23/07/2026
عوام پاران
محترم ايم پي اي ارباب لطف الله صاحب ۽ محترم ايم اين اي ڊاڪٽر مهيش ڪمار ملاڻي صاحب جي خدمت ۾ عرض
سائين صاحبان!
ڏيپلو هڪ تاريخي ۽ اهم شهر آهي، پر افسوس جو هر سال برساتن دوران هي شهر رحمت بدران زحمت جو منظر پيش ڪندو آهي. ٿوري برسات پوڻ سان ئي شهر جون مکيه بازارون، رستا ۽ گهٽيون پاڻي هيٺ اچي وڃن ٿيون، جنهن سبب عام شهري، واپاري، مزدور، سرڪاري ملازم، شاگرد، عورتون ۽ بزرگ سخت مشڪلاتن کي منهن ڏين ٿا.
گذريل ڪيترن ئي سالن کان عوام هن بنيادي مسئلي جي حل لاءِ آواز اٿاريندي رهي آهي، پر افسوس سان چوڻو پوي ٿو ته اڃا تائين شهر کي جديد ۽ پائيدار ڊرينج (نڪاسي آب) سسٽم نصيب نه ٿي سگهيو آهي. جڏهن ته اوهان حڪومتي ايوانن ۾ عوام جا چونڊيل نمائندا آهيو، تنهن ڪري ڏيپلو جي هن اهم مسئلي کي اوليت ڏيڻ اوهان جي ذميواري آهي.
سائين! ان ۾ ڪجهه ذميواري مقامي نمائندن ۽ بااثر ماڻهن جي به آهي، جيڪي عوام جا حقيقي مسئلا اوهان تائين مڪمل نموني نٿا پهچائين ۽ نه ئي شهر جي هن انتهائي اهم مسئلي بابت مسلسل ياد ڏيارين ٿا.
اسان جو پُرزور مطالبو آهي ته ڏيپلو شهر لاءِ ترجيحي بنيادن تي مستقل، جديد ۽ معياري ڊرينج سسٽم منظور ڪري جلد تعمير ڪرايو وڃي، جيئن هر سال برساتن دوران شهرين کي پيش ايندڙ تڪليفن جو مستقل خاتمو ٿي سگهي.
اسان کي اميد آهي ته اوهان عوام جي هن جائز مطالبي تي سنجيدگي سان غور ڪندي عملي قدم کڻندا، جيئن ڏيپلو جي عوام کي هن پراڻي مسئلي مان نجات ملي سگهي.
ڏيپلو جي باشعور عوام
