد له‌خزمه‌ت به‌رده‌وام بوو.
‎بوارێكی دیكه‌ی كارو خزمه‌ت‌و به‌خششی مامۆستا حه‌مه‌ نووری بواری ئه‌ده‌ب‌و رۆژنامه‌گه‌ری‌و روناكبیری بوو، كه‌ زیاتر له‌نیو سه‌ده‌ له‌و كایه‌ كه‌لتوورییه‌دا خزمه‌تی كرد‌و خاوه‌نی خه‌رمانێك له‌وشه‌ی نووسراو و چاپكراوه‌‌و خزمه‌تێكی گه‌وره‌ی كردووه‌‌و شوێن په‌نجه‌ی به‌كاروانی ئه‌ده‌بی‌و رۆشنبیری‌و رۆژنامه‌گه‌رییه‌وه‌ دیاره‌.
‎بێ له‌وانه‌ش مامۆستا حه‌مه‌ نوری له‌چه‌ندین رۆژنامه‌و گۆڤاردا كاری كردووه‌، یاخود ئه‌ركی به‌ڕێوه‌بردن‌و سه‌رنووسه‌ری له‌خۆگرتووه‌.
‎مامۆستا حه‌مه‌ نووری یه‌كێك له‌و نووسه‌ره‌ ئازا‌و به‌هه‌ڵویستانه‌ بووه‌ كه‌ له‌سه‌رده‌می رژێمی به‌عسدا، له‌شاره‌وه‌ به‌رهه‌مه‌ ئه‌ده‌بییه‌كانی بۆ بڵاوكراوه‌كانی شۆڕشی نوێ‌ له‌ شاخ ناردووه‌‌ وبه‌ناوی خوازراوه‌وه‌ بڵاوبونه‌ته‌وە ،
بەداخەوە شەوی ٨ لەسەر ۹ی حوزەیرانی٢٠١۱ کۆچی دوایی

کرد.
‎‌.سڵاوی رێز‌و وه‌فا بۆ گیانی پاكی مامۆستا حه‌مه‌ نووری تێكۆشه‌ر‌و په‌روه‌رده‌كارو ئه‌دیب‌و رۆژنامه‌نوس‌و وه‌رگێڕ، ئه‌و پیاوه‌ی له‌چه‌مچه‌ماڵه‌وه‌ به‌هه‌وڵ‌و ماندوو بوون‌ و شه‌ونخوونی‌و تێكۆشانی نه‌پساوه‌ هاته‌ مه‌یدان‌و خۆی پێگه‌یاند‌ تا بوو به‌و كه‌سایه‌تییه‌ ناسراوه‌ی له‌سه‌رانسه‌ری
كوردستاندا شانازی پێوه‌ ده‌كرێت.
نووسینی: خەلیل عەبدوڵڵا

پەیامی پیرۆزبایی ​نووسەر و شاعیری گەنج (محەمەد سۆران) بەناوی بەڕێوەبەر و فەرمانبەرانی کتێبخانە گشتییەکەمانەوە ​جوانترین ...
29/04/2026

پەیامی پیرۆزبایی

​نووسەر و شاعیری گەنج (محەمەد سۆران)

بەناوی بەڕێوەبەر و فەرمانبەرانی کتێبخانە گشتییەکەمانەوە ​جوانترین چەپکە گوڵی پیرۆزبای ئاڕاستەی بەڕێزت دەکەین بەبۆنەی بە دەستهێنانی پلەی یەکەم-ت لە نۆیەمین فێستیڤاڵی ئەدەبی ئاران لە بواری شیعر بەدەقی( نامەیەکی بێ دەنگ)
دەستخۆشی لە ماندووبوون و دڵسۆزییت دەکەین کە وەک شاعیر ونووسەر و ڕۆشنبیر و زانستخوازێک، لە خزمەتکردن بەردەوامیت.

​فێستیڤاڵی ئاران فێستیڤاڵێکی ئەدەبییە وساڵانە لەسەرئاستی زانکۆکانی کوردستان لەلایەن بەشی کوردی زانکۆی گەرمیان ڕێکدەخرێت.

​ کتێبخانە گشتییەکانی چەمچەماڵ
٢٩-٤-٢٠٢٦

Address

Chamchamal

Website

Alerts

Be the first to know and let us send you an email when کتێبخانەی گشتی چەمچەماڵ posts news and promotions. Your email address will not be used for any other purpose, and you can unsubscribe at any time.

Shortcuts

Share

Category