29/11/2025
បកស្រាយជូនមួយ! និយាយដោយត្រង់ទៅចុះ សុភាសិតដែលខ្ញុំពិបាករកទំនុកសរសេរបំផុត គឺសុភាសិតដែលអានហើយងាយយល់។ ប៉ុន្តែត្រូវតែបកស្រាយ ព្រោះជាការចូលរួមអភិរក្សទាំងអស់គ្នា។
រៀនសិល្បសាស្ត្រាកុំរាន់បន្ទាន់ញាប់៖
តាមពិតខ្ញុំក៏មានដំណើរនេះដែរនៅលើបណ្ដាញសង្គម គឺកំណត់ខ្លួនឯងថាក្នុងមួយថ្ងៃ ខ្ញុំវិភាគបកស្រាយសុភាសិតតែមួយប៉ុណ្ណោះដើម្បីផុស ព្រោះត្រូវការរៀនវិភាគពីវាឱ្យបានត្រឹត្រូវមុននឹងចែករំលែក។ កុំថាឡើយរៀនសិល្បសាស្ត្រា គឺរៀនគ្រប់ចំណេះរបៀនតែម្ដង មិនអាចរៀនយកប្រញាប់ឬយកលឿនបានទេ ត្រូវរៀនតាមដំណើរនៃហេតុបច្ច័យរបស់វា ទើបអាចយល់ច្បាស់ពីឫសគល់នៃចំណេះវិជ្ជានោះ។ ចុះបើរៀនដោយប្រញាប់តើមានបញ្ហាអ្វីកើតឡើង? បញ្ហានោះអាចនឹងចេះដែរ ឬយល់ដែរ តែចេះមិនសព្វយល់មិនសព្វ ចំណេះដែលចេះត្រឹម៥០%ហើយចេញអនុវត្ត នោះវាប្រឈមគ្រោះថ្នាក់ជាងអ្នកដែលមិនចេះសោះ ព្រោះអ្នកដែលមិនចេះសោះ គេធ្វើត្រឹមកម្រិតដែលខ្លួនមិនចេះនោះឯង។
ស្វែងទ្រព្យសន្សំកុំខំខ្លាំង៖
ដល់តែសុភាសិតងាយយល់ពេកខ្ញុំរកទំនុកបកស្រាយសឹងមិនឃើញ។ ខ្លីៗទៅចុះ! រឿងស្វែងទ្រព្យនេះមួយ នរណាក៏ខំប្រឹងដែរ (មនុស្សនិងប្រាក់ យក្យនិងសាច់) ប៉ុន្តែបើខំខ្លាំងពេកប្រយ័ត្នឈឺ លុះធ្លាក់ខ្លួនឈឺទ្រព្យដែលខំរកមុខតែយកមកមើលខ្លួនដដែល។ ទ្រព្យរមែងបានមកដោយលំបាក ប៉ុន្តែពេលខ្លះលំបាកហើយនៅតែមិនបានទ្រព្យ។
ឡើងភ្នំសន្សឹមកុំប្រណាំង៖
ការឡើងភ្នំនេះប្រហែសមិនបានទេ ត្រូវឡើងបន្តិចម្ដងៗដោយស្មារតីប្រុងប្រយ័ត្នខ្ពស់ ព្រោះបើថ្លោះធ្លោយបន្តិចមុនតែគ្រោះថ្នាក់ហើយ។ ការធ្វើនូវកិច្ចសំខាន់ៗក៏ដូចគ្នា ធ្វើដោយប្រញាប់ពេក ឬចង់លឿនពេកមុខតែចន្លោះប្រហោង ឬឈានដល់ខូចខាតទាំងស្រុងតែម្ដង។
សេពកាមតាមកម្លាំងតិចៗរ៉ា៖
និយាយរឿងអ្នកសេពកាម តើមានអ្នកសេពតិចៗតាមកម្លាំងឬអត់? ពាក្យថាសេពកាម សំដៅលើប្រព្រឹត្តចំណង់ ប៉ុន្តែក្នុងនេះអត់ចង្អុលចំថា ជាចំណង់លើរូបភាពអ្វីនោះទេ។ ម្ល៉ោះហើយខ្ញុំសុំចង្អុលជារួមថា កាមរបស់មនុស្ស ឬចំណង់របស់មនុស្ស ឬសេចក្ដីប្រាថ្នារបស់មនុស្ស គឺគ្មានដែនកំណត់ឡើយ ប៉ុន្តែកម្លាំងកាយឬកម្លាំងធនធានគឺមានកម្រិត។ បើយើងប្រព្រឹត្តតាមតែប្រាថ្នា បើយើងប្រព្រឹត្ដតាមតែចំណង់ នោះឆ្អែតស្កប់ចិត្ដបានត្រឹមមួយភ្លែត បន្ទាប់ពីនោះយើងនឹងបំផ្លាញខ្លួនឯងហើយ។ ចំណង់ប្រាថ្នាម៉ូតូថ្មីទំនើប លក់ទ្រព្យដែលមានយកលុយទៅទិញម៉ូតូ លុះទិញបានហើយការហូបចុកប្រចាំថ្ងៃមុខតែអំបិលប្រហុកមិនខាន នេះហៅថា សេពកាមលើសពីកម្លាំងទ្រព្យ ឬប្រព្រឹត្តចំណង់ប្រាថ្នា ហួសពីកម្លាំងទ្រព្យ។
អត្ថបទវិភាគ៖ ណាវ៉ាត់- satra kh
