09/12/2025
“Proteksyon, Hindi Diskriminasyon: Ang Tamang Pagtrato sa LEVs sa National Highway”
Editorial Edition
Posted : December 06, 2025
Time: 1:52 PM
Original Content by: Rommel Garcia Poblador
Sa panahon ngayon na dumarami ang gumagamit ng Light Electric Vehicles (LEVs) at e-bikes bilang pang-araw-araw na sakay, lumalakas din ang usaping dapat ba silang payagang dumaan sa mga national highway. Marami ang natatakot, marami ang nalilito, at marami rin ang basta na lamang nagsasabing “bawal sila kasi delikado.” Ngunit kung susuriing mabuti, ang ganitong pag-iisip ay hindi akma sa prinsipyo ng ating Konstitusyon—ang equal protection of the law.
Ang sinasabi ng Saligang Batas ay simple: dapat pantay ang pagpapatupad ng batas sa lahat ng tao at lahat ng uri ng sasakyang ginagamit sa pampublikong kalsada. Kung ang mga sasakyang gumagamit ng gasolina ay sakop ng LTO, gayundin dapat ang mga LEV na ginagamit bilang transportasyon sa parehong kalsada sakop din sila ng LTO. Pareho silang transportation vehicles; pareho silang may karapatang protektahan at i-regulate — hindi i-discriminate.
Totoo: mas delikado ang LEVs sa national highways. Hindi sila designed para sa bilis ng ibang motor vehicle. Mas magaan sila, mas mababa ang top speed, at mas mataas ang risk kapag nakipagsabayan sa malalaking sasakyan. Pero ang solusyon ba ay total ban? Hindi.
Ang tamang solusyon ay proteksiyon, hindi PAGTABOY.
Bigyan ng pagkakataon na kumuha ng Lisensya at Rehistro ang mga LEV's at mabigyan ng PROPER TRAINING para maiwasan ang mga sinasabi ng iba na sila ay KAMOTE. Ang pagiging KAMOTE ay hindi lamang sa LEV's kundi nasa TAONG nagmamaneho.
Kung tunay na layunin ng gobyerno ang kaligtasan, hindi dapat outright prohibition ang unang hakbang. Dapat pag-aralan ang tamang klasipikasyon, magtakda ng mga speed limits, maglagay ng designated lanes, magbigay ng safety requirements tulad ng ilaw, reflector, protective gear, at education programs. Hindi limitado ang solusyon; marami ang pwedeng gawin. Pero ang pagbawal agad? Iyan ang madaling sagot pero maling direksyon.
Hindi ginagawang bawal ang mga TRICYCLE dahil sila ay REHISTRADO at LISENSYADO ngunit sa usapin ng kaligtasan dapat limitahan sa mga National Highway.Hindi rin ginagawang bawal ang bisikleta sa mga lugar na walang alternative route.
Bakit? Dahil sila ay transportation vehicles at may tungkulin ang gobyerno na protektahan ang bawat mamamayan, hindi pili lang.
Ganyan din dapat ang trato sa LEVs.
Ang tunay na diwa ng batas ay hindi upang pigilan ang mahihirap o low-speed commuters, kundi upang tiyakin na lahat ng gumagamit ng kalsada ay ligtas at may patas na oportunidad na gumamit ng pampublikong daan. Hindi dapat maging hadlang ang kung anong makina ang nagpapandar sa sasakyan—gasolina man o kuryente.
Sa huli, ang panawagan ay malinaw:
Regulasyon, oo. Proteksiyon, oo. Diskriminasyon, hindi.
Kung kailangan baguhin ang EVIDA LAW baguhin, o gumawa ng batas. Kung kailangan ng standards, magtakda ng standards. Ang hindi katanggap-tanggap ay ang solusyong “bawal ka kasi delikado ka,” dahil ang tunay na layunin ng batas ay hindi pahirapan ang mamamayan, kundi pangalagaan sila.
Sa mga gumagamit ng e-bike at LEVs, tandaan: may obligasyon kayong sumunod sa regulasyon. Pero may karapatan din kayong hindi basta pagb bawalan nang walang makatuwirang batayan. Ang kalsada ay para sa lahat — at ang batas ay para protektahan, hindi para magtaboy.
Disclaimer:
Ang editorial na ito ay batay sa pangkalahatang interpretasyon ng umiiral na batas at prinsipyo ng equal protection. Hindi ito maituturing na legal advice o opisyal na pahayag ng anumang ahensya ng pamahalaan. Para sa partikular na kaso, mas mainam kumonsulta sa kwalipikadong legal expert o sa mismong ahensiyang may hurisdiksiyon tulad ng LTO.
Sang-ayon ako dito, E-bike user din ako, at dapat din bigyan kami ng Tamang "way or Lane" sa national road kasi wala na kaming ibang madaanan po kung sakali man, okay lang naman sa amin na tuparin ang hininge nyong lisinsya o rehistro na dapat naming sundin at patas ang daanan namin kung ganon paman kasi patas nq kami kumoha ng lisinsya po.
Edeted lang po.
