14/05/2025
'ယူနိုက်တက်နဲ့စပါးစ် ချိုးဖျက်ရမယ့် မှတ်တမ်းဆိုး'
ရူဘင်အမိုရင်ကပြောတယ်။ ''အသင်းတစ်သင်းဟာ အခြားအသင်းတစ်သင်းကို (၄)ပွဲဆက်ရှုံးနိမ့်ဖို့ မဖြစ်နိုင်ဘူး''တဲ့။
သူဆိုလိုချင်တာက အခုရာသီတွင်း မန်ချက်စတာယူနိုက်တက်ဟာ စပါးစ်ကို(၃)ပွဲဆက်ရှုံးနိမ့်ထားရာ ယူရိုပါလိဂ်ဖိုင်နယ်မှာ ပြန်လည်လက်စားချေမယ်ဆိုတဲ့သဘောပါ။ အမိုရင်ဟာ သူ့ရဲ့တပည့်လက်သားကစားသမားတွေကို စိတ်ဓါတ်ခွန်အားပေးချင်တဲ့သဘောပါ။
တစ်ဘက်မှာ ရီးယဲလ်မက်ဒရစ်ကတော့ ရယ်နေပါလိမ့်မယ်။ သူအဲလိုပြောပြီးမကြာမီမှာပဲ ရီးယဲလ်ဟာ ဘာစီလိုနာကို (၄)ကြိမ်(၄)ခါဆက်တိုက် အရေးနိမ့်သွားလို့ပါပဲ။ ဆိုတော့ အမိုရင်ဟာ သူကြွေးကြော်ထားတဲ့အတိုင်း လုပ်ပြရမယ့်ဖိအားတိုးလာပါပြီ။
''You can take Harry Kane out of Spurs, but you can't take Spurs out of Harry Kane''ဆိုပြီး ဘောလုံးပရိသတ်တွေ မနှစ်ကလှောင်ပြောင်ခဲ့ဖူးတယ်။ စပါးစ်မှာဖလားမရလို့ ဘိုင်ယန်မြူးနစ်ပြောင်းတဲ့ကိန်း ဂျာမန်ဘီလူးတွေဆီ ကံကြမ္မာဆိုးတွေသယ်ဆောင်လာပြီး ဖလားလက်မဲ့ဖြစ်စေခဲ့တယ်။
လက်ရှိအချိန်မှာတော့ ဘိုင်ယန်ဘွန်ဒက်စ်လီဂါရပြီး ကိန်းရဲ့ကျိန်စာတွေပျက်ပြယ်သွားပါပြီ။ ဒါကြောင့်မို့ စပါးစ်ကလည်း ၂၀၀၈နောက်ပိုင်း ဆုဖလားတစ်လုံးတလေမှမရတဲ့အဖြစ်ကို ရပ်တန့်ပစ်နိုင်ဖို့ အာသီသပြင်းပြနေလိမ့်မယ်။ ယူရိုပါလိဂ်ဗိုလ်လုပွဲရောက်နှစ်သင်းလုံးမှာ ချန်ပီယံဖြစ်ရေးအပြင် အပေါ်မှာဖော်ပြခဲ့တဲ့ တွန်းအားကိုယ်စီရှိပါတယ်။
သူတို့ဟာ ဖိုင်နယ်အတွက်အားခဲထားတဲ့အလျောက် လိဂ်မှာအဆင့်(၁၆)၊ (၁၇)နေရာအထိအရောက်ခံကာ စွန့်စားနေကြပါတယ်။ တကယ်လို့ချန်ပီယံဖြစ်သွားရင် ပရီးမီးယားလိဂ်မှာအခြေအနေမကောင်းမှုကို ပရိသတ်တွေသင်ပုန်းချေမေ့လျော့ပေးနိုင်ပါလိမ့်မယ်။
ချန်ပီယံဆုကပ်လွဲတဲ့အသင်းကတော့ အများသူငါလက်ညှိုးထိုးမှုတွေကြား double အရှက်ကွဲရပါလိမ့်မယ်။
Photo crd
GoldenSports
