28/06/2023
PAGNINILAY NGAYONG SABADO DE GLORIA (Black Saturday)
Abril 8, 2023.
Ang Black Saturday ay isang tahimik na araw kasunod ng mga kaganapan noong Biyernes Santo na nagtapos sa paglilibing ng ating Panginoong Hesus. Walang mga Misa ngayon, at lahat ng mga Simbahan ay sarado. Kahit na ang Kabanal-banalang Katawan at Dugo ng ating Panginoon ay hindi matatagpuan sa mga Tabernakulo. Wala silang laman at karamihan ay naiwang bukas. Ang lahat ay nagpapahiwatig ng pagluluksa. Sa isa sa mga antipona sa Liturgy of Hours ngayon, nakasulat, “Bagaman walang kasalanan, ang Panginoon ay pinatay. Ang mundo ay nagdadalamhati sa parang nag-iisang anak.” Tunay nga, itong Black Saturday ay isang araw ng pagluluksa.
Alam natin na si Jesus ay babangon mula sa pagkamatay, ngunit bago iyon, dapat muna nating madama sa ating sarili ang Kanyang pagdurusa at ang kamatayan na kinailangan Niyang danasin bago ang Pagkabuhay na Mag-uli.
Kadalasan, gusto lang nating tingnan ang masasayang bahagi ng mga bagay, o kung ano ang madali. Gusto nating maranasan agad ang Muling Pagkabuhay ng maraming beses ngunit baka naman nakakalimutan na natin ang Krus. Ang Krus muna ang pinagdaanan bago ang kagalakan ng pagkabuhay uli. Ang Black Saturday ay ang perpektong oras upang maghintay sa katahimikan at gunitain ang lahat ng mga kaganapan na nangyari sa buhay ni Jesus.
Parang kailan lang, panahon pa ng Pasko, at ipinagdiwang natin ang kapanganakan ng ating Mesiyas. Kaunting sandali lang at panahon naman ng Kuwaresma nang tayo ay naghanda para sa ating nalalaman na: ang Mesiyas ay dapat magdusa at mamatay para sa atin. Dahil dito, Siya ay ipinanganak. Hindi lahat ay puro saya, tawa, party, o tungkol sa mga regalo. Kung mananatili lamang tayo sa piling ng Panginoon tuwing panahon ng Pasko, tiyak hindi natin mararanasan nang buo ang mas dakilang Pasko na iniaalok sa atin mismo ni Hesus – ang Pasko ng Muling Pagkabuhay.
Ang nalalaman natin ay hindi nangangahulugang nasa ating mga puso na ito. Dapat nating pagnilayan ang buhay ni Kristo nang tuluy-tuloy upang ito ay maitatak sa alaala ng ating mga puso. Bago tayo magtungo sa Pagkabuhay na Mag-uli, dapat nating yakapin ang pagluluksa, pagkawala, at pasakit na nagpapahiwatig ng pagyakap ng ating sariling mga Krus sa buhay sa anumang estadong mayroon tayo.
Dapat nating pagnilayan ito upang bukas pagdating ng Pasko ng Muling Pagkabuhay, alam natin ang tunay na lalim ng kahulugan at ang taas ng kagalakan na taglay ng Pagkabuhay na Mag-uli, at ang halagang ibinayad ni Kristo para magkaroon tayo ng buhay na walang hanggan.
Ngayong Sabado ng Luwalhati, pinaniniwalaan na si Kristo ay bumaba sa lugar ng mga patay - kung saan naroroon ang mga matuwid pagkatapos ng kanilang kamatayan bago ang pagdating ng Kristo. Pumunta doon si Hesus upang buksan ang mga pintuan ng langit para sa kanila na nagpapahiwatig ng Kanyang tagumpay laban sa kamatayan. Tayo rin ay maaaring magkaroon ng tagumpay at buhay na walang hanggan sa pamamagitan ng pagpasan ng ating mga Krus kay Kristo.
Mula ngayon, dapat na patay na rin tayo sa ating sarili – ang ating pagiging makasalanan, katigasan ng ulo, at pagiging malamig sa pag-ibig sa kapwa. Ang isang tunay na Kristiyano ay nabubuhay sa pamamagitan ng pagsunod sa mga halimbawa ni Kristo na namuhay sa paglilingkod sa iba, at pagbibigay sa iba ng Kanyang makakaya, at ibinigay Niya ang Kanyang lahat - ang Kanyang lahat sa atin hanggang sa kamatayan. Nawa'y magtungo tayo sa Pasko ng Muling Pagkabuhay na taglay ang puso't isipan na dapat tayong magmahal at maglingkod sa iba simula sa pinakamahihirap sa mga mahihirap. Sa pamamagitan lamang ng pag-unawa dito tayong magkakaroon ng tunay na kagalakan ng Pasko ng Pagkabuhay.
Sa tapat na pagsunod kay Kristo hindi lamang sa salita kundi sa gawa, tayo rin ay makapapasok sa langit kasama ng mga hinirang. Ang kamatayan ay hindi na kamatayan para sa atin kundi hindi isang daan patungo sa ating pagkabuhay na mag-uli kay Kristo. Pagnilayan natin ito. Amen. +
Paano ba Magkumpisal? (Paraan ng Pagkukumpisal): http://bit.ly/40yabis
Pagsusuri ng Konsensiya (Gabay sa Kumpisal): https://www.catholicforlife.com/tl/a-guide-for-confession
Tamang Pananamit sa Simbahan: https://bit.ly/3JNVrWM
Pagpalain po tayong lahat ng Mapagmahal at Makapangyarihang Diyos, at ipagsanggalang nawa Niya tayo laban sa tukso at masasama ngayon at magpakailanman. Amen. +
Pagninilay ni: F.M.M.J.
By: Katholos Fidei
