12/03/2026
Dr. Alfred's sa DOSTv
Nakatakdang ipagawas sa usa ka programa sa telebisyon ang puno sa inspirasyon nga istorya sa King of Mangosteen ug sa Dr. Alfred's Essentials Inc.,- ang kumpanya nga maoy naghimu sa labing unang mangosteen capsule sa tibuok Pilipinas..
Niadtong February 24 hangtud 27, gibisita sa Department of Science and Technology- Information Institute (DOST- IIT) ang mga pasilidad ug mangosteen farm sa Dr. Alfred's nga nahimutang sa Barangay Birada, Kidapawan alang sa serye sa shootings alang sa maong TV program.
Gitutukan sa shooting ang istorya sa kinabuhi ni Dr. Alfredo Villarico, ang giilang King of Mangosteen ug Dr. Alfreds Essentials Inc. (DAEI) ang kumpanya nga iyahang gitukod.
Kahinumduman nga ang DAEI bag-uhay lamang nga nakadawat sa pasidungog nga gitawag og Best Small Enterprise Technology Upgrading Program (Best SETUP Praise Award) gikan sa DOST. Kini tungod sa paningkamot sa kumpanya nga mapahimuslan ang potensyal sa mangosteen. Resulta niini ang ubay-ubay nga mga produkto gikan sa mangosteen nga ilahang nahimu susama sa food supplements, kape, ready-to drink juices ug mangosteen premium ice cream.
Lakip sa nibisita sa Dr. Alfreds, atol sa shooting sa TV program, ang DOST SOCCSARGEN Regional Director Engr. Sammy Malawan, PSTO Cotabato Provincial Director Dr. Michael T. Mayo ug si Presidential Assistant Cesar B. Yano, Chairman of the Government of the Philippines Peace Implementing Panel.
Giila sa mga nahisgutang opisyales ang dakong tabang nga nahatag sa Dr. Alfred's ngadto sa komunidad susama sa employment opportunites alang sa mga katawhan.
