13/06/2023
" ယောတရားတော် " အမှတ်စဥ် (၂)
🎍 🌺 🌻 🎍🌺 🌻 🎍 🌺 🌻 🎍 🌺 🌻 🎍
အကျိုးရှိ အပြစ်ကင်းစွာ
ပြုမူလုပ်ကိုင်ဆောင်ရွက်လို့
******************************************
ဒုတိယသုံးပါးက -
🔹 ကောင်းစွာပြောမှု၊ ကောင်းစွာပြုပေး၊
သက်မွေးမှန်ကန် ဤသုံးတန်၊
ကျင့်ရန်သီလသာ။
သမ္မာဝါစာ၊ သမ္မကမ္မန္တ ၊ သမ္မာအာဇီဝခေါ်တဲ့ ကိုယ်နဲ့နှုတ်နှစ်ပါးကို ပိုင်နိုင်စွာ ထိန်းပြီးထားရတဲ့ အကျင့်သိက္ခာက သီလတဲ့။
နှုတ်ကပြောတော့လည်း အကျိုးရှိတဲ့ အပြစ်ကင်းတဲ့ စကားကိုပြောလို့၊ ကိုယ်အမူအရာတွေနဲ့ ပြုလုပ်ဆောင်ရွက်ပြန်တော့လည်း၊ အပြစ်ကင်းတဲ့ အကျိုးရှိတဲ့ ကောင်းတဲ့အလုပ်တွေကို ပြုလုပ်လို့။
အသက်မွေးဝမ်းကျောင်းအမှု ပြုပြန်တော့လည်း အပြစ်ကင်းတဲ့ ဒုစရိုက်ကင်းတဲ့၊ သန့်ရှင်းစင်ကြယ်တဲ့၊ ကောင်းတဲ့အသက်မွေးဝမ်းကျောင်းဆိုတဲ့ သမ္မာအာဇီဝလုပ်ငန်းစဉ် ဖြစ်ရမယ်၊ အဲဒါကသီလသိက္ခာ၊ ဒါတွေကို ကြားဖူးတာ များနေပြီးသားပါ။
🔹 ကောင်းစွာပြောမှု၊ ကောင်းစွာပြုပေး၊
သက်မွေးမှန်ကန်၊ ဤသုံးတန်
ကျင့်ရန်သီလသာ။
သတိနဲ့ သမာဓိ မပါဘဲ တွန်း, တွန်းချနေတာ
******************************************
သီလဆိုတာ ကိုယ်နှင့်နှုတ်နှစ်ပါးကို ထိန်းသိမ်းရတဲ့လုပ်ငန်းစဉ်၊ စည်းကမ်းလို့လဲခေါ်တယ်၊
တစ်ခါ တတိယသုံးပါးက-
🔹 ကောင်းစွာကြိုးစား၊ သတိထား၍
ကောင်းငြားတည်ကြည်၊ ဤသုံးလီတည့်၊
သမာဓိ၊ ကျင့်ဘိ မြတ်သိက္ခာ၊
သမ္မာဝါယာမ၊ သမ္မာသတိ, သမ္မာသမာဓိရယ်၊ သူတို့သုံးပါးပေါင်းမှ သမာဓိ ဖြစ်လာတယ်၊ သတိ, သမာဓိ, မပါဘဲ အခြောက်တိုက်ကြီး အားထုတ်တဲ့ ဝီရိယကျတော့ သမ္မာဝါယာမ ဖြစ်မလာဘူး၊ ဥဒ္ဒစ္စတွေပဲ ပေါ်လာကြတယ်။
နေ့တိုင်း လှုပ်ရှားသွားလာနေကြတာ ဝီရိယမပါတဲ့ အချိန်မရှိဘူး၊ ပါနေကြတာပဲ၊ ဝီရိယနဲ့ လှုပ်ရှားတွန်းကန်သွားနေကြတာပဲ၊ သို့သော် စိတ်တည်ငြိမ်လာသလား, အမြင်မှန်တွေ ပေါ်လာသလား, စိတ်တွေအေးချမ်းလာသလားဆိုတော့ မအေးချမ်းဘူး။
