11/04/2026
අවුරුදු කෑමකට නිවසට එන ආදරණීයන්ට රසවත් කැරට් සුප් එකක් හදමු.
ලොකු කැරට් අල දෙකක් සමග තරමක අල ගෙඩියක් අරගෙන පොතු අයින් කරලා ටිකක් ලොකුවට කෑලි කපන්න. ඒකට ලුණු තේ හැඳි බාගයක් එක්ක වතුර කෝප්ප දෙකක් විතර දාලා අල ජාති දෙක හොඳට මෘදු වෙනකන් තම්බ ගන්න.
දැන් තැම්බුණු අල ටික හොඳට නිවෙන්න තියලා, ඒ වතුර එක්කම බ්ලෙන්ඩර් එකේ ජූස් කප් එකට දාලා ක්රීම් වෙන්න බ්ලෙන්ඩ් කරන්න.
ඊලඟට පොඩි බී ළූණු ගෙඩියක් එක්ක සුදු ළූණු බික් දෙකක් චූටියට කොටු කපා ගන්න. සැල්දරියි , කොත්තමල්ලි කොළයි මේස හැඳි දෙකක් වගේ වෙන්න හීනියට කපා ගන්න.
දැන් ටිකක් ලොකු පෑන් එකක් ලිපේ තියලා ඒකට බටර් හරි මාගරින් හරි මෙස හැඳි දෙකක් දාලා රත් කරන්න. බටර් ටික යන්තමින් රත් වේගෙන එද්දී සුදු ළූණු ටික දාන්න. ඊලඟට බී ළූණු ටික දාලා චුට්ටක් තෙම්පරාදු කරලා සැල්දරි ටික දාන්න. දැන් මේ ටික චුට්ටක් තෙම්පරාදු කරලා ඊලඟට බ්ලෙන්ඩ් කර ගත්ත කැරට් ටික දාන්න. උකු ගතිය වැඩි නම් තව වතුර ටිකක් හරි මස් හෝ එළවළු තම්බපු වතුර ටිකක් හරි දාන්න. ඊට පස්සෙ ලුණු කුඩු , ගම්මිරිස් කුඩු බොහොම පොඩ්ඩක් , ග්රේට් කර ගත්ත මොසරැල්ලා හෝ චෙඩාර් චීස් මේස හැඳි දෙකක් එකතු කරන්න. තියෙනවා නම් වියලි ඔරිගානෝ චුට්ටකුත් එකතු කරන්න. ඊලඟට හොඳට කලවම් කරලා උතුරවගෙන ලිපෙන් බාන්න.. උණුවෙන්ම පිළිගන්වන්න.
චීස් ඕනෙමයි කියලා නෑ. තියෙනවා නම් දාන්න . ගොඩක් රසයි සුප් එක එතකොට (කැමති නම් හැපි කව් චීස් කෑල්ලක් උනත් දාන්න පුළුවන්)
සුප් එකට චීස් දාන්නෙ නැත්නම් කුකින් ක්රීම් , ෆ්රෙශ් ක්රීම් නැත්නම් උකු පොල් කිරි පොඩ්ඩක් එකතු කර ගන්න.
සැල්දරි , කොත්තමල්ලි කොළ නැත්නම් හීනියට කපා ගත්ත ලීක්ස් ගහේ කොළ පාට කොටසෙන් ටිකක් ගන්න..
# CarrotSoup
