10/05/2026
معرکہ حق میں تاریخی فتح کی پہلی سالگرہ پر جی ایچ کیو میں مرکزی تقریب کا انعقاد کیا گیا، فیلڈ مارشل سید عاصم منیر مہمان خصوصی تھے، ایئر چیف مارشل ظہیر احمد بابر سدھو اور نیول چیف ایڈمرل نوید اشرف بھی شریک ہوئے۔
چیف آف ڈیفنس فورسز سید عاصم منیر، ایئر چیف مارشل ظہیر احمد بابر سدھو اور چیف آف نیول اسٹاف ایڈمرل نوید اشرف نے یادگار شہداء پر پھول رکھے۔
فیلڈ مارشل عاصم منیر نے تقریب سے خطاب میں کہا کہ آج کا دن ہم سب کیلئے باعث افتخار ہے، معرکہ حق میں پاکستان کو بے مثال کامیابی ملی، 6 سے 10 مئی 2025ء تک ہمارے عزم کو آزمانے کی کوشش کی گئی، اللہ تعالیٰ کی مدد سے پاکستان کو معرکہ حق میں کامیابی ملی۔
ان کا کہنا تھا کہ بھارت نے غاصبانہ ہتھکنڈوں سے جنگ مسلط کرنے کی کوشش کی، پاکستان نے ہر مرتبہ دشمن کو شکست فاش سے دوچار کیا، معرکہ حق میں بھارتی جارحیت کا منہ توڑ جواب دیا گیا۔
فیلڈ مارشل نے کہا کہ پوری قوم کی جانب سے معرکہ حق کے تمام شہداء کو خراج عقیدت پیش کرتا ہوں، ہم اپنے شہداء کی قربانیوں کو امانت سمجھتے ہیں، پوری قوم سیسہ پلائی دیوار کی طرح صف آراء ہوئی، پاکستان کی سیاسی قیادت نے بھی دُنیا کے محاذ پر کامیابی حاصل کی۔
جنرل عاصم منیر نے کہا کہ فتح میزائلوں اور پاک فضائیہ کے شاہینوں نے دشمن کے 26 سے زیادہ اہداف کو نشانہ بنایا، شکست خوردہ بھارت نے امریکا کے ذریعے جنگ بندی کی درخواست کی، پاکستان کا دفاع آج ناقابل تسخیر ہے، دشمن جان لے، آئندہ جنگ کی کوشش کی تو اثرات محدود نہیں ہوں گے۔
ان کا کہنا ہے کہ دشمن نے دوبارہ جارحیت کی تو پہلے سے زیادہ سخت جواب دیا جائے گا، گزشتہ سال کے دوران پاکستان کے قومی وقار میں بے پناہ اضافہ ہوا، آج دنیا میں ہمارے دوستوں کی تعداد ماضی کے مقابلے میں کہیں زیادہ ہے۔
چیف آف ڈیفنس فورسز نے مزید کہا کہ کل تک نکتہ چینی کرنے والے ممالک آج پاکستان کے معترف ہیں، دُنیا نے خطے میں ہولناک تباہی سے بچانے میں پاکستان کے کردار کو سراہا ہے، ہم ایران اور امریکی قیادت کے مشکور ہیں کہ انہوں نے پاکستان پر اعتماد کیا، ہم مستقل امن کیلئے کوششیں جاری رکھے ہوئے ہیں۔
فیلڈ مارشل کا کہنا ہے کہ پاکستان میں دہشت گردی بھارت اور افغانستان سے بھی جاری ہے، ہمارا افغانستان سے صرف ایک مطالبہ ہے بھارت کی ایماء پر دہشت گردی بند کرے، انشاء اللہ پوری قوم متحد ہوکر دہشت گردی کا بھی خاتمہ کرے گی، ہر بے گناہ پاکستانی شہری کے خون کا بدلہ لیں گے۔
انہوں نے کہا کہ کشمیری عوام کے حق خودارادیت کی حمایت جاری رکھیں گے، پاکستان نے لبنان اور فلسطین میں بھی جنگ بندی کیلئے کردار ادا کیا، پاکستان آزاد اور خود مختار فلسطینی ریاست کے قیام کا حامی ہے، پاکستان کا سبز ہلالی پرچم امید کا استعارہ ہے، پاکستان کا مستقبل بہت روشن اور تابناک ہے، پاکستان کا دفاع آنیوالے وقت میں بھی ناقابل تسخیر ہے۔