ဘာဖြစ်လို့တုန်းဆိုတော့ သတိနဲ့ သမာဓိမပါပဲနဲ့ တွန်း,တွန်းချနေတာ၊ စိတ်ကို အစီအစဉ်မပါပဲ တွန်း, တွန်းချနေတာမို့ သမ္မာဝါယာမ မဖြစ်လို့ သမာဓိ သိက္ခာဘက်ကို မရောက်တာ။
ဝီရိယကို သတိ, သမာဓိနဲ့ထိန်းပြီးတွန်းရမှာ
******************************************
သမ္မာသမာဓိဖြစ်အောင်ဆိုလို့ရှိရင်, သမာဓိသိက္ခာဖြစ်အောင် ဆိုလို့ရှိရင် ဝီရိယဟာ သတိသမာဓိနဲ့ ထိန်းပြီးတွန်းရမှာ။
သတိနဲ့ အာရုံကိုပုံဖော်ရမယ်၊ အာရုံပေါ်မှာ စိတ်ကို ပထမဆုံးနေရာချပေးရမယ်၊ နေရာချပေးပြီးကာမှ သမာဓိနဲ့ချပ်ကနဲ စူးစိုက်ပေးရတယ်၊ နေရာရောက်ပြီဆိုကာမှ ဝီရိယနဲ့တွန်းတော့, စိတ်ကြိုက်တွန်းတော့၊ အဲဒီအခါမှာ သမာဓိဆိုတာပေါ်လာတာ။
ထမင်းချက်တယ်, ရေခပ်တယ်, စားတယ်, သွားတယ်, သောက်တယ်, နေထိုင်သွားလာတဲ့ ကိစ္စခပ်သိမ်းအကုန်လုံးပေါ့၊ အားမှရယ်လို့ မဟုတ်ပါဘူး၊ သီးခြားအချိန်ယူ အားထုတ်တာလည်း အားထုတ်တာ သပ်သပ်ပေါ့။
အဲသလို သီးခြားအချိန်မပေးနိုင်ရင်လဲ အချိန်လေးတွေက အင်မတန်နှမြောစရာသိပ်ကောင်းနေတော့ ဒီလိုခေတ်အခါ ဘဝကောင်းလေးတွေရတုန်း အချိန်လေးတွေ ဖြုန်းပစ်ရမှာ အင်မတန်နှမြောစရာကောင်းတယ်။
ဒါကြောင့် ဒီလိုရထားတဲ့အချိန်လေးတွေကို ခန္ဓာဝန်ထမ်းဆောင်ရင်းနဲ့ သမာဓိသိက္ခာပေါ်အောင် ဝီရိယနဲ့တွန်းတိုင်း, တွန်းတိုင်း အစီအစဉ်လေးနဲ့ တွန်း, တွန်းပေးရမယ်၊ အဲဒါ သမာဓိသိက္ခာပဲ။
သမာဓိဆိုတာ
******************************************
🔸 သမာဓိဆိုတာ
🔸 စိတ်ကိုထားချင်တဲ့နေရာမှာ
🔸 ထားလို့ရအောင်
🔸 ထားချင်သလို
🔸 ထားလို့ရအောင်
🔸 ထားချင်သလောက်
🔸 ထားလို့ရအောင်
အဲသလိုလေ့ကျင့်ပေးတဲ့လုပ်ငန်းကို သမာဓိလို့ခေါ်တယ်။
စိတ်အစဉ်ကို ချေးချွတ်ဆေးကြောရတဲ့ အလုပ်ဖြစ်တာကြောင့် သမထလို့လဲခေါ်တယ်။
🔸 ကိလေသာအညစ်အကြေးတွေ
🔸 တွယ်ကပ်မနေရအောင်
🔸 တွယ်ကပ်နေရင်လဲ စင်ကြယ်သွားအောင်
