15/05/2024
Wannan ita ce tarbiyya!
Malami na tafiya tare da ɗalibinsa, sai s**a zo wucewa ta wani Lambu, a gefen shiga lambun sai s**a ga wani takalmi duk caɓi ya ɓata shi.
Ɗalibi ya cewa Malaminsa: bari na ɓoye wannan takalmin sai mu koma gefe don ganin yadda halin mai takalmin zai kasance, lalle zamu sha dariya.
Malam ya cewa ɗalibinsa: da ka yi masa wasan da zai ɓata masa rai gwanda ka yi masa wanda zai faranta masa rai.
Ɗauki kuɗin dake tare da kai, sanya a cikin takalmin, mu koma gefe don ganin irin murnar da mai takalmin zai yi...!!
Jim kaɗan wani dattijo ya fito daga lambun, ya nufi wurin da ya ajiye takalmansa, ko da ɗaga takalman sai ya ga kuɗi a ciki, sai ya faɗi a wurin yana Sujjadar godiya ga Allah, yana mai cewa: Ya Allah! Nagode maka daka bani abin zan sayawa matata magani, nagode maka da ka bani abin da zan ciyar da Iyalina.
Malamin da ɗalibinsa suna gefe sai hawaye ke zuba daga idanuwansu. Malami ya cewa ɗalibi: kar ka yadda ka rinƙa yiwa mutane wasan da zai ɓata musu rai domin baka san halin da suke ciki ba.
