16/08/2026
យកសាំង ២កាន ដើរចូលផ្ទះ រួចចាក់សោដុតទាំងផ្ទះនិងខ្លួនឯង
ហេតុការណ៍ដនេះបានកើតឡើងនៅព្រឹកថ្ងៃទី១៥ ខែសីហា ឆ្នាំ២០២៦ នៅចំណុចភូមិជាំអំពិល ឃុំជាំ ស្រុកមេមត់ ខេត្តត្បូងឃ្មុំ។ ជនរងគ្រោះមានឈ្មោះ វន ធន់ ភេទប្រុស អាយុ ៤០ឆ្នាំ ជាម្ចាស់ផ្ទះកើតហេតុ។
តាមសេចក្តីរាយការណ៍បានឱ្យដឹងថា នៅម៉ោងប្រហែល ៨ព្រឹក គេឃើញបុរសរូបនេះយួរសាំង ២កាន ដើរចូលក្នុងផ្ទះរបស់ខ្លួន រួចក៏ចាក់សោទ្វារពីខាងក្នុងជាប់ជិតឈឹង។ មួយសន្ទុះក្រោយមក ស្រាប់តែមានភ្លើងឆេះយ៉ាងសន្ធោសន្ធៅចេញពីក្នុងផ្ទះ ចំណែកគាត់ក៏បានស្លា//ប់ក្នុងអណ្តាតភ្លើងនោះតែម្តង។
ភ្លាមៗនោះ កម្លាំងនគរបាលស្រុកមេមត់ និងរថយន្តពន្លត់អគ្គិភ័យ បានចុះទៅអន្តរាគមន៍បាញ់ទឹកពន្លត់ ដើម្បីកុំឱ្យឆេះរាលដាលដល់ផ្ទះអ្នកជិតខាង។ ចំពោះផ្ទះដែលកើតហេតុវិញ គឺឆេះស្ទើរទាំងស្រុង ដោយសារអណ្តាតភ្លើងខ្លាំងពេក មិនអាចជួយសង្គ្រោះបានឡើយ។
ចំពោះមូលហេតុដែលនាំឱ្យគាត់ដាច់ចិត្តបែបនេះ សមត្ថកិច្ចមិនទាន់បញ្ជាក់ផ្លូវការនៅឡើយទេ។ ប៉ុន្តែតាមព័ត៌មានបឋមពីអ្នកភូមិបានឱ្យដឹងថា គាត់អាចមានវិបត្តិផ្លូវចិត្តខ្លាំងទើបដាច់ចិត្តគិតខ្លីបែបនេះ៕ា