🔸 ချေးချွတ်ဆေးကြောရတဲ့
အလုပ်ဖြစ်တယ်
🔸 အဲဒါကို သမာဓိခေါ်ပါတယ်။
🔸 ကောင်းစွာကြိုးစား၊ သတိထား၍
ကောင်းငြားတည်ကြည်၊ ဤသုံးလီတည့်
သမာဓိ၊ ကျင့်ဘိမြတ်သိက္ခာ။
တရားအလုပ်သည် စီးပွားရေးအလုပ်တစ်မျိုးပဲ
******************************************
🔹 သိက္ခာသုံးရပ် အကျင့်မြတ်၊
မပြတ်ဖြည့်စရာ။
သိက္ခာသုံးပါးဆိုတာ အစဉ်မပြတ်ကို ဖြည့်ရမှာ၊ ခုနပြောတဲ့အတိုင်း ခန္ဓာဝန်ထမ်းဆောင်ရင်း, စားရင်းသွားရင်း, လုပ်ရင်းကိုင်ရင်း, နေရင်းထိုင်ရင်း, ဘယ်ကိစ္စမှာမဆို အကုန်လုံး အစီအစဉ်လေးနဲ့ စိတ်ကို တွန်းပါ၊ သမာဓိသိက္ခာရမှာပါ၊ ပညာလည်း ထို့အတူပဲပေါ့၊ သီလလည်း ထို့အတူပေါ့၊ အားချိန်ကိုစောင့်နေရမှာ မဟုတ်ဖူး။
ရတဲ့အချိန်ကို ဖြစ်တဲ့နည်းနဲ့ သုံးပြီးတော့ အဆက်မပြတ် ဖြည့်ပေးနေရမယ့် အင်အားတွေပေါ့၊ သူလည်း စီးပွားရေး အလုပ်တစ်မျိုးပဲ။
ခန္ဓာက တာဝန်ပေးထားတဲ့ စားဝတ်နေရေးအတွက်ကိုတော့ ဧကန်နေ့စဉ် လုပ်နေကြရတယ်၊ လုပ်နေကြသလိုပဲ သဒ္ဓါတရား အားကောင်းသူများကလည်း “တရားအလုပ်ဟာ စီးပွားရေးအလုပ်တစ်မျိုးပဲလေ”လို့ အဲသလို ခံယူပြီးတော့ ရတဲ့နည်းနဲ့ ဖြည့်ရမှာပါ။
🔹 သိက္ခာသုံးရပ်၊ အကျင့်မြတ်၊
မပြတ်ဖြည့်စရာ။
အရှင်သိရိန္ဒာဘိဝံသ
တိပိဋကဓရ ဓမ္မဘဏ္ဍာဂါရိက
{ယောဆရာတော်ဘုရားကြီး}
သာသနာတော်နှစ် ၂၅၃၅ ခု၊ ကောဇာသက္ကရာဇ် ၁၃၅၃ ခု၊ တပေါင်းလဆန်း ၅ ရက် တနင်္ဂနွေနေ့တွင် ဂန့်ဂေါမြို့နယ်၊ အနောက်ဂန့်ဂေါ သမိုင်းဝင် စွယ်တော်ရှင်မြတ်ဘုရားကြီးဝင်း အာရုံခံဓမ္မာရုံကြီးအတွင်း၌ အနောက်ဂန့်ဂေါ ရှုံးရွှီရွာ ဒကာဒကာမပေါင်း သူတော်ကောင်းတို့အတွက် ဓမ္မဒါန ဓမ္မလက်ဆောင်အဖြစ်ဖြင့် ဟောကြားအပ်သော တရားတော်ဖြစ်သည်။
🌺 🌻 💠 🌺 🌻 💠 🌺 🌻 💠 🌺 🌻 💠 🌺
#စာရိုက်ကူးယူကုသိုလ်ပြုပူဇော်ပါသည်။
ဓမ္မတရား,ဓမ္မစာပေများကို ပြန်လည်မျှဝေပေးခြင်းဖြင့် ကုသိုလ်ယူပွားများနိုင်ပါသည်။
ကိုပြုံး (ခ) ကိုအောင်လင်း
