30/12/2024
“ກະສິກຳ” ກໍສາມາດເປັນທຸລະກິດໄດ້
| ບໍ່ວ່າຍຸກສະໄໝໃດກໍຕາມ “ກະສິກຳ” ຍັງເປັນສິ່ງຈຳເປັນໃນການດຳລົງຊີວິດ ເພາະເຮົາທຸກຄົນລ້ວນແຕ່ຕ້ອງກິນ, ຕ້ອງໃຊ້ ແລະ ປັດຈຸບັນ ກະສິກຳ ກໍສາມາດຫັນມາເປັນທຸລະກິດໄດ້ຢ່າງຫຼວງຫຼາຍ ແມ່ນກະທັງມະຫາເສດຖີລະດັບໂລກ ກໍຍັງຫັນມາລົງທຶນໃສ່ກະສິກຳ ເຊິ່ງບໍ່ແມ່ນພຽງແຕ່ການປູກຝັງ ແລະ ລ້ຽງສັດເທົ່ານັ້ນ! ແຕ່ຍັງແນ່ໃສ່ເພື່ອຜະລິດອາຫານ, ຜະລິດວັດຖຸດິບ, ຜະລິດຕະພັນຕ່າງໆ ທີ່ຈໍາເປັນຕໍ່ການດໍາລົງຊີວິດ ແລະ ການພັດທະນາເສດຖະກິດແບບຍືນຍົງ ເຊິ່ງການເຮັດທຸລະກິດກະສິກຳ ສ່ວນຫຼາຍກໍມັກຈະແບ່ງອອກເປັນ 4 ປະເພດຄື:
1. ທຸລະກິດການຜະລິດ: ຟາມຜັກ, ຟາມຫມາກໄມ້, ຟາມລ້ຽງສັດ...
2. ທຸລະກິດການແປຮູບຜະລິດຕະພັນ: ນໍາເອົາຜົນຜະລິດມາແປຮູບເພື່ອເພີ່ມມູນຄ່າໃຫ້ກັບຜະລິດຕະພັນນັ້ນໆ
3. ທຸລະກິດບໍລິການຈໍາຫນ່າຍ ແລະ ກະຈາຍສິນຄ້າ: ບໍລິສັດສົ່ງອອກ ແລະ ນໍາເຂົ້າສິນຄ້າ,ໂຮງງານແປຮູບເນື້ອສັດ ແລະ ຫມາກໄມ້, ຕະຫຼາດກະຈາຍສິນຄ້າ…
4. ທຸລະກິດບໍລິການທີ່ກ່ຽວຂ້ອງ: ບໍລິສັດທີ່ໃຫ້ການສະໜັບສະໜຸນກໍຄື ບໍລິການເຄື່ອງຈັກທາງການກະເສດ,ໃຫ້ຄຳປຶກສາ ແລະ ບໍລິການຂົນສົ່ງສິນຄ້າ ອື່ນໆ.
ດ້ວຍພູມສັນຖານ, ພູມມີປະເທດ ແລະ ປັດໄຈອຳນວຍຄວາມສະດວກຕ່າງໆ ຂອງລາວ ສົ່ງຜົນດີຕໍ່ການເລີ່ມເຮັດທຸລະກິດກ່ຽວກັບກະສິກຳໄດ້ດີ, ມັນບໍ່ແມ່ນເລື່ອງໄກໂຕ ແລະ ຍາກສຳລັບພວກເຮົາເລີຍ ຖ້າສຶກສາດີໆ ນຳເອົາເຄື່ອງມືທີ່ທັນສະໄໝ ແລະ ເຕັກໂນໂລຊີເຂົ້າມາຊ່ວຍ ເລັ່ງໃສ່ການພັດທະນາໃຫ້ຜົນຜະລິດໄດ້ຫຼາຍ ມີຄຸນນະພາບ ຈຳໜ່າຍທັງພາຍໃນ ແລະ ສົ່ງອອກ ສຳຄັນແມ່ນຫັນມາແປຮູບສິນຄ້າ ເຊື່ອວ່າຈາກກະສິກຳທີ່ເຮົາເຮັດແບບປະຖົມປະຖານກໍສາມາດກາຍເປັນທຸລະກິດຄອບຄົວ ສ້າງລາຍຮັບໃຫ້ມີຢູ່ມີກິນໄດ້ ແລະ ຍັງເປັນການສົ່ງເສີມເສດຖະກິດຂອງປະເທດມີບົດບາດສຳຄັນໃນການສະຫນັບສະຫນຸນ ສົ່ງເສີມພັດທະນາແບບຍືນຍົງໃພພາກການກະເສດ.
ການກະສິກຳອາດບໍ່ແມ່ນທາງເລືອກແຕ່ແມ່ນທາງລອດ , ເຮັດກະສິກຳບໍ່ທຸກແນ່ນອນ , ເຖິງຈະໄດ້ເງິນເທື່ອລະຫນ້ອຍແຕ່ຈະບໍ່ອຶດຫິວແນ່ນອນ ຍັງຈະຊ່ວຍໃຫ້ເຮົາມີທັງເງິນ ແລະ ມີກິນນຳອີກ ເຊິ່ງປັດຈຸບັນກໍເຫັນວ່າມີການຫັນຈາກກະສິກຳມາເປັນທຸລະກິດຫຼາຍຂຶ້ນແລ້ວ ເຊື່ອວ່າໃນອະນາຄົດຈະມີທຸລະກິດກະສິກຳເກີດຂຶ້ນຫຼາຍເທົ່າຕົວ.
#ທຸລະກິດ #ກະສິກຳ #ອະນາຄົດ
#ອິນໄຊລາວ ສາລະດີໆ ມີຢູ່ບ່ອນນີ້.