02/02/2025
MENSAHI NANG GUBERNATORIAL CANDIDATE DANILO BAYLON AT VICE GUBERNATORIAL CANDIDATE AMONG ED PANLILIO PARA KENG ALDONG KAPAMPANGAN
"Kaluguran ming Kab***n,
Ngening ka-453 a anibersaryu ning pangatatag ning palsintan tamung indung b***n Pampanga, babiye mi ing alang anggan a kapasalamatan king balang Kapampangan a alang patnang lulugud, gugusal, magmasabal at lalaban para king b***n.
King sumangid na ning dakal a kapagsubukang abe-abe tamung limpasan, alagpasan at apanyambutan, arapan tamung mipnung tepangan anti mong metung a lalawigan ing paratang a bayu at masalang bukas uling sikanan taya ing balang metung kambe ning matibe tamung panandam a makab***n at dalise lugud king lalawigang Kapampangan.
Kayagnan ning paratang a bukas ating sislag a sala libutad na ning dalumdum a malambat nang makapadurut at makasaklub king kabilugang lalawigan. Pataglusan tamu sana ing sala king balang suluk ning bunduk, gabun, dayatan at danuman, pupusan tana ing malwat nang takut at ikampe tayang mitmung tapang at tetagan, at matas ing lagyu at dangalan ning Pampanga.
Kayagnan ning kekatamung kapagmasusian ganakan tamu ing ulaga ning balang metung king disnan nang tagumpe ning kekatamung lalawigan. Makanyan mu naman, denan tamung ustung ulaga ing respetu keng karapatan da ring balang tau, ing malayang makapamili king buri dang parasan ning b***n, makapangabiyayan king malinis at patas a paralan, mamiye payapa a alang takut o pangilagan pauli ning pamiyaliwa keng prinsipyo at kapaniwalan, at lalu na ing alang aliwang ari o guinung dudukuan nune ing metung ampon tune mu Dios a Guinu tamu ngan.
Ing pangarap mi keng paratang a bukas, miangat ya pa sanang matas ing Pampanga. Ing nasa mi, mibalik sa ing dangal ning lagyung Kapampangan. Manan ta sanang mas lalung mitau, sumlag at lumalam ing lugud tamu king Indung B***n at king kaparang Kapampangan, ita sanang eta ne paburen mibalik king delanan nang lusak at dewakan.
Manan ta sana king paratang a masalang bukas, abe abe tayang saganan ing sislag a sala. Saslag ya ing sala king karalumduman at e ne adaig ning karalumduman uling akamulatan tane ing Bayung Pampanga! Maging patutu na ing kekatamung lalawigan ing gabun da ring pantas at marangal, apagmaragul tang pasibayu a KAPAMPANGAN KU, PAGMARAGUL KU! LUID KA, LUID KA PALSINTAN MING KAPAMPANGAN!"
